ជាមួយគ្នានេះ តុលាការខេត្តកំពង់ស្ពឺបានចេញដីកាភ្លាមៗស្វែងរកចាប់ខ្លួនប្រជាពលរដ្ឋចំនួន ១៦នាក់ដែលគេសង្ស័យថា មានការពាក់ព័ន្ធនឹងអំពើហិង្សានោះ។
ប្រភពបានឲ្យដឹងថា ប្រជាពលរដ្ឋខ្មែរច្រើនពាន់គ្រួសារនៅក្នុងភូមិចំនួន ១២ភូមិ ក្នុងឃុំអមលាំង ស្រុកថ្ពង ខេត្តកំពង់ស្ពឺ កំពុងតែរងគ្រោះបាត់បង់ដីធ្លីកសិកម្ម។
ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិប្រជាពលរដ្ឋខ្មែរ លោក ជា ហ៊ាន ដែលកំពុងតែតាមដានស្ថានការណ៍នេះ បានមានប្រសាសន៍ប្រាប់វិទ្យុអាស៊ីសេរីថា ៖ «ស្រុកថ្ពង គឺនៅឃុំអមលាំង មានប្រជាពលរដ្ឋមួយក្រុមដែលគាត់មិនពេញចិត្តចំពោះក្រុមហ៊ុនលោកឧកញ៉ា លី យ៉ុងផាត់ ដែលហៅថា ក្រុមហ៊ុន Sugar កំពង់ស្ពឺហ្នឹង បានឈូសឆាយទៅលើដីរបស់ប្រជាពលរដ្ឋជាដីស្រែ ដីចម្ការ ដីលំនៅឋានរបស់គាត់។ មានការដុតខ្ទមរបស់ក្រុមហ៊ុនអស់ ៦ខ្នង ហើយគាត់នឹងបន្តការតវ៉ាតទៅទៀត បើសិនជាក្រុមហ៊ុន លី យ៉ុងផាត់ មិនព្រមដោះស្រាយគោលនយោបាយឲ្យគាត់ទេ គាត់នឹងធ្វើការតវ៉ារហូតទៅដល់សម្ដេចនាយករដ្ឋមន្ត្រី»។
ប្រជាពលរដ្ឋនៅក្នុងចំណោមប្រជាពលរដ្ឋរងគ្រោះជាច្រើនពាន់គ្រួសារ នៅក្នុងភូមិថ្នល់បំបែក ឃុំអមលាំង ស្រុកថ្ពង ខេត្តកំពង់ស្ពឺ បានថ្លែងប្រាប់វិទ្យុអាស៊ីសេរីតាមទូរស័ព្ទពីខេត្តកំពង់ស្ពឺមកថា ៖ «មូលហេតុ មកឈូសយកដីស្រែរបស់ប្រជាពលរដ្ឋ។ ដល់ពេលយូរទៅឈូសយកស្រែប្រជាពលរដ្ឋអស់អ៊ីចឹង ប្រជាពលរដ្ឋឲ្យក្រុមហ៊ុនហ្នឹងធ្វើកិច្ចសន្យា ហើយការពិតចង់ឲ្យតម្លៃប្រជាពលរដ្ឋហ្នឹងបានប៉ុន្មានអីប៉ុន្មាន ប៉ុន្តែក្រុមហ៊ុននោះឲ្យតម្លៃស្រែប្រជាពលរដ្ឋដែលមានកញ្ជ្រាំង គឺឲ្យ ១ហិកតា ២០០(ដុល្លារ) ហើយដីអត់កញ្ជ្រាំងឲ្យ ១ហិកតា ១០០ ហើយដល់ពេលអ៊ីចឹងប្រជាជនសុំ ១៥០០ ក្នុង ១ហិកតា។ ដល់ពេលវាអត់បាន ជំទាវថា ឲ្យប្រជាជនហ្នឹងយកខ្យល់ទៅ។ អ៊ីចឹងប្រជាជនខឹង»។
សុខ សេរី ៖ ប្រជាពលរដ្ឋមានគម្រោងការធ្វើអីទៀត? ពលរដ្ឋ ៖ ឥឡូវកំពុងដេញគ្រឿងចក្រឲ្យចេញទាំងអស់។ សុខ សេរី ៖ ប៉ុន្មានគ្រឿង? ពលរដ្ឋ ៖ ប្រហែល៥០-៦០គ្រឿង។
វិទ្យុអាស៊ីសេរីនៅមិនទាន់អាចទាក់ទងតំណាងក្រុមហ៊ុន Sugar កំពង់ស្ពឺ របស់លោក លី យ៉ុងផាត់ បានទេ នៅថ្ងៃព្រហស្បតិ៍នេះដើម្បីសុំការពន្យល់។
លោក កង ហ៊ាង ជាអភិបាលខេត្តកំពង់ស្ពឺ ដែលបានដឹងរឿងនេះ បានមានប្រសាសន៍អត្ថាធិប្បាយថា ៖ «យើងធ្វើបាតុកម្ម កូដកម្ម ធ្វើតាមសន្តិវិធី ធ្វើតាមច្បាប់ទៅ មាននរណាគេទៅថាអី! ទៅដុតបំផ្លាញផ្ទះគេ អាហ្នឹងវាត្រូវតែខុសហើយ តុលាការគេចាប់ហើយ។ គេគ្មានប៉ះពាល់ដីធ្លីគាត់បន្តិចបន្តួចឯណាក្នុងការធ្វើវិនិយោគហ្នឹង! គាត់ទេដែលទាមទារ ក្នុង ៣ចំណុចហ្នឹង មានទាមទារ ១ចំណុច អា២វាមិនអីទេ ប៉ុន្តែអាទី៣នេះទាមទារសុំដីព្រៃ វាអត់ត្រូវ!»។
ជម្លោះដីធ្លីតឹងតែងរវាងប្រជាពលរដ្ឋជាច្រើនពាន់គ្រួសារនៅឃុំអមលាំង ស្រុកថ្ពង ខេត្តកំពង់ស្ពឺ ជាមួយនឹងក្រុមហ៊ុន Sugar កំពង់ស្ពឺ របស់លោក លី យ៉ុងផាត់ នោះ បានចាប់ផ្ដើមតាំងពីដើមឆ្នាំ២០១០ កន្លងមកនេះ។
ប្រភពពីអាជ្ញាធរខេត្តបានឲ្យដឹងថា រដ្ឋាភិបាលនិងអាជ្ញាធរខេត្តកំពង់ស្ពឺបានផ្ដល់ដីសម្បទានចំនួន ៨០០០ហិកតាឲ្យទៅក្រុមហ៊ុន លី យ៉ុងផាត់ នោះ ក្នុងឆ្នាំ២០១០នេះ ដើម្បីឲ្យក្រុមហ៊ុននោះដាំដើមអំពៅផលិតជាស្ករស៕