ការធ្វើសកម្មភាពជាថ្មីឈូសឆាយបំផ្លាញផ្ទះសម្បែងប្រជាពលរដ្ឋនោះបានឈានដល់ថៃ្ងទី២ ហើយនៅថ្ងៃអង្គារនេះ បន្ទាប់ពីសកម្មភាពកាលពីថៃ្ងច័ន្ទកន្លងទៅថ្មីៗនេះ មានក្រុមយោធាប្រដាប់អាវុធចំនួន៥នាក់បានមករុះរើផ្ទះចំនួនជាង ១០ខ្នងដោយគ្មានការជូនដំណឹងជាមុន និងគ្មានឯកសារដីកាឬបទបញ្ជាអ្វីឡើយ។
លោក ញ៉ុញ ស៊ីថា តំណាងប្រជាពលរដ្ឋខែ្មររងគ្រោះរស់នៅក្នុងភូមិ២ ក្រុម៩ ស ង្កាត់៤ ខណ្ឌមិត្តភាពក្រុងព្រះសីហនុ បានមានប្រសាសន៍ប្រាប់វិទ្យុអាស៊ីសេរីនៅថៃ្ងអង្គារនេះ ពីកន្លែងកើតហេតុនោះថា ៖ «ឥឡូវហ្នឹង វារុញផ្ទះដែលវារុះចោលពីម្សិលមិញ ថ្ងៃហ្នឹងវារុញសម្អាត។ ទប់ស្កាត់គេមិនឈ្នះ យើងម៉េចនឹងហ៊ានចូល ហាមឃាត់វាមិនបាន ប្រហែលចូល ១០០នាក់ហើយ ម្ចាស់ដីនៅឈរស្រក់ទឹកភ្នែក។ រឿងព្រួយបារម្ភ វាភ័យហើយ ភ័យផងព្រួយផង រឿងយ៉ាប់ក្នុងការរស់នៅ»។
លោកបានអះអាងថា ក្រុមគ្រួសាររបស់លោកបានមករស់នៅទីនោះចាប់តាំងពីឆ្នាំ១៩៨៣មកម៉្លេះ។ លោកមានឯកសារគ្រប់គ្រាន់សម្គាល់កម្មសិទ្ធិនិងផ្ទះសម្បែងនោះ។
លោក មិន ថាវរិន្ទ តំណាងប្រជាពលរដ្ឋរងគ្រោះម្នាក់ទៀត បានមានប្រសាសន៍ថា លោកបានមករស់នៅទីនោះតាំងពីឆ្នាំ១៩៩០ មានឯកសារសម្គាល់កម្មសិទ្ធិដីធ្លីចេញដោយអាជ្ញាធរមូលដ្ឋានត្រឹមត្រូវ។
លោក មិន ថាវរិន្ទ មានប្រសាសន៍ថា ៖ «ថ្ងៃនេះ អត់មានទីលំនៅផង នៅក្រោមដើមឈើ។ ដីហ្នឹងតាមដែលខ្ញុំក្ដាប់បាន គឺថាមានក្រុមហ៊ុនមួយដែលគេចង់បានដីហ្នឹងវិញ គេប្រើទឹកលុយជាមួយមេៗធំ ខាងទាហានហ្នឹង គឺដើម្បីដកយកដីហ្នឹងឡើងវិញ»។
មិនអាចទាក់ទងក្រុមយោធាប្រដាប់ដោយអាវុធដែលរងការចោទប្រកាន់ពីប្រជាពលរដ្ឋខាងលើនេះបានទេនៅថ្ងៃអង្គារនេះ។
មេភូមិម្នាក់សុំមិនបញ្ចេញឈ្មោះ ជាមេភូមិ២ ក្រុម៩ សង្កាត់១ ខណ្ឌមិត្តភាព ក្រុងព្រះសីហនុ បានមានប្រសាសន៍ប្រាប់វិទ្យុអាស៊ីសេរីថា ការមករុះរើផ្ទះសម្បែងរបស់ប្រជាពលរដ្ឋនោះបានធ្វើដោយឆ្មក់ ៖ «អត់ទេ អានេះដីអនុក្រឹត្យ ហើយគាត់កាប់អីនៅអ៊ីចឹងទៅ ដល់ទាហានមកទិញតៗ។ មុនដំបូងទាហានចាប់កន្លែងហ្នឹង ហើយទៅលក់ឲ្យអ្នកនេះអ៊ីចឹងទៅ ចេះមកទិញនៅ ដល់ពេលមើលទៅ ឃើញរបៀបលួចឆ្មក់ កាងទុកឲ្យលោកនេះ លោកនោះអ៊ីចឹង»។
ទាក់ទងនឹងបញ្ហាខាងលើនេះ លោក អ៊ំ សំអាត ប្រធានផែ្នកស៊ើបអង្កេតរបស់អង្គការសិទ្ធិមនុស្សលីកាដូដែលកំពុងតែតាមដានករណីនេះ បានមានប្រសាសន៍ថា ៖ «ពាក់ព័ន្ធនឹងបញ្ហានេះ ដោយគេអះអាងថា ដីនោះជាដីនៅក្នុងតំបន់អនុក្រឹត្យ លេខ៧១ របស់រដ្ឋាភិបាលដើម្បីអភិវឌ្ឍន៍ព្រៃឈើ ហើយគេថា ការដេញហ្នឹង គឺដើម្បីដាំដើមឈើឡើងវិញ។ ក៏ប៉ុន្តែតាមការអះអាងរបស់ប្រជាពលរដ្ឋដែលត្រូវបានរុះរើហ្នឹង បានទិញដីក្នុងតម្លៃពី ១ពាន់ ទៅ២ពាន់ដុល្លារ ពួកយោធានៅទីនោះ»។
លោកបានសម្ដែងការព្រួយបារម្ភអំពីអំពើហិង្សារវាងកងយោធាប្រដាប់អាវុធនិងប្រជាពលរដ្ឋរងគ្រោះនៅពេលមានការខឹងសម្បានិងប៉ះទង្គិចគ្នានោះ៕