ប្រជាពលរដ្ឋចំនួន២៧នាក់មកពីខេត្តឧត្តរមានជ័យដែលកំពុងតែលាក់ខ្លួននៅក្នុងទីក្រុងភ្នំពេញរយៈពេលមួយសប្តាហ៍ហើយនោះ បានដាក់ញត្តិនិងពាក្យបណ្តឹងរបស់ពួកគាត់កាលពីថៃ្ងព្រហស្បតិ៍ ទី១៥ ខែតុលា សុំឲ្យលោកនាយករដ្ឋមន្រ្តី ហ៊ុន សែន សភាជាតិ ទីស្តីការគណៈរដ្ឋមន្រ្តី និងអង្គការសហប្រជាជាតិ ជួយដោះស្រាយប្រគល់ដីធ្លីឲ្យបានសមរម្យនិងសំណងខូចខាតនានា ក្រោយពីប្រជាពលរដ្ឋជាង១០០គ្រួសារបានទទួលរងការដុតផ្ទះចោលកាលពីដើមសប្តាហ៍កន្លងទៅនេះក្នុងការរឹបយកដីធ្លី។
ក្រៅពីនេះពួកគាត់មិនហ៊ានវិលត្រទ្បប់ទៅកាន់ភូមិស្រុកវិញទេ ដោយសារតែមានការព្រួយបារម្ភអំពីការតាមចាប់ខ្លួនដោយនគរបាលខេត្តឧត្តរមានជ័យនោះ។
ប្រជាពលរដ្ឋម្នាក់មកពីឃុំកូនគ្រៀល ក្រុងសំរោង ខេត្តឧត្តរមានជ័យ តំណាងឲ្យគ្រួសារបាត់បង់ទីជម្រកនិងដីធ្លីកន្លងមកនេះ បានថែ្លងប្រាប់វិទ្យុអាស៊ីសេរីថា ៖ «ពាក្យបណ្ដឹងទាមទារហ្នឹងគឺទាមទារសំណងផ្ទះសម្បែង ធនធាន ទ្រព្យសម្បត្តិ ដែលបាត់បង់ដែលគាត់កម្ទេចចោលគ្មានសល់អ្វីហ្នឹង ទាមទារឲ្យបានសងឲ្យបានសមរម្យមកវិញ។ អ៊ីចឹងខ្ញុំសុំទាមទារសំណងហ្នឹង ដីស្រែគឺសុំឲ្យបាន៥ហិកតារវិញ ពីព្រោះកាលពីដើមមកគឺគេចែកបានពេញលេញ អត់ទាន់មានក្រុមហ៊ុនអីទេ កាលពីឆ្នាំ២០០៣មក»។
តំណាងប្រជាពលរដ្ឋនៃគ្រួសារអ្នកតវ៉ាម្នាក់ទៀតនៅក្នុងចំណោម២៧នាក់ ដែលកំពុងតែលាក់ខ្លួននៅក្នុងទីក្រុងភ្នំពេញ បានថែ្លងថា ៖ «ខ្ញុំចង់មានបំណងទៅស្រុកវិញដែរ ក៏ប៉ុន្តែពេលការងារបានសម្រេចបានខ្ញុំអាចទៅវិញបាន។ ថាមានចំណារចេញពីសម្ដេច ហើយសម្ដេចជួយដោះស្រាយឲ្យប្រជាពលរដ្ឋ»។
មន្រ្តីនគរបាលមួយរូបនៃខេត្តឧត្តរមានជ័យបានមានប្រសាសន៍ថា អាជ្ញាធរនឹងពិចារណាបើសិនណាមានការសុំទោសពីប្រជាពលរដ្ឋមួយចំនួន ៖ «បើសិនជាគាត់ដឹងថាខុសហើយ គាត់ទៅបំពានអ៊ីចឹង មកសុំ(ទោស)អី អាហ្នឹងអាចនិយាយគ្នាបាន ដោយមានអ្នកធានាត្រឹមត្រូវមក»។
លោក អំ សំអាត ប្រធានក្រុមស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាលមួយ ហៅកាត់ថា លីកាដូ បានមានប្រសាសន៍ថា លោកសុំឲ្យក្រុមសមត្ថកិច្ចបោះបង់ចោលផែនការតាមចាប់ខ្លួន។
លោក អំ សំអាត បានមានប្រសាសន៍ថា ៖ «សុំឲ្យមានដំណោះស្រាយឲ្យបានឆាប់ ព្រោះប្រជាពលរដ្ឋ ដីសម្រាប់សង់ជម្រកហ្នឹង ទី២ សុំបញ្ឈប់នូវការតាមចាប់និងការគំរាមកំហែង»។
សូមជម្រាបថា ប្រជាពលរដ្ឋចំនួន៤នាក់ហើយត្រូវបានចាប់ខ្លួនក្រោមបទចោទប្រកាន់ថា បានញុះញង់ឲ្យមានការងើបតវ៉ានៅក្នុងរឿងជម្លោះដីធ្លីកាលពីដើមសប្តាហ៍កន្លងទៅនេះ នៅក្នុងឃុំកូនគ្រៀល ក្រុងសំរោង ខេត្តឧត្តរមានជ័យ។ នគរបាលខេត្តកំពុងតែស្វែងរកចាប់ខ្លួនប្រជាពលរដ្ឋចំនួន២នាក់ទៀតកំពុងតែរត់លាក់ខ្លួន។
កាលពីដើមសប្តាហ៍កន្លងទៅនេះ ក្រុមអាជ្ញាធរនៅក្នុងខេត្តឧត្តរមានជ័យបានរងការចោទប្រកាន់ថា បានដុតបំផ្លាញផ្ទះប្រជាពលរដ្ឋចំនួនជាង១០០ខ្នងដែលមានជម្លោះដីធ្លីជាមួយនឹងក្រុមហ៊ុនឯកជនចំនួន៤ដាំដើមអំពៅនៅលើផ្ទៃដីសរុបជាង១ម៉ឺនហិកតារ។
ប្រភពបានឲ្យដឹងថា ក្រុមហ៊ុនទាំងនោះបានយល់ព្រមផ្តល់ដីធ្លីទំហំប្រមាណ៣០ម៉ែត្រគុណនឹង៥០ម៉ែត្រនិងដីស្រែចំនួន១ហិកតារឲ្យគ្រួសារមួយចំនួនដើម្បីបន្តការរស់នៅ ប៉ុន្តែគ្រួសារទាំងនោះមិនយល់ព្រម ដោយសារទំហំដីធ្លីនោះតិចជាងដីធ្លីចាស់របស់គាត់កាលពីមុន។
នៅមិនទាន់មានការបំភ្លឺណាមួយនៅទ្បើយទេពីតំណាងក្រុមហ៊ុនជុំវិញរឿងចម្រូងចម្រាសខាងលើនេះ៕