ក្រុមអ្នកភូមិបានព្យាយាមសម្រុកចូលទៅកាន់ជំរំតង់យោធា ដែលដាក់ការពារគ្រឿងចក្រប្រមាណ ១៥គ្រឿង ហើយស្រែកទាមទារឲ្យកងទាហានប្រមូលយកគ្រឿងចក្រចាកចេញដើម្បីបញ្ចប់ការឈូសឆាយដីដែលគេអះអាងថា ជាដីស្រែចម្ការរបស់ប្រជាពលរដ្ឋ ។
បើតាមការឲ្យដឹង ក្រុមប្រជាពលរដ្ឋប្រមាណ ៤០០នាក់ បានលើកគ្នាមកពីឃុំបល្ល័ង្គ ស្រុកប្រាសាទបាគង ឃុំខ្នារ ស្រុកសូទ្រនិគម និងមកពីឃុំត្បែង ស្រុកបន្ទាយស្រី ។
ទោះយ៉ាងណា កងទាហានបានត្រឹមតែឆ្លើយតបថា គេពុំបានរំលោភទៅលើដីប្រជាពលរដ្ឋណាទេ ដោយពួកគេដឹងត្រឹមតែទទួលបញ្ជាឲ្យដឹកជញ្ជូនគ្រឿងចក្រនិងការពារគ្រឿងចក្រទាំងនោះប៉ុណ្ណោះ ៖ «ខ្ញុំសូមព្រមានឲ្យហើយ កុំថា ខ្ញុំយកដីបងឯង សូម្បីតែភូមិក៏ខ្ញុំអត់ស្គាល់ដែរ គឺឯកឧត្តមឧបនាយករដ្ឋមន្ត្រីបញ្ជាឲ្យឈរនៅនឹងកន្លែងការពារគ្រឿងចក្រឲ្យបាន» ។
លោក ស៊ូ ភិរិន្ទ អភិបាលខេត្តសៀមរាប បានមានប្រសាសន៍ថា ការតវ៉ានោះគឺមានក្រុមជំទាវៗ ដែលជាអ្នកទិញលក់ដីនៅពីក្រោយខ្នង ហើយលោកអំពាវនាវឲ្យបញ្ឈប់បញ្ហានេះ ។
លោក ស៊ូ ភិរិន្ទ បានមានប្រសាសន៍ថា ការដែលទាហានយកគ្រឿងចក្រមកឈូសឆាយនោះគម្រោងធ្វើសកម្មភាពលើផ្ទៃដីជាង ៥០០ហិកតាដើម្បីបង្កើតមជ្ឈមណ្ឌលជនពិការជាតិ តាមគោលការណ៍របស់លោកនាយករដ្ឋមន្ត្រី ហ៊ុន សែន សម្រាប់ផ្តល់ជូនជនពិការ ១០០គ្រួសារក្រោមជំនួយកូរ៉េប៉ុណ្ណោះ មិនមែនជាការឈូសឆាយដីរបស់ក្រុមហ៊ុនទេ ។
លោក ស៊ូ ភិរិន្ទ បានមានប្រសាសន៍ថា ៖ «ក្នុងហ្នុងមានដីសម្ដេចក្រុមព្រះ ៦៣៧ហិកតា មានដីលោក គីង សំណាង មានដីបង ក បង ខ ដែលរំលោភផែនទីព្រៃឈើកាលពីឆ្នាំ២០០២ វាមិនមែនជាដីស្រែចម្ការរបស់ពលរដ្ឋទេ» ។
អ្នកស៊ើបអង្កេតរបស់អង្គការសិទ្ធិមនុស្ស លីកាដូ ខេត្តសៀមរាប លោក ចៅ ល័ក្ខណ៍វណ្ណា បានមានប្រសាសន៍ថា ការចេញដីកាដកហូតដីធ្លីរបស់អាជ្ញាធរនោះ នៅមានខ្វះចន្លោះ ដោយមិនមានអនុក្រឹត្យរបស់នាយករដ្ឋមន្ត្រី នៅខ្វះឯកសារអមដែលចេញដោយក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាននៅឡើយ ។
លោក ចៅ ល័ក្ខណ៍វណ្ណា មានប្រសាសន៍ដូច្នេះថា ៖ «សំណូមពរឲ្យលោកអភិបាលខេត្តពិនិត្យឡើងវិញនូវលិខិតបង្គាប់ការ វាធ្វើឲ្យប៉ះពាល់ដល់ដីស្រែចម្ការរបស់ប្រជាជន អ៊ីចឹង ការតវ៉ារបស់ពួកគាត់ទាំងអស់ហ្នឹង វាអាចទៅដល់ការបង្ហូរឈាមផងដែរ» ។
យោងតាមដីកាដកហូតរបស់សាលាខេត្តសៀមរាប ចុះថ្ងៃទី២៩ ខែឧសភា ឆ្នាំ២០០៦ បានសម្រេចដកដីព្រៃចំនួន ២.៤៤៨ហិកតាមករក្សាទុកជារបស់រដ្ឋវិញ ដែលក្នុងផ្ទៃដីដកហូតនោះចំនួន ៥១៩ហិកតាសម្រាប់បង្កើតតំបន់អភិវឌ្ឍន៍មជ្ឈមណ្ឌលជនពិការជាតិ ៕