ប្រភពដដែលមិនអាចបញ្ជាក់អំពីនីតិវិធីលំអិតនៃការបើកសវនាការនោះទេ។ ប៉ុន្តែមន្ត្រីមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍ឲ្យដឹងថា ក្រុមមន្ត្រីធ្វើការផ្នែកសិទ្ធិមនុស្ស នឹងបន្តការតាមដានក្នុងករណីនេះជាបន្តទៅទៀត។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍ប្រាប់វិទ្យុអាស៊ីសេរី នៅថ្ងៃទី១ នេះថា ៖ «យើងមិនដឹងថា តើតុលាការហ្នឹងបើកដើម្បីធ្វើម៉េចឲ្យមានការដោះលែងពួកគាត់ ទាំង៦នាក់ ឬមួយក៏បើកដើម្បីដាក់បន្ទុកបន្ថែមទៀត។ នៅក្នុងប្រទេសកម្ពុជាយើង តុលាការយើង អត់មានឯករាជ្យទេ ហើយដល់ពេលដរាបណាយើងអត់មានតុលាការឯករាជ្យ និងផ្ដល់យុត្តិធម៌ដល់ប្រជាពលរដ្ឋទូទៅ អាហ្នឹងបានការជឿចិត្តដល់ប្រព័ន្ធតុលាការទាំងមូល ដូច្នេះខ្ញុំថា ជារឿងមួយ ដែលយើងឃើញ វាជាការឆ្លុះបញ្ចាំងនូវការខ្វះយុត្តិធម៌នៅក្នុងសង្គម»។
មនុស្សទាំង ៦នាក់ មានឈ្មោះ ម៉ាន់ ចាន់ថន, ម៉ាន ចាន់ថា, រឹម រ៉ើយ, ឈឿន ឆេង, នៅ ទិត្យ, និង សុំ សុភ័ក្រ ត្រូវតុលាការចេញដីកាឃុំខ្លួននៅក្នុងពន្ធនាគារព្រៃស ដោយចោទពីបទកាប់រុករានដីរដ្ឋ នៅឯភូមិអូរឈើទាល ឃុំកន្ទួត ស្រុកជាំក្សាន្ត ខេត្តព្រះវិហារ។
ការរកកិច្ចអន្តរាគមន៍លើកលែងទោស ក្នុងសំណុំរឿងមនុស្សទាំង ៦នាក់នោះ ធ្វើឲ្យមានព្រះរាជអន្តរាគមន៍ពីព្រះមហាក្សត្រនៃប្រទេសកម្ពុជា ឲ្យលើកលែងការចោទប្រកាន់និងមានអន្តរាគមន៍ពីប្រធានរដ្ឋសភា តាមរយៈអ្នកតំណាងរាស្ត្រ ម៉ោញ សាផាន ហើយក៏មានកិច្ចអន្តរាគមន៍ពីខុទ្ទកាល័យលោកនាយករដ្ឋមន្ត្រី ហ៊ុន សែន រួមជាមួយលិខិតរបស់រដ្ឋមន្ត្រីក្រសួងយុតិ្តធម៌ផងដែរ។
ក្រុមគ្រួសាររបស់ជនជាប់ចោទកំពុងតែរង់ចាំមើលសវនាការរបស់តុលាការក្រុងភ្នំពេញ ក្នុងការកំណត់ពីជោគវាសនារបស់ជនជាប់ចោទទាំង ៦នាក់នោះ។
អ្នកស្រី យ៉ង រឿង អាយុ ៦០ឆ្នាំ ជាម្តាយរបស់ជនជាប់ចោទពីរនាក់ ក្នុងចំណោមនោះ បានមានប្រសាសន៍ទទូចសុំឲ្យតុលាការ លើកលែងទោសដល់អ្នកទាំងនោះ ៖ «ខ្ញុំសុំឲ្យតុលាការហ្នឹង រកយុត្តិធម៌ សុំឲ្យដោះលែងទាំង៦នាក់ហ្នឹង។ ខ្ញុំសូមសំណូមពរ គឺចង់បានតែប៉ុណ្ណឹងទេ។ សូមមេត្តាថា ឲ្យតុលាការកាត់ក្ដី ដើម្បីឲ្យដោះលែង ព្រោះ ម៉ាន់ ចាន់ថន នោះ កូនមួយហ្វូង អត់មានអ្នកណាចិញ្ចឹមទេ នៅដោយសារគេឯងទេ សព្វថ្ងៃ»។
សូមបញ្ជាក់ថា ការចាប់ឃុំខ្លួនមនុស្ស ៦នាក់នោះ គឺធ្វើឡើងនៅក្នុងយុទ្ធនាការរបស់ក្រុមសមត្ថកិច្ចចម្រុះ ដែលបានចុះទៅហាមឃាត់ប្រជាពលរដ្ឋចំនួន ៣១៧គ្រួសារ មិនឲ្យសង់លំនៅក្នុងភូមិអូរឈើទាល ឃុំកន្ទួត ស្រុកជាំក្សាន្ត ខេត្តព្រះវិហារ កាលពីចុងឆ្នាំ២០០៧ កន្លងទៅ។ ការចុះបង្ក្រាបនោះ បណ្តាលឲ្យប្រជាពលរដ្ឋ ២នាក់ បានស្លាប់ និងរងរបួសដោយសារការបាញ់របស់សមត្ថកិច្ច និងប្រជាពលរដ្ឋជាង ១០នាក់ បានចាប់ខ្លួន ហើយត្រូវដោះលែងមកវិញខ្លះ៕