ពលរដ្ឋនៅកំពង់ឆ្នាំងចោទអាជ្ញាធរមូលដ្ឋានរឹបអូសយកដី

ពលរដ្ឋនៅឯភូមិដាច់ស្រយាលមួយ ក្នុងស្រុកកំពង់លែង ខេត្តកំពង់ឆ្នាំង ចោទអាជ្ញាធរថា បានរឹបអូសយកដីធ្លីដែលគាត់បានកាន់កាប់ជាង ១០ឆ្នាំមកហើយទៅប្រគល់ឲ្យអ្នកផ្សេង ព្រោះតែការរើសអើងគណបក្សនយោបាយ។

ដោយ មណ្ឌល កែវ
2012-07-16

pb.mp3

អ្នកភូមិកំពង់បាចិន ៤គ្រួសារ ដែលជាសមាជិកគណបក្ស សម រង្ស៊ី បានចោទប្រកាន់អាជ្ញាធរភូមិថា បានរឹបអូសយកដីធ្លីពីពួកគាត់ទៅប្រគល់ឲ្យប្រជាពលរដ្ឋផ្សេងដែលជាសមាជិកគណបក្សកាន់អំណាច។

ស្ត្រីអ្នកភូមិឈ្មោះ អ៊ី ផល្លី អាយុ ៤៣ឆ្នាំ ជាប្រជាពលរដ្ឋភូមិកំពង់បាចិន ឃុំពោធិ៍ ស្រុកកំពង់លែង ខេត្តកំពង់ឆ្នាំង។ អ្នកស្រីបានឲ្យដឹងនៅព្រឹកថ្ងៃទី១៥ កក្កដា ថា ដីដែលមានទទឹង ៥០ម៉ែត្រ បណ្ដោយ ២០០ម៉ែត្រនេះ គាត់បានកាន់កាប់តាំងពីឆ្នាំ២០០១ មកម្ល៉េះ ស្រាប់តែឥឡូវមេភូមិកំពង់បាចិន គឺលោក ពេជ្រ យឺន បានប្រើកម្លាំងមកវាស់វែងរំលោភយកដើម្បីប្រគល់ឲ្យអ្នកភូមិផ្សេងដែលជាសមាជិកគណបក្សកាន់អំណាច។

អ្នកស្រី អ៊ី ផល្លី៖ «គេថាដីរដ្ឋ តែខ្ញុំបានកាន់កាប់យូរណាស់ហើយ ខ្ញុំថែរក្សាកាប់ព្រៃគាស់គល់ឡើងស្អាតអស់ហើយ រួចមកវាស់យកអ៊ីចឹងចិត្តគេចិត្តខ្ញុំខឹងដូចគ្នា។ កូនខ្ញុំយំស្រែកយ៉ាងណាក៏គេមិនព្រមស្ដាប់ដែរ គេនៅតែវាស់យកទៅចែកគ្នាអ៊ីចឹង...»។

លោក រស់ ភាព ជាសមាជិកក្រុមប្រឹក្សាឃុំពោធិ៍ មកពីគណបក្ស សម រង្ស៊ី បានឲ្យដឹងដែរថា ដីរបស់លោកដែលមានលិខិតបញ្ជាក់ពីមេភូមិចាស់ថា លោកបានទិញបន្តពីបងថ្លៃលោកតាំងពីឆ្នាំ២០០១ មកនោះ ក៏ត្រូវបានមេភូមិរំលោភយកផងដែរ៖ «ខ្ញុំគ្រប់គ្រងតែរហូត ហើយខ្ញុំបានធ្វើរបង និងដាំដំណាំជាប់ជារៀងរាល់ឆ្នាំ។ ខាងក្រោមខ្ញុំដាំសណ្ដែក ផ្នែកខាងលើខ្ញុំដាំឫស្សី ដាំត្នោត ស្រាប់តែម្សិលមិញគេកំណត់ថា គេយកដីហ្នឹងអង្កន់ចែកគ្នាគេ...»។

ប្រជាពលរដ្ឋទាំង ៤គ្រួសារ ដែលរងការរំលោភយកដីពីលោកមេភូមិនេះ មានឈ្មោះ រស់ ភាព ជាសមាជិកក្រុមប្រឹក្សាឃុំពោធិ៍ មកពីគណបក្ស សម រង្ស៊ី ឈ្មោះ អ៊ី ផល្លី ឈ្មោះ នៅ ពឿន និងឈ្មោះ អ៊ី ណៃ ពួកគេទាំង ៣នាក់ គឺជាសមាជិកសកម្មរបស់គណបក្ស សម រង្ស៊ី។

មេភូមិកំពង់បាចិន គឺលោក ពេជ្រ យឺន ពន្យល់ចំពោះបញ្ហានេះថា មិនមែនដូចការចោទប្រកាន់របស់ប្រជាពលរដ្ឋទាំង ៤គ្រួសារនោះទេ។ លោកថា ទាំង ៤គ្រួសារនេះបានមកវាតយកដីកាន់កាប់ដោយពុំឲ្យអាជ្ញាធរភូមិដឹងឡើយ។

លោកបន្តថា ដីតំបន់នេះអាជ្ញាធររក្សាទុកសម្រាប់ឲ្យប្រជាពលរដ្ឋក្រីក្រដែលមិនទាន់មានដីធ្លីសង់លំនៅឋាន។ លោកពុំមែនដកហូតយកមកធ្វើជាកម្មសិទ្ធិផ្ទាល់ខ្លួនឡើយ៖ «ដីហ្នឹងយើងទុកសម្រាប់ពង្រាយប្រជាជនឲ្យមកនៅ។ ខ្ញុំមានយកធ្វើជាសម្បត្តិផ្ទាល់ខ្លួនឯណា? ទុកឲ្យប្រជាជន។ តែប្រជាជនក្រុមនេះចាប់យកសេរីអត់បានមកប្រាប់ខ្ញុំជាមេភូមិទេ ចេះតែចាប់យកស្រេចចិត្ត។ បើមកប្រាប់ខ្ញុំអត់អីទេ...»។

យ៉ាងនេះក្ដី មន្ត្រីសម្របសម្រួលសមាគមអាដហុក ការពារសិទ្ធិមនុស្សខេត្តកំពង់ឆ្នាំង គឺលោក សំ ច័ន្ទគា មានប្រសាសន៍ថា ទង្វើរបស់មេភូមិជាអំពើខុសច្បាប់។ លោកថា មេភូមិពុំមានសិទ្ធិដកហូតដីធ្លីពីប្រជាពលរដ្ឋម្នាក់ទៅប្រគល់ឲ្យប្រជាពលរដ្ឋផ្សេងម្នាក់ទៀតនោះឡើយ។ អាជ្ញាធរភូមិឃុំមានសិទ្ធិត្រឹមតែប្ដឹងទាមទារអាជ្ញាធរថ្នាក់ស្រុក ឬថ្នាក់ខេត្តដកហូតយកដីនោះមកវិញ ប្រសិនបើនេះជាការកាន់កាប់ដោយបំពានលើដីអាកររបស់ឃុំ។

ចំពោះករណីខាងលើនេះ លោកថា ដោយការកាន់កាប់នេះបានមកពីការទិញដូរដែលមានអាជ្ញាធរភូមិធ្វើជាសាក្សីដឹងឮផងនោះ គឺជាការកាន់កាប់ដោយស្របច្បាប់។ ប្រជាពលរដ្ឋជាម្ចាស់ដីអាចប្ដឹងលោកមេភូមិទៅតុលាការ ឬទៅគណៈកម្មការសុរិយោដីពីបទប្រើអំពើហិង្សាក្នុងការរំលោភយកដីធ្លីរបស់ពួកគាត់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។