អ្នកច្បាប់របស់សង្គមស៊ីវិលមួយក្រុម ដែលពាក់ព័ន្ធនឹងកិច្ចការពារសិទ្ធិមនុស្សក្នុងប្រទេសកម្ពុជា បានធ្វើដំណើរទៅកាន់ស្រុកជីក្រែង ខេត្តសៀមរាប ចំនួន ២ថ្ងៃជាប់ៗគ្នា ដើម្បីរៀបចំឲ្យតំណាងភាគីជម្លោះដីស្រែប្រាំងជាង ៩០ហិកតារដ៏រ៉ាំរ៉ៃ រវាងអ្នកឃុំជីក្រែង និងឃុំអន្លង់សំណរ បានជួបជជែកគ្នាដោយសន្តិវិធី ដោយមានមន្ត្រីខេត្តសៀមរាបចូលរួមផង ក្នុងបំណងស្វែងរកការផ្សះផ្សាគ្នាផ្លូវច្បាប់ បញ្ចប់ជម្លោះដែលកើតមានយ៉ាងជូរចត់ និងអូសបន្លាយជាង ១ឆ្នាំកន្លងមកហើយ។
លោក គិត ទូច មន្ត្រីកម្មវិធីជាន់ខ្ពស់គម្រោងច្បាប់ដីធ្លី និងធនធានធម្មជាតិ របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) បានមានប្រសាសន៍កាលពីព្រឹកថ្ងៃច័ន្ទ ទី៦ ខែកញ្ញា ថា ក្រុមការងាររបស់លោក និងអង្គការដៃគូមួយចំនួនទៀត បានទៅកាន់ស្រុកជីក្រែង តាំងតែពីរសៀលថ្ងៃអាទិត្យ និងបន្តរហូតថ្ងៃច័ន្ទ ដើម្បីរៀបចំឲ្យមានការជួបជជែកទល់មុខគ្នា រវាងភាគីជម្លោះដីស្រែប្រាំងដ៏រ៉ាំរ៉ៃអ្នកឃុំជីក្រែង និងឃុំអន្លង់សំណរនោះ បានស្វែងយល់ពីគ្នា និងឈានទៅរកការផ្សះផ្សា ដើម្បីបញ្ចប់ជម្លោះនៅពេលខាងមុខ ព្រមទាំងឲ្យមានការដោះលែងតំណាងអ្នកឃុំជីក្រែងទាំងអស់ ដែលកំពុងជាប់ពន្ធនាគារក្នុងរឿងទំនាស់ដីធ្លីនោះផង។
លោក គិត ទូច បានមានប្រសាសន៍ថា លោកមានសុទិដ្ឋិនិយមច្រើនថា ជម្លោះដីធ្លីដ៏ក្ដៅគគុករវាងអ្នកឃុំជីក្រែង និងឃុំអន្លង់សំណរ អាចនឹងដោះស្រាយបញ្ចប់ទៅបាន ៖ «ទី១ហ្នឹង ដើម្បីឲ្យមានការសះជា ហើយឲ្យគូភាគីអាចពិចារណាបាន អំពីជម្រើសបញ្ចៀសជម្លោះទៅមុខ ដោយការជួសជុលតំបន់ថ្មី ខាងថ្នាក់ដឹកនាំខេត្តបានគិតកន្លងមកនេះ ហើយ មួយទៀតដើម្បីឲ្យគូភាគីហ្នឹងស្រាយចំណងក្តីព្រហ្មទណ្ឌទៅវិញទៅមក ដែលដក់ចងពាក្យគ្នា។ បទល្មើសព្រហ្មទណ្ឌ តាមគោលការណ៍ច្បាប់ គឺបទល្មើសខ្លះ បើសិនភាគីដកថយ អំណាចអាជ្ញាផ្លូវច្បាប់ដែលដាក់សង្កត់គូភាគី ក៏ស្រាយបានដែរ។ ឧទាហរណ៍បទល្មើសបរិហារកេរ្តិ៍ ឬក៏បទល្មើសផ្សេងៗទៀត គេហៅថា ការទាមទារសិទ្ធិស៊ីវិលនាំឲ្យចងពាក្យខាងផ្នែកអាជ្ញាច្បាប់ព្រហ្មទណ្ឌ»។
ភាគីជម្លោះខាងឃុំអន្លង់សំណរ និងឃុំស្ពានត្នោត ដែលធ្លាប់មានប្រៀបលើជម្លោះដីធ្លី ធ្វើឲ្យអ្នកឃុំជីក្រែងជាង ១០នាក់កំពុងជាប់ក្នុងពន្ធនាគារនៅឡើយនោះ ហាក់បង្ហាញជំហរថា ពួកគេក៏ចង់បានការផ្សះផ្សាដែលឈានទៅរកការបញ្ចប់ជម្លោះជាមួយអ្នកឃុំជីក្រែងនោះដែរ។
លោក លី សាវី ជាមនុស្សម្នាក់ក្នុងចំណោមតំណាងភាគីជម្លោះឃុំអន្លង់សំណរ ដែលធ្លាប់ដាក់ពាក្យបណ្ដឹងជាច្រើនប្រឆាំងអ្នកឃុំជីក្រែងនោះ បានមានប្រសាសន៍ថា ក្រុមរបស់លោកក៏ចង់បានការផ្សះផ្សាបញ្ចប់ជម្លោះដីស្រែប្រាំងជាង ៩០ហិកតារ នៅទំនប់៧៨សួងដែរ ហើយកាលពីល្ងាចថ្ងៃអាទិត្យក្រុមរបស់លោកបានដាក់លក្ខខណ្ឌ ៦ចំណុច ទៅឲ្យអ្នកឃុំជីក្រែងទទួលយកនៅក្នុងកិច្ចផ្សះផ្សា បើអ្នកឃុំជីក្រែងទទួលយកលក្ខខណ្ឌនោះ ភាគីខាងលោកប្រហែលជាពិចារណាក្នុងការដកបណ្ដឹងដែលប្រឆាំងនឹងអ្នកជីក្រែងនោះចេញពីតុលាការ។
លោក លី សាវី បានអះអាងថា ៖ «កុំឲ្យភាគីខាងណោះទៅបំពារបំពានលើដីឃុំអន្លង់សំណរនោះមួយចំនួន ហើយដីឃុំស្ពានត្នោតមួយចំនួននោះទៀត។ បើសិនជាឯកភាពលើគោលការណ៍ដែលដាក់ឲ្យពីម្សិលមិញនោះ ភាគីខាងខ្ញុំប្រហែលជាអាចដកពាក្យបណ្ដឹងនានា»។
អាជ្ញាធរខេត្តសៀមរាប បានបង្ហាញឆន្ទៈថា គេចង់ឃើញមានការផ្សះផ្សាបញ្ចប់ជម្លោះដីធ្លីដ៏រ៉ាំរ៉ៃ និងជូរចត់រវាងឃុំជីក្រែង និងអ្នកឃុំអន្លង់សំណរនោះដែរ។
លោក ស៊ូ ភិរិន្ទ អភិបាលខេត្តសៀមរាប បានមានប្រសាសន៍ថា លោកសប្បាយចិត្តនៅពេលដែលតំណាងភាគីទំនាស់បានជួបគ្នា ដើម្បីឈានទៅរកការបញ្ចប់ជម្លោះដែលអូសបន្លាយនោះ។ លោក ស៊ូ ភិរិន្ទ ចង់ឃើញការដោះស្រាយបញ្ចប់ជម្លោះមួយដែលល្អបំផុត ដើម្បីឲ្យអ្នករងគ្រោះបានទទួលផលប្រយោជន៍ពិតប្រាកដមួយ។
ជម្លោះដីស្រែប្រាំងជាង ៩០ហិកតារនៅទំនប់៧៨សួង ស្រុកជីក្រែង រវាងអ្នកឃុំជីក្រែង និងឃុំអន្លង់សំណរដ៏រ៉ាំរ៉ៃ ធ្វើឲ្យសមត្ថកិច្ចចម្រុះប្រើអាវុធបាញ់រះបង្ក្រាបទៅលើក្រុមអ្នកជីក្រែង កាលពីថ្ងៃទី២២ ខែមីនា ឆ្នាំ២០០៩ ដែលបណ្ដាលឲ្យអ្នកឃុំជីក្រែង ៤នាក់រងរបួស និងតំណាង ១២នាក់ទៀតកំពុងជាប់ពន្ធនាគាររហូតមកដល់បច្ចុប្បន្ន៕