ប្រជាពលរដ្ឋខ្មែរកម្ពុជាក្រោមទាំងនោះ គឺកំពុងរស់នៅក្នុងភូមិតឹងហ៊ឹង ស្រុកអណ្តូងទឹក ខេត្តឃ្លាំង ឬវៀតណាមហៅថា សុខតាំង នៅក្នុងដែនដីកម្ពុជាក្រោម ។
លោក វិនបា ជាពលរដ្ឋម្នាក់នៅក្នុងភូមិនោះនិងជាអ្នកដឹកនាំការតវ៉ា មានប្រសាសន៍ប្រាប់វិទ្យុអាស៊ីសេរី តាមទូរស័ព្ទឲ្យដឹងថា ៤ថ្ងៃមកនេះ ពលរដ្ឋអ្នកតវ៉ានៅរង់ចាំចម្លើយពីអាជ្ញាធរវៀតណាម នៅបន្ទាប់ពីពួកគាត់ជាង ៤០នាក់ បានទៅធ្វើការតវ៉ាដល់ទីស្នាក់ការក្រសួងគណៈអចិន្រ្តៃយ៍ គណៈកម្មការជនជាតិតំបន់ដែនដីទន្លេមេគង្គ របស់អាជ្ញាធរវៀតណាម នៅឯខេត្តឬក្រុងព្រែកឫស្សី ដែលវៀតណាមហៅថា គុនថឺ ។
លោក វិន បា បានឲ្យដឹងថា ៖ «កនខ្ញុំទៅនេះច្រើនដងមកហើយ ។ ពីថ្ងៃ ៥ ខែ ៥ ហ្នឹង ឡើងទៅដល់ថ្ងៃ៦ ខែ៥ ត្រឡប់មកវិញ ទៅហ្នឹងបាន ៤៥នាក់ ។ កនខ្ញុំទៅទាមទារហ្នឹងកាលឆ្នាំ៩៦ ទល់ឥឡូវ តែរឿងដីធ្លី ដីស្រែក៏មាន ដីចម្ការក៏មាន គេយកទៅធ្វើថ្នល់ ហើយដីស្រែ យកទៅធ្វើកន្លែងចិញ្ចឹមសត្វ ។ មានច្បាប់សងហើយ នៅខេត្តគេមិនសង ។ មុនដំបូងភូមិក៏គេមិនសង នៅស្រុកក៏គេមិនសង ហើយទៅខេត្តក៏គេមិនសង ហើយកនខ្ញុំតវ៉ាទៅក្រសួងជនជាតិ គេតំណាងឲ្យខ្មែរហ្នឹង គេហៅក្រសួងគណៈអចិន្ត្រៃយ៍ គណៈកម្មការជនជាតិតំបន់ដីទន្លេមេគង្គ» ។
លោក វិនបា បញ្ជាក់ថាពលរដ្ឋខ្មែរកម្ពុជាក្រោមចំនួនដល់ទៅ ៨០%នៅទូទាំងស្រុក អណ្តូងទឹក គឺថាតាំងពីឆ្នាំ១៩៧៨មក បានរងនូវការរឹបអូសយកដីធ្លីពីសំណាក់អាជ្ញាធរវៀតណាមដែលក្នុងមួយគ្រួសារៗអស់ដីម្នាក់ៗយ៉ាងតិចពី ១ហិកតាដល់ជាង ២០ហិកតាឯណោះ ។ កាលណោះអាជ្ញាធរវៀតណាមបានសន្យាថានឹងសងវិញ ប៉ុន្តែមកដល់ពេលនេះ នៅតែគ្មានសំណងទោះជាប្រាក់បន្តិចបន្តួចក្តី ។ ហេតុនេះហើយ ទើបពលរដ្ឋទាំងនោះនៅតែបន្តការទាមទារអស់ពេលជាង ២០ឆ្នាំមកនេះ ដើម្បីឲ្យបានដីដូនតារបស់ពួកគាត់មកវិញ ។
លោក វិនបា មានប្រសាសន៍ថាក្នុងការចេញតវ៉ាជាលក្ខណៈអហិង្សាម្តងៗ ពួកគាត់តែងរងនូវការគំរាមកំហែង រារាំងគ្រប់បែបយ៉ាង ពីសំណាក់អាជ្ញាធរវៀតណាម នៅស្ទើរគ្រប់ទីកន្លែង គឺថាអ្នកតវ៉ាម្នាក់ដែលបានទៅដល់កន្លែងតវ៉ា គឺជាតំណាងឲ្យពលរដ្ឋរងគ្រោះជាច្រើនគ្រួសារ ដែលបាត់បង់ដីធ្លីដូចគ្នានោះដែរ ។
លោក វិនបា បានឲ្យដឹងថា ៖ «ទៅហ្នឹងមាននគរបាលមានគេឃាត់ឃាំងស្ទះផ្លូវមិនឲ្យម៉ូតូ ឬក៏ឡានរត់បាន ។ ទៅសុទ្ធតែលួចទៅទេ បើសិនណាទៅហ្នឹងគេដឹងទៅយើងទៅ គេឃាត់មិនឲ្យយើងទៅទេ បើសិនណាយើងទៅឡានគេមិនឲ្យឡានទៅ ហើយបើទៅម៉ូតូគេចាប់ គេបង្ខាំងមិនឲ្យទៅ ។ ទៅនេះលួចទៅទេ បើតាមនិយាយទៅតំណាងឲ្យច្រើនគ្រួសារណាស់ ប៉ុន្តែទៅបានម្ដង ៣០-៤០គ្រួសារ ជួនអីទៅមិនបានច្រើន មានជាង ២០គ្រួសារក៏មានដែរ តំណាងឲ្យច្រើនណាស់» ។
លោក វិនបា បញ្ជាក់ថាតាំងពីពលរដ្ឋខ្មែរក្រោមបាត់បង់អស់នូវដីស្រែចម្ការដូនតារបស់ពួកគាត់មកនេះ គឺថាធ្វើឲ្យជីវភាពរស់នៅរបស់ពួកគាត់ជាទូទៅធ្លាក់ខ្លួនក្រីក្រតោកយ៉ាក គ្មានមុខរបរដែលអាចចិញ្ចឹមជីវិតឲ្យបានសមរម្យទៀតឡើយ ។ ហេតុនេះហើយទើបពួកគាត់មិនបោះបង់ការទាមទារនោះទេ ។ ពិសេសបើអាជ្ញាធរវៀតណាម នៅតែមិនព្រមដោះស្រាយសងដីដែលគេយកទៅចែកវៀតណាមគ្នាគេនោះ ឲ្យមកពួកគាត់វិញទេ ពួកគាត់នឹងព្យាយាមទៅកាន់ក្រសួងគណៈអចិន្រ្តៃយ៍ គណៈកម្មការជនជាតិតំបន់ដែនដីទន្លេមេគង្គ នៅទីក្រុងព្រែកឫស្សីនោះទៀត នាថ្ងៃទី៩ ខែមិថុនាខែក្រោយនេះ ដើម្បីទៅជំរុញឲ្យមានការដោះស្រាយសងជាសំណង ដល់ពលរដ្ឋខ្មែរកម្ពុជាក្រោមវិញ ។
វិទ្យុអាស៊ីសេរីព្យាយាមទាក់ទងទៅមន្រ្តីក្រសួងគណៈអចិន្រ្តៃយ៍គណៈកម្មការជនជាតិតំបន់ដែនដីទន្លេមេគង្គ របស់អាជ្ញាធរវៀតណាមនោះដែរ ដើម្បីសុំសេចក្តីបំភ្លឺពីបញ្ហានេះ ប៉ុន្តែទាក់ទងពុំទាន់បានទេនៅថ្ងៃចុងសប្តាហ៍ថ្ងៃសៅរ៍នេះ ៕