ការដែលមន្ត្រីសិទ្ធិមនុស្សតៃវ៉ាន់ ចុះជួបពលរដ្ឋនេះ គឺដោយសារតែក្រុមហ៊ុនតៃវ៉ាន់ មានភាគហ៊ុននៅក្នុងការវិនិយោគតំបន់នោះដែរ។
ប្រជាពលរដ្ឋរស់នៅភូមិចំនួន៣ ស្ថិតក្នុងឃុំជីខលើ ស្រុកស្រែអំបិល ខេត្តកោះកុង បានស្នើសុំឲ្យអង្គការសិទ្ធិមនុស្សតៃវ៉ាន់ ជំរុញទៅភាគីក្រុមហ៊ុនតៃវ៉ាន់ ដែលមានចំណែកភាគហ៊ុនជាមួយក្រុមហ៊ុនកោះកុង ស៊ូហ្គើរ របស់លោក លី យ៉ុងផាត់ ដោះស្រាយពីបញ្ហារំលោភសិទ្ធិដីធ្លីរបស់ពួកគាត់។
ប្រជាពលរដ្ឋរស់នៅភូមិត្រពាំងកណ្ដោល ឃុំជីខលើ លោក គង់ សុង បានឲ្យដឹងនៅថ្ងៃទី២៨ មករា ថា បញ្ហាទំនាស់ដីធ្លីរបស់ប្រជាពលរដ្ឋជាមួយក្រុមហ៊ុន កោះកុង ស៊ូហ្គើរ និងក្រុមហ៊ុនកោះកុង ផ្លានថេហ្សិន (Koh Kong Plantation Co., Ltd.) របស់លោក លី យ៉ុងផាត់ បានអូសបន្លាយតាំងពីឆ្នាំ២០០៦ មក។ លោកថា ដោយសារការអភិវឌ្ឍរបស់ក្រុមហ៊ុនដាំដើមអំពៅនេះ បានធ្វើឲ្យពលរដ្ឋ ២២០គ្រួសារ បាត់បង់ដីដំណាំចម្ការជិត ១.៥០០ហិកតារ ដោយការរឹបអូសយកដោយគ្មានសំណង និងខ្លះបានសំណងមិនសមរម្យ។
លោក គង់ សុង៖ «ខាងសិទ្ធិមនុស្សតៃវ៉ាន់ បានចុះមកសួរនាំពីបញ្ហាសហគមន៍ប៉ះពាល់ដីធ្លីរវាងក្រុមហ៊ុនកោះកុង ស៊ូហ្គើរ ហ្នឹង គាត់សន្យាថា ជួយដោះស្រាយជំរុញឲ្យខាងតៃវ៉ាន់នោះ ធ្វើការឲ្យបានត្រឹមត្រូវជាមួយប្រជាពលរដ្ឋ។ គេឲ្យមកវិនិយោគដើម្បីឲ្យប្រជាពលរដ្ឋមានការងារធ្វើមិនមែនឲ្យមករំលោភសិទ្ធិមនុស្សទេ»។
ការស្នើសុំរបស់អ្នកភូមិនេះ បន្ទាប់ពីមន្ត្រីអង្គការសង្គមស៊ីវិលផ្នែកសិទ្ធិមនុស្សតៃវ៉ាន់ កាលពីថ្ងៃទី១៦ មករា បានចុះទៅជួបសួរព័ត៌មានទាក់ទងការរំលោភសិទ្ធិដីធ្លីនេះជាមួយប្រជាពលរដ្ឋនៅភូមិជីខលើ ភូមិឈូក និងភូមិត្រពាំងកណ្ដោល ឃុំជីខលើ។ ប៉ុន្តែការចុះជួបជុំនេះពុំមានវត្តមានអាជ្ញាធរឡើយ។
អ្នកសម្របសម្រួលករណីស៊ើបអង្កេតរបស់មជ្ឈមណ្ឌលអប់រំច្បាប់សម្រាប់សហគមន៍ ហៅកាត់ថា CLEC លោក ម៉ម វុទ្ធី ដែលបានជូនមន្ត្រីសិទ្ធិមនុស្សតៃវ៉ាន់ ទៅដល់សហគមន៍បានថ្លែងថា មន្ត្រីសិទ្ធិមនុស្សតៃវ៉ាន់ និងជំរុញទៅក្រុមហ៊ុនតៃវ៉ាន់ ដែលពាក់ព័ន្ធឲ្យដោះស្រាយ។
លោកថា ពាក់ព័ន្ធនឹងការវិនិយោគជាមួយក្រុមហ៊ុនកោះកុង ស៊ូហ្គើរ របស់លោក លី យ៉ុងផាត់ នោះមានក្រុមហ៊ុនវីវង់ (Wevong) របស់តៃវ៉ាន់ មានភាគហ៊ុន ៣០% និងមួយភាគធំទៀតរបស់ក្រុមហ៊ុនថៃ ខេអេសអិល (KSL)៖ «គាត់ជាអង្គការសិទ្ធិមនុស្សគាត់មានប៉ុន្មានអង្គការនោះ នៅតៃវ៉ាន់ហ្នឹង គេធ្លាប់ធ្វើយុទ្ធនាការនៅមុខក្រុមហ៊ុននោះ។ ក្រុមហ៊ុនមកវិនិយោគនៅស្រុកខ្មែរ ហើយមករំលោភសិទ្ធិមនុស្សអីណា គេបញ្ជាក់ថា គេមកអង្កេត»។
ដោយសារការវិនិយោគបានធ្វើឲ្យប៉ះពាល់ដល់ពលរដ្ឋឃុំជីខលើ នោះ កាលពីខែកុម្ភៈ ឆ្នាំ២០០៧ ពួកគាត់បានដាក់ពាក្យបណ្ដឹងមួយទៅតុលាការខេត្តកោះកុង សុំរំលាយកិច្ចសន្យាសម្បទានដីសេដ្ឋកិច្ចរយៈពេល ៩៩ឆ្នាំ រវាងក្រសួងកសិកម្ម រុក្ខាប្រមាញ់ និងនេសាទ និងក្រុមហ៊ុនកោះកុង ស៊ូហ្គើរ កាលថ្ងៃទី១២ ខែសីហា ឆ្នាំ២០០៦ នោះវិញ ដោយសារសម្បទាននេះលើសពីច្បាប់ភូមិបាល ដែលបានកំណត់លើសពី ១ម៉ឺនហិកតារ និងដោយសារការសម្បទាននោះបានជាន់លើដីរបស់អ្នកភូមិ។ ប៉ុន្តែរហូតដល់ពេលនេះ ពលរដ្ឋអះអាងថា នៅមិនទាន់មានលទ្ធផលអ្វីនៅឡើយ។
វិទ្យុអាស៊ីសេរី មិនអាចទាក់ទង ប្រធានក្រុមប្រឹក្សាជំនុំជម្រះសាលាដំបូងខេត្តកោះកុង លោក ហេង កេះសារ៉ោ បានទេ នៅថ្ងៃទី២៨ មករា។
ប៉ុន្តែមេធាវីការពារក្ដីប្រជាពលរដ្ឋរបស់មជ្ឈមណ្ឌលអប់រំច្បាប់សម្រាប់សហគមន៍ លោកស្រី នី សោភ័ណនារី ថ្លែងថា ករណីបណ្ដឹងរបស់ពលរដ្ឋនេះ ថ្វីត្បិតតែមានភាពយឺតយ៉ាវបន្តិចមែន ប៉ុន្តែករណីនេះកំពុងស្ថិតនៅក្នុងដំណើរការនីតិវិធីរបស់តុលាការ ហើយថា ថ្មីៗនេះ តុលាការបានបង្គាប់ឲ្យភាគីទាំងពីរដាក់ភស្តុតាង និងរង់ចាំកាលកំណត់ពេលជំនុំជម្រះរឿងនេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។