លោក យឹម ផាន់ណា ជាអភិបាលស្រុកអន្លង់វែង។ លោកបានមានប្រសាសន៍នៅថ្ងៃទី២៥ មករា ថា ប្រជាពលរដ្ឋម្ចាស់ដីនៅតំបន់ត្រពាំងធំ និងជប់តាមោគ អាចសួរសំណួរផ្សេងៗទាក់ទងរឿងក្រុមហ៊ុន សំរោង រ៉ាប់ប៊័រ ឲ្យត្រាក់ទ័រឈូសដីប្រជាពលរដ្ឋនៅចំណុចត្រពាំងធំ និងជប់តាមោគ ជាមួយតំណាងក្រុមហ៊ុនផ្ទាល់តែម្ដងនៅថ្ងៃទី២៦ មករា ឆ្នាំ២០១២។
លោកអភិបាលស្រុកអន្លង់វែងបានឲ្យដឹងថា លោកបានបញ្ជាឲ្យក្រុមហ៊ុនបញ្ឈប់សកម្មភាពឈូសឆាយដី ហើយចូលរួមក្នុងតុចរចា ដែលមានភាគីពាក់ព័ន្ធនានាចូលរួមសិន ដើម្បីកុំឲ្យបញ្ហាឈូសឆាយដីនោះរីករាលដាលជាទំនាស់ធំ៖ «តាមពិតឃុំគេដោះស្រាយថ្ងៃមុនមួយជំហានហើយ ជាមួយក្រុមហ៊ុនថា សុំឲ្យក្រុមហ៊ុននោះដោះស្រាយតាមរូបមន្ត វាលស្បែកខ្លា តាមអនុសាសន៍របស់សម្ដេច ឬក៏ដោះដីកន្លែងណាឲ្យហើយជាមុនសិន ចាំអ្នកឯងឈូសឆាយក្នុងតំបន់អ្នកឯងអាស្រ័យផលនោះណា។ ហើយក្រុមហ៊ុនក៏បានឯកភាពលើចំណុចនេះដែរ»។
ក្រុមហ៊ុន សំរោង រ៉ាប់ប៊័រ បានចាប់ផ្ដើមឲ្យត្រាក់ទ័រក្រុមហ៊ុនចំនួន ៧គ្រឿង ដោយមានកងសន្តិសុខការពារមានអាវុធផង ឈូសឆាយដីអ្នកស្រុកនៅចំណុចត្រពាំងធំ និងជប់តាមោគ តាំងពីថ្ងៃទី២៣ មករា មកដល់ថ្ងៃទី២៥ ខែមករា។
គេហទំព័រក្រសួងកសិកម្មរុក្ខាប្រមាញ់ និងនេសាទ បានបង្ហាញឲ្យដឹងថា ក្រុមហ៊ុនសំរោង រ៉ាប់ប៊័រ បានទទួលដីសម្បទានសេដ្ឋកិច្ចពីរដ្ឋាភិបាលចំនួនជិត ១ម៉ឺនហិកតារ នៅក្នុងស្រុកវ៉ារិន ខេត្តសៀមរាប និងស្រុកអន្លង់វែង ខេត្តឧត្តរមានជ័រ ក្នុងរយៈពេល ៧០ឆ្នាំ ដើម្បីដាំកៅស៊ូ និងដំណាំឧស្សាហកម្មផ្សេងៗទៀត។
ដីដែលក្រុមហ៊ុនធ្វើការឈូសឆាយនោះ ជាកម្មសិទ្ធិរបស់ប្រជាពលរដ្ឋប្រមាណជាង ១០០គ្រួសារ ដែលរស់នៅក្នុងភូមិទួលទ្រាស ភូមិលំទងថ្មី ភូមិអូរគគីរ និងភូមិស្រឡៅស្រោង។ ភូមិទាំង៤ ស្ថិត នៅក្នុងឃុំលំទង ស្រុកអន្លង់វែង ខេត្តឧត្តរមានជ័យ។
ប្រជាពលរដ្ឋបានឲ្យដឹងថា ដីចម្ការទាំងអស់នៅចំណុចត្រពាំងធំ និងជប់តាមោគ នោះប្រជាពលរដ្ឋបានរុករានកាន់កាប់ធ្វើចម្ការតាំងពីឆ្នាំ២០០០ និង២០០១ មកម្ល៉េះ គឺក្រោយពេលអតីតកងទ័ពខ្មែរក្រហមបានធ្វើសមាហរណកម្មចូលក្នុងសង្គមជាតិ។
ប្រជាពលរដ្ឋមួយរូប ឈ្មោះ មៀច នៀវ ដែលមានដីចម្ការប្រមាណ ៧ហិកតារ នៅក្នុងចំណុចដែលត្រាក់ទ័រក្រុមហ៊ុនសំរោង រ៉ាប់ប៊័រ បានឈូសឆាយ។ លោកបាននិយាយឲ្យដឹងថា ត្រាក់ទ័រក្រុមហ៊ុនចាប់ផ្ដើមឈូសឆាយដីចម្ការអ្នកស្រុកកាលពីថ្ងៃទី២៣ មករា។ នៅថ្ងៃទី២៤ មករា ប្រជាពលរដ្ឋម្ចាស់ដីប្រមាណ ៦០នាក់បានមកប្រមូលផ្ដុំគ្នាឃាត់កុំឲ្យត្រាក់ទ័រក្រុមហ៊ុនឈូសដីចម្ការរបស់គាត់។ តែអ្នកបើកត្រាក់ទ័រក្រុមហ៊ុនមិនបានឈប់ឈូសឡើយ។ នៅថ្ងៃទី២៥ មករា ប្រជាពលរដ្ឋបានប្រមូលផ្ដុំគ្នាបានច្រើនជាងមុនកើនដល់ ១៦០នាក់មកឃាត់ត្រាក់ទ័រក្រុមហ៊ុន កុំឲ្យឈូសដីចម្ការរបស់គាត់។ មិនមានអំពើហិង្សាកើតឡើងទេ បើទោះបីជាអ្នកស្រុកម្ចាស់ដីមានចំនួនច្រើន ហើយ កងសន្តិសុខការពារត្រាក់ទ័រ ក្រុមហ៊ុនមានអាវុធក៏ដោយ។
លោក មៀច នៀវ៖ «ក្រុមហ៊ុននោះប្រុងឲ្យលុយមួយហិកតារ ១០០។ ប្រជាជនមិនព្រមទេឲ្យ ១០០នោះ។ រួចឆ្នាំក្រោយបានអីហូបមិនដាច់បាយស្លាប់ហើយទេ ព្រោះរស់ដោយសារដីស្រែដីចម្ការតែប៉ុណ្ណឹងនោះ។ បើសិនជាក្រុមហ៊ុនគេថា ឲ្យលុយប៉ុណ្ណឹងមិនយក គេនៅតែធ្វើ មានតែប្រឆាំងនេះឯង»។
លោក ជន រៈ ជាមេឃុំលំទង បានមានប្រសាសន៍ថា ការជួបចរចាទល់មុខគ្នារវាងប្រជាពលរដ្ឋម្ចាស់ដីជាង ១០០គ្រួសារជាមួយតំណាងក្រុមហ៊ុន និងមានការចូលរួមរបស់អាជ្ញាធរជាឱកាសមួយដែលម្ចាស់ដីមានសិទ្ធិសួរតំណាងក្រុមហ៊ុនអំពីចម្ងល់នានាទាក់ទងដីចម្ការ បស់ពួកគាត់៖ «ជំនួបនេះឲ្យអស់ចិត្តប្រជាពលរដ្ឋ ហើយទាំងក្រុមហ៊ុនអស់ចិត្តទាំងអស់គ្នា។ កុំឲ្យថា អាជ្ញាធរមិនដោះស្រាយ ពីព្រោះប្រជាពលរដ្ឋភាគច្រើនគាត់មានផ្ទះ និងមានដីនៅកន្លែងនោះមួយចំនួនធំ»។
លោក មេឃុំ មានការបារម្ភថា បើសិនជាការដោះស្រាយនោះ មិនបានត្រឹមត្រូវ វាអាចបង្កឲ្យមាន ទំនាស់កាន់តែធំ។
លោក ឆាង ឃឿន ជាតំណាងក្រុមហ៊ុនសំរោង រ៉ាប់ប៊័រ នៅខេត្តឧត្តរមានជ័យ។ លោកបានមានប្រសាសន៍នៅថ្ងៃទី២៥ មករា ថា លោកចូលរួមចរចាជាមួយអ្នកស្រុកម្ចាស់ដីនៅថ្ងៃទី២៦ មករា ដោយមានអាជ្ញាធរចូលរួមផងដែរ។
លោកបានឲ្យដឹងថាកន្លងមកតាមគោលការណ៍ក្រុមហ៊ុន គឺកាលណាប៉ះដីអ្នកស្រុក គឺក្រុមហ៊ុនមានសងសំណង៖ «ក្រុមហ៊ុនកន្លងមករយៈពេល ២ ទៅ ៣ ឆ្នាំមុននោះណា ធ្លាប់ជួបបុស្ស និងដីដែលមានដំណាំអីផ្សេងៗ ដែលគាត់ដាំនោះណា។ ក្រុមហ៊ុនមានទម្លាប់ដោះស្រាយឲ្យ ១ហិកតារ ៤០ម៉ឺនរៀល»។
ប្រជាពលរដ្ឋមួយរូប ឈ្មោះ ផា នី ជាម្ចាស់ដីនៅតំបន់ឈូសឆាយបានឲ្យដឹងថា លោកស្រីមិនទទួលយកប្រាក់សំណងក្នុង ១ ហិកតារ ចំនួន ១០០ដុល្លារអាមេរិកនោះឡើយ។ លោកស្រីបានឲ្យដឹងថា ដីមានទំនាស់នោះមានទំហំធំយ៉ាងតិចក៏ ៥០០ ហិកតារដែរ។
លោក ស្រី ណារ៉េន ជាប្រធានសាខាសមាគមការពារសិទ្ធិមនុស្សឈ្មោះ អាដហុក នៅខេត្តឧត្តរមានជ័យ បានមានប្រសាសន៍ថា ទំនាស់ដីរវាងក្រុមហ៊ុនសំរោង រ៉ាប់ប៊័រ ឈូសឆាយដីអ្នកស្រុក នៅចំណុចត្រពាំងធំ និងជប់តាមោគ នៅក្នុងឃុំលំទងនេះ ក្រុមហ៊ុនត្រូវសិក្សាផលប៉ះពាល់ មុនពេលធ្វើការឈូសឆាយដី ដើម្បីជៀសវាងកុំឲ្យមានទំនាស់ជាមួយប្រជាពលរដ្ឋ នៅតំបន់ដែលក្រុមហ៊ុនត្រូវវិនិយោគទុនអភិវឌ្ឍន៍។
លោក ស្រី ណារ៉េន៖ «ទោះបីជាគាត់មាន ស.ជ.ណ. និងមានឯកសារផ្សេងៗក៏ដោយ ក៏ត្រូវតែមានការវាយតម្លៃផលប៉ះពាល់ប្រជាពលរដ្ឋជាមុន ហើយមួយទៀតត្រូវដោះស្រាយសំណងប្រជាពលរដ្ឋសិន។ មុនឈានទៅដល់ការឈូសឆាយដីរបស់ប្រជាពលរដ្ឋហ្នឹង»។
ប្រភពលោកមេឃុំលំទងបានឲ្យដឹងថា ក្រុមហ៊ុនសំរោង រ៉ាប់ប៊័រ មានគម្រោងឈូសឆាយដីក្នុងតំបន់អភិវឌ្ឍន៍របស់ខ្លួនឲ្យបាន ១០០ហិកតារក្នុងឆ្នាំ២០១២ នេះ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។