ពលរដ្ឋរស់នៅឃុំកំពង់ដំរី ប្រមាណ ៧០០គ្រួសារ កំពុងមានក្ដីព្រួយបារម្ភខ្លាចបាត់បង់ដីកសិកម្មរបស់ពួកគាត់ដែលកំពុងបង្កបង្កើនផល ដោយសារក្រុមហ៊ុនអភិវឌ្ឍន៍ដំណាំកៅស៊ូឈ្មោះ កាស្ទីន រំលោភយក។
លោក នួន ប៊ុនធី ជាតំណាងពលរដ្ឋរស់នៅឃុំកំពង់ដំរី ស្រុកឆ្លូង ខេត្តក្រចេះ។ លោកបានឲ្យដឹងថា សព្វថ្ងៃនេះក្រុមហ៊ុនកាស្ទីន បានដាក់ពង្រាយកម្លាំងប្រដាប់អាវុធ មានឯកសណ្ឋានជាទាហាន និងប៉ូលិស មកហាមពលរដ្ឋមិនឲ្យចូលធ្វើចម្ការ ឬប្រមូលផលដំឡូងទេ ដោយបានគំរាមចាប់ខ្លួនពលរដ្ឋដាក់គុកច្រវាក់ថែមទៀត។
ចំណែកពលរដ្ឋមកពី ៤ភូមិទៀត គឺភូមិប្រមា ស្រែចំផឹង ភូមិកំពង់ឈើទាល និងច្រកដំបង ក្នុងឃុំកំពង់ដំរី ស្រុកឆ្លូង ខេត្តក្រចេះ។ ពួកគាត់បានស្នើទៅលោកនាយករដ្ឋមន្ត្រី ហ៊ុន សែន ជួយមានវិធានការទៅម្ចាស់ក្រុមហ៊ុនកាស្ទីន ដើម្បីឲ្យពលរដ្ឋអាចចូលប្រមូលផលដំណាំដំឡូង និងបានបង្កបង្កើនផលលើដីចម្ការធ្លាប់បង្កបង្កើនផលតាំងពីមុនឆ្នាំ២០០៦ មកឡើងវិញ។
ប្រជាពលរដ្ឋបន្ថែម៖ «សម្ដេច ហ៊ុន សែនជួយដោះស្រាយឲ្យប្រជាពលរដ្ឋព្រោះគ្មានកន្លែងទីពឹងណាទៀតទេ ព្រោះអស់ហើយ។ សម្ដេចជួយដោះស្រាយ ឲ្យប្រជាពលរដ្ឋផង ព្រោះប្រជាពលរដ្ឋពិបាកវេទនាណាស់ឥឡូវនេះ។ កម្លាំងក្រុមហ៊ុនគេយាមមិនឲ្យកាប់ដំឡូងជាដើម។ ប្រជាពលរដ្ឋចង់បានតែដីភូមិ ដីចម្ការដើម្បីរស់នៅ»។
ប្រជាពលរដ្ឋបានឲ្យដឹងថា ដីដែលកំពុងមានទំនាស់ជាមួយក្រុមហ៊ុនកាស្ទីន ពួកគាត់ធ្លាប់ប្រមូលផ្ដុំគ្នាតវ៉ាម្ដងហើយ កាលពីដើមខែមករា ឆ្នាំ២០១២ នៅមុខទីស្នាក់ការក្រុមហ៊ុនកាស្ទីន ស្ថិតក្នុងស្រុកឆ្លូង ខេត្តក្រចេះ ប៉ុន្តែមិនមានមន្ត្រីផ្នែកណាមួយចេញមុខមកជួយដោះស្រាយទេ។
ទាក់ទងបញ្ហានេះ អាជ្ញាធរមូលដ្ឋានឃុំកំពង់ដំរី ស្រុកឆ្លូង បានទទួលស្គាល់ថា ក្រុមហ៊ុនកាស្ទីន ពិតជាបានដាក់ពង្រាយកម្លាំងប្រដាប់អាវុធ ហាមពលរដ្ឋមិនឲ្យប្រមូលផលកសិកម្មកំពុងបង្កបង្កើនផលពិតមែន។
លោក ជា ចីម ជាមេភូមិប្រមា ស្ថិតក្នុងឃុំកំពង់ដំរី ស្រុកឆ្លូង ខេត្តក្រចេះ។ លោកបានទទួលស្គាល់ ថា កម្លាំងប្រដាប់អាវុធចម្រុះ ពិតជាបានហាមមិនឲ្យពលរដ្ឋក្នុងមូលដ្ឋាននេះចូលប្រមូលផលដំណាំពួកគាត់ពិតមែន។ លោកថាមូលដ្ឋានលោក យ៉ាងហោចក៏មានពលរដ្ឋប្រមាណ ២០០គ្រួសារដែរកំពុងរងផលប៉ះពាល់ពីការរំលោភដីធ្លី។
លោក ជា ចីម បន្ថែម៖ «មកវាស់ដីយកឃ្លាតពីភូមិប្រហែលជា ១គីឡូកន្លះ ស្ទើរអស់ដីប្រជាពលរដ្ឋហើយ។ សុទ្ធតែដីស្វាយ ដីដាំដំឡូង ដីដាំស្វាយចន្ទី ប្រកបអាជីវកម្មបានផលទៅហើយ»។
លោកបន្តថា ទំនាស់នេះ វាហួសពីសមត្ថកិច្ចថ្នាក់មូលដ្ឋានរកដំណោះស្រាយ ដែលទាមទារឲ្យក្រសួង ឬស្ថាប័នថ្នាក់ជាតិ ជួយមានវិធានការ និងជួយសម្រួលដល់ការរស់នៅរបស់ប្រជាពលរដ្ឋ។
លោក ឆេង ឆ័ត្រ ជាជំទប់ទី២ ឃុំកំពង់ដំរី ស្រុកឆ្លូង ខេត្តក្រចេះ។ លោកក៏បានឲ្យដឹងដែរថា ក្រុមហ៊ុនកាស្ទីន ពិតជាបានធ្វើសកម្មភាពរំលោភយកដីកសិកម្ម របស់ប្រជាកសិករ នាមូលដ្ឋានឃុំកំពង់ដំរី ពិតមែន។ ប៉ុន្តែលោកថា ទង្វើរបស់ក្រុមហ៊ុន អាជ្ញាធរឃុំគ្មានលទ្ធភាពទប់ស្កាត់ទេ។
ចំណែក លោក សូម សារិទ្ធ អភិបាលស្រុកឆ្លូង ខេត្តក្រចេះ។ លោកថ្លែងថា មិនទាន់ទទួលបានព័ត៌មានជុំវិញទំនាស់ដីធ្លី រវាងពលរដ្ឋឃុំកំពង់ដំរី និងក្រុមហ៊ុនកាស្ទីន ឬក្រុមហ៊ុនពាក់ព័ន្ធផ្សេងទៀត រំលោភដីធ្លីពលរដ្ឋនោះទេ។ ប៉ុន្តែករណីនេះ លោកនឹងពិនិត្យមើលឡើងវិញ៖ «ខ្ញុំអត់ទាន់បានដឹង បានជ្រាបព័ត៌មានហ្នឹងផង»។
យ៉ាងនេះក្តី លោក តាន់ ឡាង ជាតំណាងក្រុមហ៊ុនកាស្ទីន បានបដិសេធថា ក្រុមហ៊ុនមិនបានប្រើកម្លាំងប្រដាប់អាវុធគំរាមចាប់ចងពលរដ្ឋនោះទេ។ ប៉ុន្តែលោកទទួលស្គាល់ថា ក្រុមហ៊ុនបានហាមពលរដ្ឋមិនឲ្យចូលធ្វើចម្ការពិតមែន ព្រោះដីនោះជាដីរបស់ក្រុមហ៊ុនដែលទទួលបានដីសម្បទានសេដ្ឋកិច្ច ពីរដ្ឋាភិបាលសម្រាប់អភិវឌ្ឍន៍ដំណាំកៅស៊ូ។
លោក តាន់ ឡាង តំណាងក្រុមហ៊ុនកាស្ទីន ឲ្យដឹងដូច្នេះ៖ «ព័ត៌មានមិនពិតទេ តែគ្រាន់ថាថ្ងៃនេះក្រុមហ៊ុនដើរបាញ់ថ្នាំក្នុងព្រៃ ហើយប្រជាជនដាំដំឡូងលើដីក្រុមហ៊ុន ប៉ុន្តែក្រុមហ៊ុនមិនទាន់ធ្វើអ្វីទាំងអស់»។
ទោះជាបែបនេះក្ដី លោកនាយករដ្ឋមន្ត្រី ហ៊ុន សែន កាលពីថ្ងៃទី៣១ ខែមករា ឆ្នាំ២០១២ នាខេត្តមណ្ឌលគីរី។ លោកបានព្រមានដកសិទ្ធិពីម្ចាស់ក្រុមហ៊ុនទទួលបានដីសម្បទានសេដ្ឋកិច្ចពីរដ្ឋាភិបាលទាំងឡាយណា ដែលប្រើហិង្សាលើប្រជាពលរដ្ឋ និងបានធ្វើសកម្មភាពរំលោភយកដីបង្កបង្កើនផលប្រជាពលរដ្ឋ មិនឲ្យធ្វើសកម្មភាពនោះទេ។
លោក ហ៊ុន សែន៖ បានថ្លែងដូច្នេះ៖ «និយាយដល់ករណីបាញ់បោះជាមួយប្រជាពលរដ្ឋ ក្រុមហ៊ុននានាស្ដាប់ឲ្យច្បាស់ កន្លែងណាពាក់ព័ន្ធនឹងប្រជាជនផ្អាកធ្វើកន្លែងហ្នឹង។ ខ្ញុំចេះតែឆ្ងល់ៗត្រង់ថា ដីធ្វើសម្បទានឲ្យ ៧ពាន់ហិកតារ ឯដីពាក់ព័ន្ធនឹងប្រជាជនមានត្រឹម ៥០០ទេ។ ហេតុអីមិនទៅធ្វើអា ៦.៥០០ វាមកធ្វើចំតែកន្លែងទាស់គ្នាហ្នឹង។ បើសិនជាចាំបាច់យើងនឹងដកដីសម្បទានទាំងអស់ពីក្រុមហ៊ុនណាដែលប្រើហិង្សាចំពោះប្រជាជនមិនអាចទទួលយកបានទេ»។
ប៉ុន្តែទោះប្រមុខដឹកនាំព្រមានបែបណាក្ដី ក៏គេសង្កេតឃើញថា សកម្មភាពរបស់ក្រុមហ៊ុនមួយចំនួន បានបន្តធ្វើសកម្មភាព ដោយប្រើគ្រឿងចក្រ និងប្រើកម្លាំងប្រដាប់អាវុធ ដើម្បីការពារសកម្មភាពឈូសឆាយរំលោភយកដីកសិកម្មរបស់ប្រជាពលរដ្ឋ តាមខេត្តក្រុងមួយចំនួន មិនទាន់ស្រាកស្រាន្តនៅឡើយទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។