ប្រជាពលរដ្ឋជាង ២០០នាក់ បានប្រមូលផ្ដុំគ្នានៅតាមបណ្ដោយផ្លូវជាតិលេខ៧៨ កាលពីព្រឹកថ្ងៃទី២២ ខែឧសភា ឆ្នាំ២០១២ ដើម្បីការពារតំណាងរបស់ខ្លួនពីការចាប់ខ្លួនរបស់អាជ្ញាធរ និងទាមទារឲ្យអាជ្ញាធរចែកដីឲ្យពួកគាត់។
តំណាងពលរដ្ឋលោកស្រី រិទ្ធិ វណ្ណី មានប្រសាសន៍ថា ដើមហេតុនៃទំនាស់ដីធ្លីមកពីអាជ្ញាធរស្រុកកោះញែក និងមន្ត្រីជាន់ខ្ពស់ខេត្តជាអ្នកអនុញ្ញាតឲ្យពួកគាត់រស់នៅ ជាថ្នូរនឹងការជូនជាសគុណ។
លោកស្រីបន្តថា ដល់ពេលពលរដ្ឋមករស់នៅច្រើន អាជ្ញាធរខេត្តបែរជាគំរាមកំហែង បង្ខិតបង្ខំឲ្យពលរដ្ឋចេញទៅវិញ ដោយសំអាងថា ជាដីរបស់ក្រុមហ៊ុន៖ «គំរាមកំហែង ហើយឲ្យពួកយើងរុះរើផ្ទះចេញ។ កាលដំបូងខេត្ត និងអភិបាលស្រុកមកពិនិត្យ មានទាំងសុរិយោដីមកដល់ទីកន្លែងផ្ទាល់ទៀត»។
លោកស្រី រិទ្ធិ វណ្ណី បន្តថា អាជ្ញាធរខេត្តមានកំលាំងចម្រុះរាប់រយនាក់ចុះរុះរើខ្ទមពលរដ្ឋ ថែមទាំងស្វែងរកចាប់ខ្លួនលោកស្រីទៀត។
ប្រជាពលរដ្ឋឈ្មោះ សំ ញ៉ បានប្រាប់ថា ផ្ទះរបស់លោកស្រីត្រូវបានអាជ្ញាធររុះរើកាលពីបីថ្ងៃមុន។លោកស្រីបន្តថា ក្រុមមន្ត្រីគេគិតតែផលប្រយោជន៍របស់ក្រុមហ៊ុនប៉ុណ្ណោះ៖ «ប្រជាពលរដ្ឋវេទនាយ៉ាងនេះ ... ដើម្បីយួនគេដេញខ្ញុំ គេរុញខ្ញុំនិងចៅខ្ញុំអាយុ ១ខួបកន្លះ»។
ទាក់ទងនឹងបញ្ហានេះ មន្ត្រីនាំពាក្យសាលាខេត្តមណ្ឌលគិរី លោក យូរ ចន្ធី មានប្រសាសន៍ថា ការមករស់នៅរបស់ពលរដ្ឋក្នុងតំបន់នេះ ជាការរំលោភលើដីរបស់ក្រុមហ៊ុន។ លោកបន្តថា ដោយឃើញមានការពុះកញ្ជ្រោលចង់បះបោរ ទើបអាជ្ញាធរខេត្តដាក់កំលាំងចម្រុះត្រៀមទប់ទល់ចំនួនជាង ៦០នាក់៖ «គ្រាន់តែស្រង់អត្តសញ្ញាណច្បាស់លាស់ហើយជម្រាបជូនបងប្អូនកុំឲ្យផ្ដេសផ្ដាស ពលរដ្ឋមកថ្មីទាំងអស់ រស់នៅលើដីក្រុមហ៊ុន»។
ទោះជាយ៉ាងនេះក្តី មន្ត្រីនគរបាលនៅកន្លែងកើតទំនាស់ឲ្យដឹងថា កំលាំងសរុបរបស់ក្រុមខ្លួនមានរហូតដល់ជាង ៣០០នាក់ មកត្រៀមបង្ក្រាបពលរដ្ឋមានវិវាទដីនៅតំបន់ស្រយ៉។
មន្ត្រីអង្កេតសមាគមការពារសិទ្ធិមនុស្សអាដហុក ខេត្តមណ្ឌលគិរី លោក ង៉ូវ មេងសួន មានប្រសាសន៍ថា រឿងនេះច្បាស់ជាមានអ្នកបង្ក ព្រោះប្រជាពលរដ្ឋមិនអាចមករស់នៅដោយចិត្តឯងនៅលើដីនោះបានឡើយ។
លោកបន្តថា អាជ្ញាធរខេត្តគួរណាស់តែដោះស្រាយតាំងពីដំបូងទើបល្អ៖ «គួរណាស់តែអាជ្ញាធរគាត់មានវិធានការច្បាស់លាស់តាំងពីដំបូង មិនចាំបាច់មកដល់ពេលនេះគាត់មានវិធានការទេ។ អាជ្ញាធរខេត្តមិនគួរពង្រាយកំលាំងលើពលរដ្ឋទេ គួរដោះស្រាយបញ្ហាដោយសន្តិវិធី»។
យ៉ាងណាក៏ដោយ អាជ្ញាធរខេត្តមណ្ឌលគិរី និងខេត្តស្ទឹងត្រែង បានកំណត់យកថ្ងៃទី២៥ ខែឧសភា ជាថ្ងៃចុងក្រោយនៃការរស់នៅតំបន់ដែលមានទំនាស់នោះ។
រដ្ឋាភិបាលបានផ្ដល់ដីសម្បទាននៅតំបន់ស្រយ៉ ទៅឲ្យក្រុមហ៊ុនវៀតណាម ចំនួន៤ មានក្រុមហ៊ុន ដែលមានផ្ទៃដីចំនួនជិត ៤ម៉ឺនហិកតារ។ ក្នុងនោះទំហំដីដែលពាក់ព័ន្ធមានជាង ១.០០០ហិកតារ។
កាលពីដើមខែឧសភា រាជរដ្ឋាភិបាលកម្ពុជា លោក ហ៊ុន សែន បានចេញបទបញ្ជាសំខាន់រួមដែល ផ្អាកផ្ដល់សម្បទានដីសេដ្ឋកិច្ច ពិនិត្យដកហូតដីសម្បទាន ដែលក្រុមហ៊ុនមួយចំនួនបានអនុវត្តខុសគោលការណ៍ ដូចជាប៉ះពាល់ដីធ្លីសហគមន៍ និងជីវភាពរស់នៅរបស់ប្រជាពលរដ្ឋ និងវិធានការពង្រឹង បង្កើនប្រសិទ្ធភាពនៃការគ្រប់គ្រងសម្បទានដីសេដ្ឋកិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។