ពលរដ្ឋនៅរតនគិរីអំពាវនាវឲ្យមានការត្រួតពិនិត្យសកម្មភាពឈូសឆាយដី
sr.mp3
ប្រជាពលរដ្ឋសហគមន៍ជនជាតិដើមភាគតិចចារ៉ាយ រស់នៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី នៅថ្ងៃសៅរ៍ ទី១៦ ខែមិថុនា ឆ្នាំ២០១២ អំពាវនាវជាថ្មីសុំឲ្យអាជ្ញាធរខេត្ត និងស្ថាប័នពាក់ព័ន្ធ ប្រញាប់ចុះត្រួតពិនិត្យទៅលើសកម្មភាពឈូសឆាយដីសម្បទានរបស់ក្រុមហ៊ុនវៀតណាម ឈ្មោះ ដាយ ឌឹង យឿង មានភាគហ៊ុនគ្នាជាមួយក្រុមហ៊ុនខ្មែរឈ្មោះ ចិតសិបបួន (74) ដែលនៅតែបន្តឈូសឆាយពង្រីកមកលើដីពលរដ្ឋនៅតំបន់ព្រៃការពារកាន់តែច្រើនឡើង ដោយមិនមានសមត្ថកិច្ចណាទប់ស្កាត់ឡើយ។
សេចក្ដីអំពាវនាវនេះធ្វើឡើងបន្ទាប់ពីប្រជាពលរដ្ឋសហគមន៍ការពារព្រៃឈើភូមិឡំ ជាង ២០នាក់ បានលើកគ្នាទៅរារាំងសកម្មភាពក្រុមហ៊ុនកំពុងឈូសឆាយពង្រីកដីជាថ្មីទៀត កាលពីថ្ងៃព្រហស្បតិ៍ ទី១៤ មិថុនា កន្លងទៅនេះ ក៏ប៉ុន្តែមិនមានអំពើហិង្សាអ្វីកើតមាននោះទេ។ ទន្ទឹមនេះប្រជាសហគមន៍ភូមិឡំ ២២០គ្រួសារ បានផ្ដិតមេដៃប្ដឹងករណីនេះសុំទៅរាជរដ្ឋាភិបាលជួយដោះស្រាយបញ្ហានេះ។
តំណាងប្រជាពលរដ្ឋលោក រម៉ាស់ ស្វាត មានប្រសាសន៍បញ្ជាក់ថា អ្នកភូមិតម្រូវឲ្យគ្រឿងចក្របញ្ឈប់ការឈូសឆាយជាបណ្ដោះអាសន្ន ដើម្បីរង់ចាំក្រុមអាជ្ញាធរពាក់ព័ន្ធចុះត្រួតពិនិត្យកំណត់ព្រំដីសម្បទានច្បាស់លាស់ និងបញ្ឈប់សកម្មភាពឈូសឆាយយកដីប្រជាពលរដ្ឋ និងដីតំបន់ព្រៃឈើសហគមន៍ការពារ។
លោកបន្តថា ក្រុមហ៊ុនបានរំលោភកិច្ចព្រមព្រៀងស្ដីពីការកាត់ផលប៉ះពាល់ដល់ប្រជាពលរដ្ឋ៖ «ឈូសអស់ព្រៃហ្នឹង ព្រៃហ្នឹងព្រៃឈើធំៗ វាប៉ះពាល់ដីគេការពារដែរ។ គេថា ចាំរាយការណ៍ទៅចៅហ្វាយស្រុក ចៅហ្វាយស្រុកគេថា ចាំចាត់ប៉ូលិសប៉េអឹម គេទៅឃាត់តាំងពីមិនទាន់បោះឆ្នោតមកណា! តាំងពីថ្ងៃហ្នុង ខាងក្រុមហ៊ុនគេមកកាប់រហូតៗ អត់ឃើញគេទៅឃាត់ទៅអីទេ»។
កាលពីដើមខែឧសភា ឆ្នាំ២០១២ មន្ត្រីអាជ្ញាធរឃុំប៉ក់ញ៉ៃ និងប្រជាសហគមន៍ភូមិឡំ បានចោទប្រកាន់ និងលើកគ្នាចុះហាមឃាត់ក្រុមហ៊ុនសម្បទានដីសេដ្ឋកិច្ចរបស់វៀតណាម មួយនេះ ដែលបានឈូសឆាយមកលើដីពលរដ្ឋនៅតំបន់ព្រៃការពារភ្លូវង អស់ចំនួន ២០ហិកតារ និងព្រៃស្រោងមួយចំណែកផ្សេងទៀត នៅចំណុចភូមិឡំ និងភូមិប៉ក់តូច ឃុំប៉ក់ញៃ ស្រុកអូរយ៉ាដាវ ជាប់ព្រំដែនប្រទេសកម្ពុជា និងវៀតណាម។ ហើយបន្ទាប់មកប្រជាពលរដ្ឋ និងមន្ត្រីមូលដ្ឋានបានធ្វើសេចក្ដីរាយការណ៍ជូនអាជ្ញាធរពាក់ព័ន្ធខេត្តរតនគិរី ដើម្បីចុះត្រួតពិនិត្យករណីនេះ។
ជំទប់ទី២ ឃុំប៉ក់ញ៉ៃ លោក ពូយ ព្លុំ មានប្រសាសន៍បញ្ជាក់ថា អាជ្ញាធរស្រុកអូរយ៉ាដាវ បានសន្យាថា នឹងចាត់មន្ត្រីចុះត្រួតពិនិត្យករណីនេះ ក៏ប៉ុន្តែរហូតបច្ចុប្បន្នមិនឃើញមានក្រុមសមត្ថកិច្ចណាចុះទៅកាន់ទីតាំងឈូសឆាយដីនោះទេ។ លោកបន្តថា ក្រុមហ៊ុនកំពុងរំលោភឈូសឆាយដីតំបន់ព្រៃឈើ ដើម្បីពង្រីកដីសម្បទានអស់ប្រមាណ ២០០ ទៅ ៣០០ហិកតារ ហើយនាពេលបច្ចុប្បន្នទើបប្រជាពលរដ្ឋចាត់វិធានការចុះទប់ស្កាត់ករណីនេះដោយខ្លួនឯង។
លោក ពូយ ព្លុំ៖ «អត់មានដោះស្រាយអ្វីទេ ខ្ញុំបញ្ជូនលើកមុន ខ្ញុំមកនិយាយជាមួយគេ គេថា ខ្លួនគេទៅដោះស្រាយ ទៅដេញប្រជាពលរដ្ឋមិនឲ្យទៅទេ។ គេថា ដល់អ៊ីចឹងទៅគេឈូសខ្ទេចខ្ទីជិតដល់ពីរបីរយហិកតារថែមទៀត»។
វិទ្យុអាស៊ីសេរីនៅថ្ងៃសុក្រ ទី១៦ ខែមិថុនា ឆ្នាំ២០១២ មិនអាចស្វែងរកអាស័យដ្ឋានក្រុមហ៊ុន ដាយ ឌឹង យឿង ដើម្បីបញ្ជាក់សេចក្ដីចោទប្រកាន់ពីអ្នកភូមិបានទេ។
យ៉ាងនេះក្តី នាយរងខណ្ឌរដ្ឋបាលព្រៃឈើខេត្តរតនគិរី លោក ផាន់ ភីន មានប្រសាសន៍បញ្ជាក់ថា ក្រុមសមត្ថកិច្ចជំនាញកំពុងរៀបចំសមាសភាពក្រុមការងារចុះទៅតំបន់នោះនាពេលឆាប់ៗនេះហើយ។ ជាពិសេសដើម្បីអនុវត្តបទបញ្ជាប្រមុខរាជរដ្ឋាភិបាល កាលពីពេលថ្មីៗទាក់ទិនទៅនឹងការអនុវត្តផ្ដល់ដីសម្បទានដល់ក្រុមហ៊ុននានា និងការកាត់ចេញផលប៉ះពាល់។
លោក ផាន់ ភីន៖ «ពីរបីថ្ងៃទៀតគេចុះហើយ អ៊ីចឹងបានថា ទ្រាំបន្តិចបង! ការងារហ្នឹងយើងធ្វើម្ដងឲ្យចប់តែម្ដង ព្រោះរដ្ឋាភិបាលចេញបញ្ជាមកអ៊ីចឹងណា! វាមានកាត់ដីទុកឲ្យតំណាងសហគមន៍កាត់ដីឲ្យប្រជាពលរដ្ឋឲ្យអស់តែម្ដង»។
លោកនាយករដ្ឋមន្ត្រី ហ៊ុន សែន កាលពីថ្ងៃទី១៤ ខែមិថុនា ឆ្នាំ២១០២ បានប្រកាសបញ្ជាឲ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ច័ន្ទ សារុន ដកហូត ឬកាត់ដីសម្បទានសេដ្ឋកិច្ច នៅទូទាំងប្រទេសកម្ពុជា ដែលបានធ្វើឲ្យប្រជាពលរដ្ឋបាត់បង់ដីស្រែ និងចំការកន្លងមក។ ក្នុងនោះលោកក៏បានបញ្ជាក់ឡើងវិញពីការកាត់ចេញដីព្រៃស្រោងដែលមានក្នុងបរិវេណដីសម្បទាននោះដែរ៕
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
