លោក អ៊ូច ឡេង ជាអ្នកជំនាញឯករាជ្យស្រាវជ្រាវទំនាស់ដីធ្លីនៅកម្ពុជា មានប្រសាសន៍ថា លោកស្វាគមន៍ការចុះវាស់ដីរបស់មន្ត្រីរដ្ឋាភិបាល និងនិស្សិតស្ម័គ្រចិត្តនេះ។ ប៉ុន្តែលោកមានជំនឿថា ប្រជាពលរដ្ឋប្រហែលមានការងឿងឆ្ងល់ជាមិនខាន ពីព្រោះប្រជាពលរដ្ឋមិនបានទទួលព័ត៌មានជាក់លាក់ជាមុនថា តើគោលដៅរបស់ក្រុមនេះ មកធ្វើអ្វី? តើការវាស់នោះ ចំណេញដល់ពួកគាត់ ឬខាត?
លោក អ៊ូច ឡេង៖ «ការវាស់នេះ វាមិនដឹងថា វាស់រកដីប៉ះពាល់ ឬថាវាស់យ៉ាងម៉េច វាអត់មានលក្ខណៈច្បាស់លាស់។ វាមិនដឹងគោលការណ៍ច្បាស់លាស់ថា តើវាស់ដីប៉ះពាល់ ឬក៏វាស់ដើម្បីដោះស្រាយដីទំនាស់ដីធ្លី? ហើយក្រុមហ៊ុនមួយចំនួន យើងវាស់ក្នុងមួយក្រុមហ៊ុន វាស់៣ដង ឬ៤ដង។ អ៊ីចឹង គេមានរបាយការណ៍អំពីការវាស់វែងហើយ ម៉េចមិនមានការដោះស្រាយ? ដូចជាក្រុមហ៊ុន ស៊ី.អាយ.វី (CIV) អីជាដើម។ មានការវាស់វែងតាំងពីជាមួយក្រុមហ៊ុន ជាមួយ អ៊ិន.ជី.អូ (NGO) វាស់វែងពីក្រុមការងារចម្រុះអីជាដើម។ ប៉ុន្តែ សរុបមកការវាស់វែងនោះ បានត្រឹមតែវាស់វែង អត់បានដោះស្រាយអីទាំងអស់»។
លោក អ៊ូច ឡេង មានប្រសាសន៍ថា ក្រុមចុះវាស់ដីទាំងនោះ គួរយកចិត្តទុកដាក់ទៅវាស់នៅកន្លែងដែលមានទំនាស់ដីរវាងក្រុមហ៊ុនធំៗជាមួយប្រជាពលរដ្ឋកន្លងមក ហើយមានកន្លែងខ្លះ មានការតវ៉ារហូតដល់បិទផ្លូវជាតិ បណ្ដាលឲ្យស្ទះចរាចរណ៍ទៀតផង។
កាលពីថ្ងៃទី២៦ មិថុនា លោកនាយករដ្ឋមន្ត្រី ហ៊ុន សែន បានជួបសំណេះសំណាលជាមួយនិស្សិតស្ម័គ្រចិត្តចំនួនជាង ១.០០០នាក់ ដែលបានស្ម័គ្រចិត្តទៅចូលរួមវាស់ដីជាមួយមន្ត្រីជំនាញក្រសួងរៀបចំដែនដី នគរូបនីយកម្ម និងសំណង់ នៅតាមបណ្ដាខេត្តមួយចំនួនរបស់កម្ពុជា។
លោកនាយករដ្ឋមន្ត្រីមានប្រសាសន៍ថា ដីដែលត្រូវចុះវាស់ មានដីព្រៃសម្បទាន ដីសម្បទាន និងដីកាន់កាប់ដោយខុសច្បាប់ ហើយបន្ទាប់មក វាស់លើដីសម្បទានសង្គមកិច្ចរបស់រដ្ឋជាបន្តទៀត។
លោកនាយករដ្ឋមន្ត្រីកម្ពុជា បានប្រកាសថា ការវាស់ដីនេះជាយុទ្ធនាការធ្វើកម្មសិទ្ធិដីទ្រង់ទ្រាយធំមួយ ដែលមានមនុស្សជាង ១.០០០នាក់ចូលរួម។ ការចុះវាស់ដីនេះ ដើម្បីចេញកម្មសិទ្ធិបឋមជូនប្រជាពលរដ្ឋ ហើយក្រោយមក ប្រជាពលរដ្ឋអាចយកកម្មសិទ្ធិដីបឋមនេះ ទៅដូរយកកម្មសិទ្ធិកាន់កាប់ផ្លូវការនៅពេលក្រោយ។
លោក ហ៊ុន សែន សង្ឃឹមថា ក្រោយពេលប្រជាពលរដ្ឋបានកម្មសិទ្ធិដីនេះ ពួកគេនឹងដាំដំណាំបង្កបង្កើនផល និងសង់លំនៅឋានច្រើនជាមិនខាន ពីព្រោះប្រជាពលរដ្ឋមានសំអាងថា ពួកគាត់បានក្លាយជាម្ចាស់ដី ដែលពួកគាត់កាន់កាប់រាល់ថ្ងៃនេះ តាមផ្លូវច្បាប់ហើយ។
លោកនាយករដ្ឋមន្ត្រីបានអះអាងថា ការចំណាយសម្រាប់ក្រុមនិស្សិតស្ម័គ្រចិត្តចំនួនជាង ១.០០០នាក់នេះ គឺលោកចំណាយលុយផ្ទាល់ខ្លួន។
ទាក់ទងជាមួយការចុះទៅវាស់ដីរបស់មន្ត្រីក្រសួងរៀបចំដែនដី នគរូបនីយកម្ម និងសំណង់ និងនិស្សិតជាង ១.០០០នាក់នេះ លោក ប៉េង ហុងសុជាតិខេម៉ារូ អគ្គនាយករង និងជាអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា ក្រុមយុវជនស្ម័គ្រចិត្តនោះ ចុះទៅវាស់ដីនៅ ១៦ខេត្ត ក្នុងចំណោមខេត្ត រាជធានី ទាំង២៤ នៅប្រទេសកម្ពុជា។ ខេត្តទាំង១៦នោះ ជាខេត្តដែលមានដីសម្បទានសេដ្ឋកិច្ច។
លោក ប៉េង ហុងសុជាតិខេម៉ារូ ឲ្យដឹងថា មុខងារសំខាន់របស់ក្រុមនិស្សិតស្ម័គ្រចិត្ត ដែលទៅចូលរួមវាស់ដីនោះ គឺបញ្ជាក់អត្តសញ្ញាណម្ចាស់ដី។
អ្នកនាំពាក្យរបស់ក្រសួងរៀបចំដែនដី នគរូបនីយកម្ម និងសំណង់ ឲ្យដឹងថា នៅថ្ងៃទី២៨ មិថុនា ក្រុមនិស្សិតស្ម័គ្រចិត្តទី១ មានចំនួន ៧៣០នាក់ ត្រូវចេញដំណើរទៅមុន។ នៅសល់ក្រុមទី២ ជាង ៧០០នាក់ទៀត និងចេញដំណើរនៅចុងសប្ដាហ៍នេះ។
លោកនាយករដ្ឋមន្ត្រី ហ៊ុន សែន មានប្រសាសន៍កាលពីថ្ងៃទី២៦ មិថុនា ថា នៅក្នុងយុទ្ធនាការវាស់ដី ចែកប័ណ្ណកម្មសិទ្ធិឲ្យប្រជាពលរដ្ឋដែលកាន់កាប់ដីនេះ គឺមិនត្រូវបន្សល់ឲ្យមានបញ្ហាទំនាស់រឿងព្រំដី ក្រោយពេលក្រុមវាស់ដីបានបញ្ចប់ការងារ ហើយដកមកវិញឡើយ។ លោក ហ៊ុន សែន បានប៉ាន់ស្មានថា ក្នុងយុទ្ធនាការនេះមានដីប្រមាណ ១លាន២សែនហិកតារ ត្រូវបែងចែកដល់អ្នកកាន់កាប់ បើគិតជាគ្រួសារវិញ មានចំនួនប្រមាណ ៣០ម៉ឺនគ្រួសារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។