ប្រជាពលរដ្ឋប្រមាណ ១០០នាក់ ដែលមានទំនាស់ដីធ្លីជាមួយអ្នកមានអំណាច និងក្រុមហ៊ុនមកពីខេត្តក្រុងចំនួន ១៥ ក្នុងប្រទេសកម្ពុជា បានថ្លែងអស់សង្ឃឹមចំពោះអាជ្ញាធរដែនដី និងស្ថាប័នពាក់ព័ន្ធថា អសមត្ថភាពមិនអាចដោះស្រាយឲ្យពួកគាត់ទទួលបានយុត្តិធម៌ ហើយពលរដ្ឋបែរជារងការចោទប្រកាន់ពីតុលាការ និងចាប់ខ្លួនជាបន្តបន្ទាប់ទៅវិញ។
លោក សឿ យ៉ារ៉ាត ជនជាតិដើមភាគតិចទំពួន រស់នៅភូមិសាយ៉ស់លើ ឃុំកាឡែង ស្រុកលំផាត់ ខេត្តរតនគិរី បានថ្លែងថា ទំនាស់ដីធ្លីរបស់អ្នកភូមិ ២៣គ្រួសារ លើផ្ទៃដីចំនួន ២៣០ហិកតារ ត្រូវបានក្រុមហ៊ុន ឌី.អឹម គ្រុប មកឈូសឆាយយកតាំងពីឆ្នាំ២០០៦។ ហើយនៅឆ្នាំ២០០៩ រូបគាត់ផ្ទាល់ត្រូវបានមន្ត្រីប៉ូលិសយាមដីឲ្យក្រុមហ៊ុនបាញ់ឲ្យបាក់ជើង នៅពេលចូលទៅធ្វើចម្ការលើដីទំនាស់ ប៉ុន្តែពុំមានការជួយអន្តរាគមន៍ពីមន្ត្រីស្ថាប័នណាមួយឡើយ។
លោកមានប្រសាសន៍បន្តដូច្នេះ ៖ «មើលតែជើងខ្ញុំទៅ អត់មានភូតទេ ជាក់ស្ដែងគឺក្រុមហ៊ុន ឌី.អឹម គ្រុប បាញ់ខ្ញុំ រហូតគេថា អង្គការអាដហុក សិទ្ធិមនុស្សហ្នឹងជាអ្នកស្ល ខាងពួកអាស៊ីសេរីជាមាន់អាំង។ អាជ្ញាធរដែនដី តុលាការ ក្រសួង គ្រប់ស្ថាប័ន អភិបាលស្រុក មេឃុំ មេភូមិ ខ្ញុំថា អត់សង្ឃឹមទេ ខ្ញុំលើកដៃសំពះ ពីព្រោះពុករលួយខ្លាំងណាស់ តុលាការថា ខ្ញុំអត់ដឹងទេរឿងក្រុមហ៊ុន»។
ពលរដ្ឋម្នាក់ទៀតមកពីឃុំដូនបា ស្រុកគាស់ក្រឡ ខេត្តបាត់ដំបង គឺអ្នកស្រី ហែម សុខន បានឲ្យដឹងដែរថា អ្នកភូមិចំនួន ៥រូប ដែលក្នុងនោះមានអ្នកស្រីម្នាក់ដែរ ត្រូវបានតុលាការចេញដីកាកោះហៅ តែឥឡូវពួកគាត់កំពុងគេចខ្លួន ៖ «មិនដោះស្រាយទេ អ្នកមានលុយមានអំណាច បើគេដាក់ពាក្យប្ដឹងប្រជាពលរដ្ឋ គឺគេទទួលលឿនណាស់ ស្រាប់តែគេកសាងសំណុំរឿងថា យើងប៉ះពាល់កម្មសិទ្ធិឯកជន»។
ការថ្លែងដូច្នេះ នៅក្នុងសន្និសីទសារព័ត៌មានមួយស្ដីពីការចោទប្រកាន់ការចាប់ខ្លួនអ្នកក្រីក្រក្នុងរឿងទំនាស់ដីធ្លី កាលពីថ្ងៃព្រហស្បតិ៍ ទី២ មិថុនា នៅទីស្នាក់ការសមាគមអាដហុក រាជធានីភ្នំពេញ។
ឆ្លើយតបបញ្ហានេះ អ្នកនាំពាក្យក្រសួងរៀបចំដែនដីនគរូបនីយកម្ម និងសំណង់ លោក បេងហុង សុជាតិខេមរ៉ូ បានថ្លែងថា សព្វថ្ងៃនេះរដ្ឋាភិបាលបានបង្កើតឲ្យមានយន្តការដោះស្រាយទំនាស់ដីធ្លីជាច្រើន ក៏ប៉ុន្តែដោយសារបញ្ហាថវិកា និងខ្វះធនធានមនុស្សទើបបង្កឲ្យមានភាពយឺតយ៉ាវក្នុងការដោះស្រាយបញ្ហាដីធ្លី។
លោក បេងហុង សុជាតិខេមរ៉ូ បន្តដូច្នេះ ៖ «រាជរដ្ឋាភិបាលតាមរយៈក្រសួងរៀបចំដែនដីហ្នឹង គឺយើងបានបង្កើតក្រុមចល័តដើម្បីជំរុញការងារហ្នឹង។ ក្រុមចល័តងាយស្រួលក្នុងការចុះទៅជួយកន្លែងដែលមានបញ្ហាហ្នឹងឯង។ ប្រជាពលរដ្ឋគាត់អាចទាក់ទងតាមការិយាល័យសុរិយោដីហ្នឹង ពីគណៈកម្មការរដ្ឋបាលមូលដ្ឋាន»។
របាយការណ៍សមាគមអាដហុក បានឲ្យដឹងថា ក្នុងរយៈពេលប៉ុន្មានខែដើមឆ្នាំ២០១១ យ៉ាងហោចណាស់មានពលរដ្ឋចំនួន ១២៤នាក់ ត្រូវបានតុលាការចេញដីកាកោះ និងចោទប្រកាន់ពីបទព្រហ្មទណ្ឌ ហើយក្នុងនោះមាន ៣៦នាក់ត្រូវបានចាប់ខ្លួន និង ១៨នាក់កំពុងជាប់ឃុំក្នុងពន្ធនាគារ និង ៨៨នាក់ទៀតកំពុងរត់គេចខ្លួនពីការតាមចាប់របស់តុលាការក្នុងរឿងទំនាស់ដីធ្លី។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក ចាន់ សុវ៉េត មានប្រសាសន៍ថា ការចោទប្រកាន់អ្នកភូមិក្រីក្រ និងស្លូតត្រង់ពីបទព្រហ្មទណ្ឌរបស់តុលាការ តាមការស៊ើបអង្កេតរបស់លោកបានរកឃើញថា ធ្វើឡើងដោយអយុត្តិធម៌ដោយសារតែពលរដ្ឋពុំមានលទ្ធភាពគ្រប់គ្រាន់ក្នុងការការពារខ្លួនតាមច្បាប់ ៖ «គឺខ្ញុំចង់ទទូចទៅរដ្ឋាភិបាល ក៏ដូចជា NGOក្នុងស្រុកដែរ ពួកគាត់មានដីកាមានអីគាត់ត្រូវការអង្គការជាតិ និងអន្តរជាតិ គួរតែចាប់អារម្មណ៍នោះ យើងនឹងសហការគ្នាដើម្បីធ្វើការ»។
តំណាងអ្នកភូមិជិត ៦០នាក់ មានវិវាទដីធ្លីជាមួយក្រុមហ៊ុន និងអ្នកមានអំណាចមកពីខេត្តចំនួន ១៥ ដូចជាខេត្តកណ្ដាល ព្រៃវែង កំពង់ស្ពឺ កំពង់ឆ្នាំង បាត់ដំបង ព្រះវិហារ ជាដើម បាននាំគ្នាផ្ដិតមេដៃដាក់ញត្តិទៅស្ថាប័នពាក់ព័ន្ធមួយចំនួន ដូចជាអង្គភាពប្រឆាំងអំពើពុករលួយ និងអ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្ស ដើម្បីស្វែងរកការជួយអន្តរាគមន៍ផ្ដល់យុត្តិធម៌ និងដោះស្រាយជូនពួកគាត់៕