ការប្រមូលផ្ដុំគ្នារបស់សហគមន៍ទាំងនោះ គឺដើម្បីទាក់ទាញឲ្យមានការចាប់អារម្មណ៍ពីសំណាក់នៃមេដឹកនាំកំពូលៗលើពិភពលោក ដែលមកចូលរួមប្រជុំកំពូលអាស៊ាន ជាពិសេសប្រធានាធិបតីសហរដ្ឋអាមេរិក ដើម្បីជំរុញរដ្ឋាភិបាលកម្ពុជា ឲ្យគោរពសិទ្ធិមនុស្ស និងបញ្ឈប់ការបណ្ដេញពលរដ្ឋចេញពីលំនៅឋាន និងដីធ្លីរបស់ពួកគេ។
ប្រជាសហគមន៍ប្រមាណ ២០០នាក់ ឈរនៅលើវាលខ្សាច់ដែលក្រុមហ៊ុនបានបូមពន្លិចផ្ទះរបស់អ្នកភូមិបឹងកក់ ស្រែកអំពាវនាវដល់មេដឹកនាំនៃបណ្ដាប្រទេសដែលអញ្ជើញចូលរួមប្រជុំកំពូលអាស៊ានសុំឲ្យជួយពួកគេ។
អ្នកស្រី ទេព វន្នី ឲ្យដឹងនៅថ្ងៃទី១៨ វិច្ឆិកា ថា អ្នកភូមិពិតជាពិបាកក្នុងការរង់ចាំចំណាត់ការនៃការដោះស្រាយបញ្ហាដីធ្លី និងលំនៅឋានរបស់ពួកគាត់ខ្លាំងណាស់។ ដូច្នេះអ្នកភូមិមកជួបប្រជុំគ្នាថ្ងៃអាទិត្យនេះ គឺប្រាថ្នាទាមទារឲ្យមេដឹកនាំពិភពលោកជួយដោះស្រាយបញ្ហារបស់ពួកគាត់ផង ជាពិសេសប្រធានាធិបតីសហរដ្ឋអាមេរិក លោក បារ៉ាក់ អូបាម៉ា ធ្វើយ៉ាងណាជំរុញរដ្ឋាភិបាលឲ្យបញ្ឈប់សកម្មភាពរំលោភសិទ្ធិមនុស្សផ្សេងៗតាមរយៈការផ្ដល់ដីសម្បទានសេដ្ឋកិច្ច ដើម្បីអភិវឌ្ឍដែលធ្វើឲ្យពលរដ្ឋរងទឹកភ្នែក។
ម្យ៉ាងទៀត អ្នកស្រីអះអាងថា អ្នកស្រីចង់ឃើញរដ្ឋាភិបាលឈប់យកតុលាការធ្វើឧបករណ៍ដើម្បីចាប់សកម្មជនដីធ្លីដាក់គុក៖ «ពួកខ្ញុំមិនអាចរង់ចាំនូវការដោះស្រាយដ៏រ៉ាំរ៉ៃរបស់រដ្ឋាភិបាលកម្ពុជាទៀតទេ ព្រោះពួកខ្ញុំរស់នៅវេទនាណាស់។ បើសិនជានៅតែបន្តអាដំណោះស្រាយរ៉ាំរ៉ៃ ហើយមានតែការលាបពណ៌ និងការប្រើអំពើហិង្សា និងការប្រើប្រាស់តុលាការដែលមិនឯករាជ្យនោះធ្វើបាបពួកខ្ញុំ ពួកខ្ញុំនឹងស្លាប់នៅថ្ងៃណាមួយជាមិនខាន។ ដូច្នេះខ្ញុំដាក់អក្សរ SOS នេះ ដើម្បីឲ្យគាត់ជួយសង្គ្រោះជីវិតពួកខ្ញុំតែម្ដង ជាពិសេសលោក ប៉ារ៉ាក់ អូបាម៉ា និងលោកជំទាវ ហ៊ីលឡារី គ្លីនតុន ត្រូវតែដោះស្រាយជំរុញរដ្ឋាភិបាល ដោះស្រាយជម្លោះគ្រប់សព្វបែបយ៉ាងនៅតំបន់បឹងកក់ និងបុរីកីឡា ក៏ដូចជាតំបន់ផ្សេងៗដែលកំពុងមានបញ្ហា»។
ទាក់ទងនឹងកិច្ចប្រជុំកំពូលអាស៊ាននេះដែរ អ្នកស្រី ទេព វន្នី លើកឡើងថា អ្នកស្រីចង់ឲ្យការជួបប្រជុំគ្នារបស់មេដឹកនាំកំពូលៗនេះជំរុញឲ្យមានភាពប្រសើរឡើងនូវលទ្ធិប្រជាធិបតេយ្យ និងការគោរពសិទ្ធិមនុស្សនៅក្នុងតំបន់អាស៊ាន។
ឆ្លើយតបបញ្ហានេះ អ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា រដ្ឋាភិបាលសុំឲ្យពលរដ្ឋមានបញ្ហាដីធ្លីទាំងនោះគួរប្រើប្រព័ន្ធតុលាការ ដើម្បីដោះស្រាយជាជាងប្រើមធ្យោបាយធ្វើបាតុកម្ម៖ «ការទាមទារធ្វើកូដកម្ម បាតុកម្មនេះ ដូចជាមិនទាន់ឃើញប្រសិទ្ធភាពនៅឡើយ គួរតែប្រើប្រាស់នូវមធ្យោបាយផ្សេងទៀត តាមរយៈពេល តាមរយៈអីហ្នឹងល្អជាជាង»។
ភ្ជាប់នឹងការធ្វើបាតុកម្មនេះដែរ អាជ្ញាធរបានដាក់កំលាំងគ្រប់ច្រកចេញចូលនៃសហគមន៍បឹងកក់ ភូមិ២២ សង្កាត់ស្រះចក ខ័ណ្ឌដូនពេញ រាជធានីភ្នំពេញ ដើម្បីរារាំងកុំឲ្យប្រជាសហគមន៍ដង្ហែក្បួនចេញក្រៅភូមិ។
ភ្ជាប់នឹងការធ្វើបាតុកម្មនេះដែរ អាជ្ញាធរបានដាក់កម្លាំងរាប់រយនាក់គ្រប់ច្រកចេញចូលនៃសហគមន៍បឹងកក់ ភូមិ២២ សង្កាត់ស្រះចក ខណ្ឌដូនពេញ រាជធានីភ្នំពេញ ដើម្បីរារាំងកុំឲ្យប្រជាសហគមន៍ដង្ហែក្បួនចេញក្រៅភូមិ។
អ្នកភូមិបានឈរតម្រៀបគ្នាជាជួរ ហើយអ្នកខ្លះដៃកាន់បដាចំនួនពីផ្ទាំងធំៗ ដែលមានបិទរូបថតលោកប្រធានាធិបតីសហរដ្ឋអាមេរិក លោក បារ៉ាក់ អូបាម៉ា និងរូបអ្នកស្រី ហ៊ីឡារី គ្លីនតុន (Hillary Clinton) ព្រមទាំងសរសេរអក្សរ SOS ដែលជាសញ្ញាប្រកាសអាសន្នសុំឲ្យគេជួយ។ អ្នកភូមិបានលើកផ្ទាំងបដានោះឡើងខ្ពស់ បែរមុខទៅកាន់ទីស្ដីការគណៈរដ្ឋមន្ត្រី។
តំណាងសហគមន៍ចំនួន ៤ មកពីតំបន់ខុសគ្នារួមមាន ទី១ សហគមន៍ភូមិថ្មគោល ជាប់អាកាសយានដ្ឋានអន្តរជាតិភ្នំពេញ សង្កាត់ចោមចៅ ខណ្ឌពោធិ៍សែនជ័យ ដែលប្រឈមនឹងការបាត់បង់លំនៅឋានឥតសំណងដោយសារគម្រោងពង្រីកអាកាសយានដ្ឋាន ទី២ សហគមន៍ ៣៤៧ ស្ថិតនៅភូមិ ៣ សង្កាត់បឹងកក់ ខណ្ឌទួលគោក ដែលមានជាង ១០០គ្រួសារ នឹងត្រូវបាត់បង់លំនៅឋានដោយសារការពង្រីកផ្លូវ ទី៣ សហគមន៍បឹងកក់ និងទី៤ សហគមន៍បុរីកីឡា។
ទោះយ៉ាងណា ប្រធានកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា មានប្រសាសន៍ថា ការធ្វើបាតុកម្មទាមទារយុត្តិធម៌របស់ប្រជាសហគមន៍នេះ ទំនងជាពួកគេអស់ជំនឿទៅលើប្រព័ន្ធយុត្តិធម៌នៃប្រទេសកម្ពុជា ទើបពួកគាត់អំពាវនាវសុំកិច្ចអន្តរាគមន៍ពីសំណាក់ប្រទេសដទៃ។ លោកបន្តថា សកម្មភាពតវ៉ារបស់ពលរដ្ឋនេះ អាចធ្វើឲ្យប៉ះពាល់ដល់មុខមាត់រដ្ឋាភិបាលលើឆាកអន្តរជាតិ។
ទាក់ទងនឹងការរំលោភសិទ្ធិមនុស្សនេះដែរ នៅថ្ងៃទី១៨ វិច្ឆិកា មជ្ឈមណ្ឌលសិទ្ធិមនុស្សកម្ពុជា ចេញសេចក្ដីថ្លែងការណ៍មួយ ស្វាគមន៍លោកប្រធានាធិបតីសហរដ្ឋអាមេរិក បារ៉ាក់ អូបាម៉ា (Barack Obama) និងសម្ដែងជំនឿយ៉ាងមុតមាំថា ការអញ្ជើញមកទស្សនកិច្ចរបស់លោកប្រធានាធិបតីនៅកម្ពុជា នេះ នឹងនាំមកនូវភាពប្រសើរឡើងនៃបញ្ហារំលោភសិទ្ធិធ្ងន់ធ្ងរនៅប្រទេសមួយនេះ ជាពិសេសការរំលោភសិទ្ធិមនុស្ស ដែលបណ្ដាលមកពីការផ្ដល់ដីសម្បទានសេដ្ឋកិច្ច និងការរឹតត្បិតសេរីភាពបញ្ចេញមតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។