ភូមិប្រម៉ា ស្ថិតក្នុងស្រុកឆ្លូង ខេត្តក្រចេះ គឺជាទីតាំងទំនាស់ដីមួយដ៏ខ្លាំងក្លា រវាងអ្នកភូមិជាមួយក្រុមហ៊ុនកាស៊ូទីម ដែលរដ្ឋាភិបាលបានចោទប្រកាន់ថា អ្នកភូមិនៅតំបន់នោះមានបំណងបង្កើតតំបន់អបគមន៍។ បន្ទាប់មក រដ្ឋាភិបាលបានបង្ក្រាប និងធ្វើឲ្យកុមារីម្នាក់ស្លាប់ ដោយត្រូវគ្រាប់កាំភ្លើងកងកម្លាំងរដ្ឋាភិបាល កាលពីខែឧសភា កន្លងទៅ។
អ្នកភូមិជិត២០គ្រួសារ នៅភូមិប្រម៉ា ក្នុងឃុំកំពង់ដំរី ស្រុកឆ្លូង ខេត្តក្រចេះ ស្នើសុំឲ្យអាជ្ញាធរ និងក្រុមនិស្សិត ពន្យល់ពីមូលហេតុដែលពួកគេមិនវាស់វែងដីទំនាស់រវាងអ្នកភូមិជាមួយក្រុមហ៊ុនកាស៊ូទីម នៅគ្រាដែលទំនាស់ដីធ្លីជាមួយក្រុមហ៊ុន នេះ ជាឫសគល់រឿងនៃការចោទថា អ្នកភូមិបង្កើតតំបន់អបគមន៍។
អ្នកភូមិប្រម៉ា ម្នាក់ឈ្មោះ ណែត ធារ៉ា ឲ្យដឹងនៅថ្ងៃទី២២ ខែសីហា ថា អ្នកភូមិជិត២០គ្រួសារនៅភូមិប្រម៉ា ដែលមានទំនាស់ដីធ្លីជាមួយក្រុមហ៊ុនចំនួន២ គឺក្រុមហ៊ុនកាស៊ូទីម និងក្រុមហ៊ុន ប៊ុន ចាន់សុភា ងឿងឆ្ងល់ចំពោះសកម្មភាពចុះវាស់វែងដីធ្លីរបស់អាជ្ញាធរ និងក្រុមនិស្សិត។ ពួកគេវាស់វែងតែដីលំនៅឋានរបស់អ្នកភូមិ ដែលមានទំនាស់ដីធ្លីជាមួយក្រុមហ៊ុន ប៊ុន ចាន់សុភា ប៉ុណ្ណោះ។ រីឯដីចម្ការដំឡូងរបស់អ្នកភូមិ ដែលក្នុងមួយគ្រួសារមានទំហំ៥ហិកតារ កំពុងមានទំនាស់ជាមួយក្រុមហ៊ុនកាស៊ូទីម ក្រុមនិស្សិតមិនបានចុះវាស់វែងនោះទេ៖ «ចាន់សុភា ធ្វើប្លង់ឲ្យខ្ញុំហើយៗ។ ប៉ុន្តែ ក្រុមហ៊ុនកាស៊ូទីម ដីចម្ការខ្ញុំ ហើយទៅមើលដំឡូងខ្ញុំលេចៗក្បាលអស់ហើយ ហើយគេថារបស់គេ»។
លោកបន្តថា ក្រុមនិស្សិតបានចាកចេញពីតំបន់ភូមិប្រម៉ា នោះហើយ កាលពីពេលថ្មីៗនេះ បន្ទាប់ពីពួកគេបញ្ចប់ការវាស់វែងដីទំនាស់រវាងអ្នកភូមិជាមួយក្រុមហ៊ុន ប៊ុន ចាន់សុភា។ លោកបញ្ជាក់ថា មូលហេតុដំបូងដែលនាំឲ្យមានការចោទប្រកាន់ថាមានការបង្កើតតំបន់អបគមន៍ គឺផ្ដើមចេញពីការជួយការពារដីអ្នកភូមិ ពីការរំលោភយករបស់ក្រុមហ៊ុនកាស៊ូទីម នេះឯង។ ហើយអ្នកជួយ គឺលោក ប៊ុន រដ្ឋា បែរជាត្រូវជាប់ចោទថា ជាអ្នកចង់បំបែករដ្ឋទៅវិញ៖ «ចោទថាអបគមន៍វាខុស ៣ ឬ៤នាក់អបគមន៍កើត? ហើយប៉ូលិស ទាហាន ច្រូងច្រាងហើយហ្នឹងមិនអបគមន៍ទេ?»។
លោក ប៊ុន រដ្ឋា បានផ្តល់បទសម្ភាសន៍ដល់វិទ្យុអាស៊ីសេរី ថា ក្រុមហ៊ុនកាស៊ូទីម បានរំលោភយកដីអ្នកភូមិ ជាហេតុធ្វើឲ្យគាត់ចូលខ្លួនទៅជួយទាមទារដីនោះ និងឲ្យអាជ្ញាធរឃុំ ទទួលស្គាល់ថា អ្នកភូមិជាពលរដ្ឋស្របច្បាប់ បន្ទាប់ពីពួកគាត់រស់នៅតំបន់នោះ ដោយមានខ្លះរស់នៅជិត១០ឆ្នាំ៖ «កិច្ចការដែលខ្ញុំទៅធ្វើហ្នឹង វាមាន២ ទី១ គឺដីធ្លីដែលពួកគាត់អត់ទាន់ទទួលបានជាសិទ្ធិស្របច្បាប់ ហើយត្រូវក្រុមហ៊ុនកាស៊ូទីម មកបំពានយក។ ទី២ ខ្ញុំទាមទារឲ្យអាជ្ញាធរទទួលស្គាល់គាត់ជាពលរដ្ឋស្របច្បាប់នៅទីនោះ»។
អ្នកភូមិប្រម៉ា ម្នាក់ទៀតឈ្មោះ ស៊ឹម សារឿន ឲ្យដឹងដែរថា គាត់រស់នៅភូមិប្រម៉ា ៧ទៅ៨ឆ្នាំ តែគាត់គ្មានការទទួលស្គាល់ពីអាជ្ញាធរមូលដ្ឋានបញ្ជាក់ថារស់នៅស្របច្បាប់នោះទេ។ លោកចង់ឲ្យក្រុមនិស្សិតបន្តចុះវាស់វែងដីគាត់ទំហំ៥ហិកតារ ដែលកំពុងមានទំនាស់ដីធ្លីជាមួយក្រុមហ៊ុនកាស៊ូទីម ដោយសង្ឃឹមថា ក្រោយពីការវាស់វែង គាត់និងអ្នកភូមិឯទៀត នឹងមានកម្មសិទ្ធិដីធ្លីស្របច្បាប់ ហើយក្រុមហ៊ុនកាស៊ូទីម ក៏មិនអាចប្រើសិទ្ធិរំលោភបំពានដីអ្នកភូមិដូចមុន៖ «រដ្ឋាភិបាលចុះធ្វើជាប្លង់ដីឲ្យខ្ញុំមានសិទ្ធិកាន់កាប់ដីធ្លីស្របច្បាប់»។
និស្សិតដែលចុះទៅវាស់វែងដីនៅស្រុកឆ្លូង ម្នាក់ ឲ្យដឹងថា ក្រុមនិស្សិតកំពុងវាស់វែងដីធ្លីឲ្យអ្នកភូមិដែលមានទំនាស់ជាមួយក្រុមហ៊ុន ប៊ុន ចាន់សុភា តាមការចង្អុលបង្ហាញពីមន្ត្រីជំនាញ។ រីឯដីទំនាស់ដែលអ្នកភូមិមានជាមួយក្រុមហ៊ុនកាស៊ូទីម មិនដឹងនៅពេលណានោះទេ។
អភិបាលស្រុកឆ្លូង លោក សូម សារិទ្ធ ឲ្យដឹងថា ជំហានទីមួយ ក្រុមនិស្សិតចុះវាស់វែងដីទំនាស់របស់អ្នកភូមិជាមួយក្រុមហ៊ុន ដែលទទួលដីសម្បទានសេដ្ឋកិច្ចពីរដ្ឋាភិបាល ដែលរួមមានក្រុមហ៊ុនកាស៊ូទីម ក្រុមហ៊ុនដូវទៀន ខេមបូឌា និងក្រុមហ៊ុន ប៊ុន ចាន់សុភា ដែលជំហានដំបូងនេះ ក្រុមនិស្សិតមិនទាន់បញ្ចប់សកម្មភាពវាស់វែងដីធ្លីជូនអ្នកភូមិនៅឡើយ៖ «ស្រុកឆ្លូងហ្នឹង មាន៣ក្រុមហ៊ុន គឺក្រុមហ៊ុនកាស៊ូទីម មួយទៀត ដូវទៀន ខេមបូឌា និងក្រុមហ៊ុន ចាន់សុភា អភិវឌ្ឍន៍នៅដំរីផុងខ្លះ កំពង់ដំរីខ្លះ។ ដោយឡែកប្រជាពលរដ្ឋដែលប្រើប្រាស់ខុសច្បាប់ មានដីកាដកហូតអីៗហ្នឹង អត់ទាន់បានធ្វើទេ»។
អ្នកសម្របសម្រួលអង្គការអាដហុក (Adhoc) និងមន្ត្រីស៊ើបអង្កេតប្រចាំខេត្តក្រចេះ បដិសេធមិនធ្វើការអត្ថាធិប្បាយ ជុំវិញករណីរឿងនៅភូមិប្រម៉ា នោះទេ។
ក្រុមហ៊ុនកាស៊ូទីម បានទទួលដីសម្បទានសេដ្ឋកិច្ចទំហំ១ម៉ឺន៥ពាន់ហិកតារ ពីរដ្ឋាភិបាល កាលពីឆ្នាំ២០០៨ លើដំណាំកសិឧស្សាហកម្មកៅស៊ូ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។