ការប្រតិកម្មរបស់អ្នកភូមិត្រពាំងកញ្ចែត ឃុំកំពង់សំរោង ស្រុកទឹកឈូ ខេត្តកំពត ប្រមាណ ៣០នាក់នៅថ្ងៃទី៣០ ខែឧសភា ធ្វើឡើងនៅបន្ទាប់ពីសវនាការពេញមួយព្រឹក ហើយបានសម្រេចលើកពេលសាកសួរជនជាប់ចោទ ៣នាក់ គឺ លោក ព្រាប អ៊ុង លោក ឈឹម បឿង និង លោក តែត ឃឿន ទៅថ្ងៃទី៨ ខែមិថុនា ខាងមុខទៀត ដោយចាត់ទុកថាសំណុំរឿងមានភាពស្មុគស្មាញ។
លោក អ៊ួច ជី ដែលអះអាងថា ជាប្រធានសហគមន៍សំរោងទ្វារថ្មី ចាត់ទុកថា អង្គសវនាការដែលដេញដោលសាកសួរពេញមួយព្រឹកនេះ គឺពុំបានផ្តល់ភាពយុត្តិធម៌សម្រាប់ជនរងគ្រោះទេ។ លោក អ៊ួច ជី បានហៅចំណាត់ការរបស់មន្ត្រីតុលាការខេត្តកំពតនេះថា មានភាពលំអៀង និងស្ថិតក្រោមឥទ្ធិពលអ្នកមានប្រាក់។ យ៉ាងណាក៏ដោយ លោកអំពាវនាវឲ្យអង្គការសង្គមស៊ីវិលជាតិ អន្តរជាតិ និងរដ្ឋាភិបាលជួយអន្តរាគមន៍ដោះលែងជនជាប់ចោទទាំង ៣នាក់ ឲ្យមានសេរីភាពឡើងវិញ៖ «អង្គការសង្គមស៊ីវិល និងរាជរដ្ឋាភិបាលដោះស្រាយឲ្យប្រជាពលរដ្ឋឲ្យបានច្បាស់លាស់ ឲ្យមានយុត្តិធម៌ជូនចំពោះអ្នកក្រីក្រក្នុងសង្គមគ្រួសារ ក៏ដូចជាសង្គមជាតិទាំងមូល។ អញ្ចឹងអ្នកទន់ខ្សោយមានការឈឺចាប់ណាស់ »។
ចំណែកអ្នកស្រី ឈឹម វណ្ណះ ដែលអះអាងថា មានឈ្មោះនៅក្នុងបណ្ដឹង តែតុលាការបែរជាចាប់ប្ដីរបស់អ្នកស្រី គឺលោក តែត ឃឿន ជំនួសវិញ អ្នកស្រីចាត់ទុកថា មន្ត្រីតុលាការបំពេញកាតព្វកិច្ចដោយលំអៀង និងជាឧបករណ៏របស់អ្នកមានលុយ៖ «គាត់អត់ត្រឹមត្រូវទេ ស៊ីសូកប៉ាន់ អ្នកក្រ អ្នកមានអាងមានលុយពុករលួយ តុលាការពុករលួយ »។
បើតាមក្រុមអ្នកភូមិដែលរង់ចាំស្តាប់លទ្ធផល នៃអង្គសវនាការនៅខាងក្រៅនៃបរិវេណរបងសាលាដំបូងខេត្តកំពត អះអាងថា ដីកំពុងមានជម្លោះប្រមាណ ៥ហិកតាររបស់អ្នកភូមិ ៥គ្រួសារ ពួកគេបានចូលកាន់កាប់តាំងពីឆ្នាំ១៩៨៣ មកដោយមានប័ណ្ណកម្មសិទ្ធិដែលទទួលស្គាល់ពីអាជ្ញាធរភូមិឃុំ។ ក៏ប៉ុន្តែប្រភពដដែលបន្តថា ក្នុងរយៈពេល ២ឆ្នាំ ចុងក្រោយនេះ ទើបអ្នកស្រី ហូរ គីម ដែលជាម្ចាស់ស្រែអំបិលដ៏ល្បីឈ្មោះក្នុងខេត្តមួយនេះអះអាងថា ជាកម្មសិទ្ធិរបស់ខ្លួន ហើយចោទប្រកាន់ពលរដ្ឋ ៥គ្រួសារនេះថា រស់លើដីរបស់អ្នកស្រីដោយខុសច្បាប់។
វិទ្យុអាស៊ីសេរី ពុំអាចស្នើសុំការបំភ្លឺបានទេពី លោក រស់ ពិសិដ្ឋ ចៅក្រមជំនុំជម្រះ និងលោក ខៃ សម្ផស្ស ព្រះរាជអាជ្ញារងសាលាដំបូងខេត្តកំពត ដោយទូរស័ព្ទពុំអាចទាក់ទងបាន។ ចំណែកអ្នកស្រី ហូរ គីម ក៏ពុំអាចស្នើសុំបំភ្លឺបានដែរ។
បើយ៉ាងនេះក្តី មេធាវីការពារឲ្យជនជាប់ចោទរបស់អង្គការស្ពានយុត្តិធម៌អន្តរជាតិ អាយ.ឌី.ជេ (IDJ) គឺលោក គិន វិបុល លោកស្ទាក់ស្ទើរក្នុងការអត្ថាធិប្បាយជុំវិញនីតិវិធីសាកសួររបស់តុលាការដោយលោកចាត់ទុកថា សំណុំរឿងនេះ នឹងត្រូវបើកសវនាការជាថ្មីម្តងទៀត នៅដើមខែមិថុនា ខាងមុខទៀត៖ «ឥឡូវតុលាការគេកំពុងមាននីតិវិធីរបស់គេ។ ក៏ប៉ុន្តែខ្ញុំអត់អាចឆ្លើយបាន ព្រោះរឿងហ្នឹងអត់ទាន់កាត់ចប់ទេណា។ សវនាការនឹងលើកនៅថ្ងៃទី៨ ខែក្រោយនេះម្តងទៀតណា»។
យ៉ាងណាក៏ដោយ លោក ម៉ម កេសី អ្នកស្រាវជ្រាវពន្ធនាគាររបស់អង្គការការពារសិទ្ធិមនុស្ស លីកាដូ ខេត្តកំពត លោកកត់សំគាល់ថា អង្គសវនាការពេញមួយព្រឹកនៅថ្ងៃទី៣០ ខែឧសភា ប្រព្រឹត្តទៅក្នុងក្របខ័ណ្ឌច្បាប់ និងយុត្តិធម៌។ ក្នុងន័យនេះ លោកថា ការសម្រេចលើកពេលសាកសួររបស់មន្ត្រីតុលាការ គឺជៀសវាងការសម្រេចក្តីខុសលើអង្គហេតុ។
កាលពីថ្ងៃទី២៤ ខែវិច្ឆិកា ឆ្នាំ២០១១ សាលាដំបូងខេត្តកំពត បានចេញដីកាកោះហៅជនសង្ស័យក្នុងជម្លោះដីធ្លីចំនួន ៤នាក់ រួមមាន លោក ព្រាប អ៊ុង លោក ឈឹម បឿង អ្នកស្រី ឈឹម វណ្ណះ និងអ្នកស្រី ព្រាប សន ដើម្បីឆ្លើយបំភ្លឺនៅសាលាដំបូងខេត្ត តាមបណ្ដឹងរបស់អ្នកស្រី ហូរ គីម ថៅកែស្រែអំបិល ក្រោមបទចោទថា ពលរដ្ឋទាំងនេះប្រើហិង្សាលើការកាន់កាប់អចលនវត្ថុដោយសុចរិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។