លោក កឹម សុខា ប្រធានគណបក្សសិទ្ធិមនុស្សដែលពាក្យបណ្ដឹងចុងក្រោយរបស់គណបក្សលោក ស្តីពីភាពមិនប្រក្រតីនៃការបោះឆ្នោត និងស្នើឲ្យមានការបោះឆ្នោតឡើងវិញនោះត្រូវបានក្រុមប្រឹក្សាធម្មនុញ្ញបដិសេធនៅថ្ងៃព្រហស្បតិ៍នេះ បានមានប្រសាសន៍ថា ៖ «ខ្ញុំគិតថាបញ្ចប់ដោយការឈឺចាប់បញ្ចប់ដោយអយុត្តិធម៌ បញ្ចប់ដោយគ្មានបើកផ្លូវ ដោយតម្លាភាព ដើម្បីឲ្យប្រជាពលរដ្ឋខ្មែរ អ្នកដែលមានការតវ៉ា អស់ចិត្ត គឺបញ្ចប់ដោយក្រៀមក្រំ» ។
កាលពីថ្ងៃពុធ ក្រុមប្រឹក្សាធម្មនុញ្ញក៏បានបដិសេធពាក្យបណ្តឹងស្រដៀងគ្នានេះដែររបស់គណបក្សសមរង្ស៊ី ដែលជាបណ្តឹងចុងក្រោយក្នុងការតវ៉ាលទ្ធផលបោះឆ្នោតជាតិ កាលពីថ្ងៃទី២៧ ខែកក្កដាកន្លងទៅនេះ ។
មេដឹកនាំគណបក្សប្រឆាំង លោក សម រង្ស៊ី បានមានប្រសាសន៍ថាទង្វើដ៏អាក្រក់នៃប្រព័ន្ធបោះឆ្នោតក្នុងប្រទេសកម្ពុជានាពេលនេះ ៖ «សឲ្យឃើញថា ស្ថាប័នទាំងពីរគឺថា លើកទី១គឺគណៈកម្មាធិការជាតិរៀបចំការបោះឆ្នោត ហើយលើកទី២ គឺក្រុមប្រឹក្សាធម្មនុញ្ញនេះ គឺបម្រើគណបក្សប្រជាជនដែលជាគណបក្សកាន់អំណាច គឺបម្រើផ្ដាច់ថ្លៃ គឺគ្មានរកដំណោះស្រាយ គ្មានផ្ដល់យុត្តិធម៌ចំពោះជម្លោះ ចំពោះពាក្យបណ្ដឹងរបស់យើង ហើយចំពោះប្រជារាស្រ្ដដែលបាត់បង់សិទ្ធិបោះឆ្នោត ហើយដែលត្រូវគេក្លែងបន្លំសន្លឹកឆ្នោត» ។
ប៉ុន្តែទាក់ទងនឹងបញ្ហានេះមន្រ្តីជាន់ខ្ពស់គណបក្សប្រជាជនកម្ពុជា ដែលជាអ្នកមានជ័យជម្នះលើសលុបក្នុងការបោះឆ្នោតកន្លងទៅ គឺលោក ជាម យៀប បានមានប្រសាសន៍ថាការចោទប្រកាន់នោះគឺជាប្រពៃណីរបស់អ្នកចាញ់តែប៉ុណ្ណោះ ។
លោក ជាម យៀប បានមានប្រសាសន៍ថា ៖ «អ្នកដែលបានទទួលអាសនៈតិច ច្រើនតែចោទប្រកាន់គ្រប់បែបយ៉ាងដែលគេឈ្នះឆ្នោត ថាគេអ៊ីចេះមួយ អ៊ីចុះមួយ ។ បើសិនជាគាត់បានជាប់វិញ ឈ្នះដូចគណបក្សប្រជាជនកម្ពុជាវិញ ក៏ស្ងាត់ចឺមដូចតែគ្នាហ្នឹង» ។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប.) បានមានប្រសាសន៍ថា ឥឡូវនេះការតវ៉ានិងការដោះស្រាយរឿងបោះឆ្នោតបានបញ្ចប់ហើយ ហើយគ.ជ.ប.នឹងអាចចេញលទ្ធផលផ្លូវការនាពេលឆាប់ៗខាងមុខនេះ ។
ទោះជាយ៉ាងណាក៏ដោយ ទាំងលោក កឹម សុខា និងលោក សម រង្ស៊ី បានថ្លែងបញ្ជាក់ដែរថា គណបក្សរបស់លោកទាំងពីរនៅតែរក្សាជំហរមិនទទួលស្គាល់លទ្ធផលនៃការបោះឆ្នោតកន្លងទៅនេះទេ ហើយនឹងធ្វើការតវ៉ាបន្តទៀតដល់សហគមន៍អន្តរជាតិ ។
មេដឹកនាំគណបក្សប្រឆាំងទាំងពីរនេះក៏បានអះអាងដែរថាការរក្សាជំហរមិនចូលរួមប្រជុំស្បថចូលកាន់តំណែងសភាក៏មិនមានការផ្លាស់ប្តូរដែររហូតមកទល់ពេលនេះ ៕