ចំពោះការចាប់ខ្លួននិងឃាត់ខ្លួនអ្នកកាសែតខ្មែរវិញក៏មានការកើនឡើងដែរ ដោយក្នុងឆ្នាំ២០០៩នេះ មានអ្នកកាសែតចំនួន ៣១នាក់បានជាប់ឃុំក្នុងគុក ក្នុងនោះមាន ២នាក់ជាប់ឃុំដោយរងការចោទប្រកាន់ពីបទបរិហារកេរ្តិ៍ និងបទផ្សាយព័ត៌មានមិនពិត។
កាលពីថ្ងៃទី២៦ ធ្នូកន្លងទៅ មានការជួបជុំមួយរបស់អ្នកកាសែតប្រមាណ ៥០នាក់ ហើយលោក គី សុខលីម ជាសមាជិកក្លឹបអ្នកកាសែតកម្ពុជា ដែលបានអានរបាយការណ៍ទាក់ទងជាមួយការប្តឹងនិងចាប់ខ្លួនអ្នកកាសែត បានមានប្រសាសន៍ឲ្យដឹងថា ៖ «របាយការណ៍របស់ក្លឹបអ្នកកាសែតកម្ពុជាបានកត់ត្រាឃើញថា នៅឆ្នាំ២០០៩នេះមានការប្ដឹងផ្ដល់ចំពោះអ្នកកាសែតចំនួន ១០ករណី ពោលគឺវាបានកើនឡើង ៨ករណី បើប្រៀបធៀបទៅនឹងឆ្នាំ២០០៨ ដែលមានតែ ២ករណីប៉ុណ្ណោះ។ បើនិយាយអំពីអ្នកកាសែតដែលត្រូវបានអាជ្ញាធរចាប់ខ្លួនវិញ ក្លឹបអ្នកកាសែតកម្ពុជាបានកត់សម្គាល់ឃើញថា នៅក្នុងឆ្នាំ២០០៩នេះមានអ្នកកាសែតចំនួន ៣១នាក់ត្រូវបានចាប់ខ្លួន ពោលគឺមានការកើនឡើងជាងពីរដង បើប្រៀបធៀបទៅនឹងឆ្នាំ២០០៨កន្លងមក ដែលកាលនោះអ្នកកាសែតមានតែ ១៤នាក់ប៉ុណ្ណោះត្រូវបានអាជ្ញាធរចាប់ខ្លួន។ ក្នុងចំណោមអ្នកកាសែតទាំង ៣១នាក់នេះ អ្នកកាសែត ២៩នាក់ត្រូវបានចាប់ខ្លួនពីបទជំរិតទារប្រាក់ ប្លន់ ឆបោក និងពីបទល្មើសផ្សេងៗ។ រីឯអ្នកកាសែត ២នាក់ទៀតត្រូវបានចាប់ខ្លួនដាក់ពន្ធនាគារពីបទបរិហារកេរ្តិ៍ និងផ្សព្វផ្សាយព័ត៌មានមិនពិត។ ទាក់ទងនឹងការចាប់ខ្លួនអ្នកកាសែតនេះ ខ្ញុំសូមបញ្ជាក់ថា ក្នុងចំណោមអ្នកកាសែត ២៩នាក់ដែលបានចាប់ខ្លួននាពេលកន្លងមក ពួកគេមួយចំនួនត្រូវបានដោះលែងវិញហើយ»៕