ប្រតិកម្មខាងលើធ្វើឡើងនៅថ្ងៃអាទិត្យ ទី១១ ឧសភា ឆ្នាំ២០០៨ នៅក្នុងបទសម្ភាសន៏ជាមួយវិទ្យុអាស៊ីសេរី ទាក់ទិនទៅនឹងការឃុំខ្លួននាយកសាលា ហ៊ុន សែន យក្សឡោម លោក ឆើន អំពើល បណ្តោះអាសន្នរយៈពេលជាង ១៣ខែ ដោយគ្មានការជំនុះជម្រះនិងមិនបញ្ជូនពាក្យបណ្តឹងធានាក្រៅឃុំទៅសាលាឧទ្ធរណ៏ និងសេចក្ដីចោទប្រកាន់មិនឈរលើមូលដ្ឋានច្បាប់ ។
មេធាវីការពារក្តី លោក លឹម វណ្ណា ប្រតិកម្ម ៖ «តាមពិតខ្ញុំត្រូវធ្វើទៅសម្ដេចនាយកដើម្បីឲ្យលោកជួយ កុំឲ្យលោក ធឿនហ្នឹង គាត់ចង់បានដីរបស់សាលាហ្នឹង ហើយគាត់ជនជាតិទៀត គាត់អនុញ្ញាតដើម្បីឲ្យសាងសង់បន្ទប់មួយ ដើម្បីដាក់បណ្ដោះអាសន្នទេ តែគាត់យកលេសចំណុចហ្នឹងយកទៅធ្វើកម្មសិទ្ធិផ្ទាល់ខ្លួនដើម្បីលក់ដូរ» ។
អតីតចៅក្រមស៊ើបអង្កេតនៃតុលាការខេត្តរតនគិរី លោក នង សុខ កាលពីថ្ងៃ១៩ ខែកុម្ភៈ ឆ្នាំ២០០៧ បានសម្រេចចេញដីកាឃុំខ្លួននាយកសាលា ហ៊ុន សែន យក្សឡោម ជាមួយមេឃុំក្នុងបទចោទប្រកាន់ថា ធ្វើឲ្យខូចខាតដោយចេតនាដោយសារលោកទាំងពីរបានដឹកនាំអ្នកភូមិជាមាតាបិតាសិស្ស រុះរើរបងហ៊ុមព័ទ្ធដីសាលារៀនពីសំណាក់ឈ្មោះ អ៊ុក ប៊ុនធឿន ដែលសំអាងថាដីនោះលោកនាយកសាលាបានផ្ទេរសិទ្ធិមកលោករួចហើយ ។
ឆ្លើយតបចំពោះប្រតិកម្មនេះ ប្រធានតុលាការខេត្ត លោកបណ្ឌិត យា ណារិន បានទម្លាក់ការទទួលខុសត្រួវទៅលើព្រះរាជអាជ្ញាអមតុលាការខេត្ត និងចៅក្រមស៊ើបអង្កេត លោក អន សំណាង ដែលជាអ្នកកាន់រឿងក្តីបន្តពីចៅក្រម នង សុខ ដែលឧត្ដមក្រុមប្រឹក្សាអង្គចៅក្រម បានសម្រេចឲ្យចូលនិវត្តន៏មុនកាលកំណត់ ។
លោកបណ្ឌិត យា ណារិន បានឲ្យដឹងថា ៖ «នៅលោក អន សំណាង ឥឡូវ បញ្ជូនទៅព្រះអាជ្ញាចង់កន្លះឆ្នាំ ១ឆ្នាំហើយ ព្រះរាជអាជ្ញាអត់ព្រមបញ្ជូនមកវិញ មិនដឹងធ្វើម៉េច» ។
វិទ្យុអាស៊ីសេរីមិនអាចទំនាក់ទំនងចៅក្រម អន សំណាង ដើម្បីអត្ថាធិប្បាយបានទេ ពីព្រោះលោកត្រូវបានផ្ទេរការងារទៅខេត្តកំពង់ស្ពឺ ចំណែកព្រះរាជអាជ្ញាអមតុលាការ លោក ម៊ី សាខន ក៏មិនទទួលទូរស័ព្ទ ។
ទោះជាយ៉ាងនេះក្តី បើតាមមន្ត្រីស៊ើបអង្កេតសមាគមការពារសិទ្ធិមនុស្ស អាដហុក ខេត្តរតនគិរី លោក ប៉ែន ប៊ុណ្ណារ៍ បញ្ជាក់ថាការអូសបន្លាយរឿងក្តីនេះ គឺមានជាប់ពាក់ព័ន្ធនឹងសេចក្តីចោទប្រកាន់ពីភរិយាជនជាប់ចោទទាំងពីរ ទៅលើចៅក្រម អន សំណាង ពីបទជំរិតទារប្រាក់ពួកគាត់ម្នាក់ ៥០០ដុល្លារ ជាថ្នូរនឹងការអនុញ្ញាតឲ្យធានានៅក្រៅឃុំ ។
លោក ប៉ែនប៊ុណ្ណារ៍ បានមានប្រសាសន៍ថា ៖ «មុននឹងឈានដល់គាត់មិនឲ្យនៅក្រៅឃុំ គាត់មានការទារប្រាក់យកពន្ធលើជនដែលជាប់ចោទហ្នឹង យើងឃើញថានេះជាលក្ខណៈផ្ទាល់...» ។
អគ្គនាយកក្រសួងអប់រំ លោក ជា អឿង តាមបញ្ជារដ្ឋមន្រ្តីក្រសួងអប់រំ បានធ្វើលិខិតធានានាយកសាលា លោក ឆើន អំពើល ឲ្យបាននៅក្រៅឃុំជាបណ្ដោះអាសន្ន ដោយអះអាងថាលោកជាមនុស្សស្លូតត្រង់និងមិនធ្វើឲ្យប៉ះពាល់ដល់ការស៊ើបអង្កេត ។
ចំណែកប្រធានតុលាការកំពូល លោក ឌិត មន្ទីរ ក៏បានធ្វើលិខិតជម្រាបមកប្រធានតុលាការខេត្ត ដើម្បីចាត់លោក អន សំណាង ឲ្យទទួលចុះបញ្ជីបណ្តឹងឧទ្ធរណ៍ពីមេធាវីជនចាប់ចោទ មុនពេលលោកផ្ទេរភារកិច្ច ក៏ប៉ុន្តែមេធាវី លោក លឹម វណ្ណា បញ្ជាក់ថាមិនមានចំណាត់ការលើករណីទាំងនេះទេ ៕