កាសែតសេរីភាពថ្មីផ្អាកការបោះពុម្ពផ្សាយព្រោះបញ្ហាថវិកា

ដោយ មុំ សុផុន

2009-11-04

ចាងហ្វាងសារព័ត៌មានក្នុងស្រុកមួយឈ្មោះ សេរីភាពថ្មី បានថ្លែងឲ្យវិទ្យុអាស៊ីសេរីដឹងនៅថ្ងៃ៤ វិច្ឆិកា ២០០៩ ថា អង្គភាពរបស់គាត់បានសម្រេចផ្អាកការបោះពុម្ពផ្សាយរបស់ខ្លួនមួយរយៈ ដោយសារតែមានបញ្ហាផ្នែកហិរញ្ញវត្ថុនៅក្នុងអង្គភាពនោះ។

AFP Photo

បុរសជនជាតិខ្មែរកំពុងអានកាសែតនៅឯតូបលក់កាសែតមួយក្នុងក្រុងភ្នំពេញ នាថ្ងៃ ៧ ឧសភា ២០០៧។

លោក លឹម គីហុង ចាងហ្វាងការផ្សាយរបស់សារព័ត៌មានសេរីភាពថ្មី បានថ្លែងថា ក្រុមការងារអង្គភាពរបស់គាត់នៅមិនទាន់ដឹងថា នឹងចាប់ផ្តើមបោះពុម្ពផ្សាយវិញនៅពេលណានៅឡើយទេ។

លោក លឹម គីហុង មានប្រសាសន៍ដូច្នេះ ៖ «បញ្ហារឿងមួយរយៈមុន គេចេះតែមកក្រវែលៗផ្ទះយើង យើងអត់ដឹងមូលហេតុដែរ មិនដឹងជាពាក់ព័ន្ធនឹងរឿងអី។ យ៉ាប់ដែរ ព្រោះយើងចេញលុយផ្ទាល់ខ្លួន អត់មានអ្នកជួយពិបាកណាស់។ ខាតរហូត ខ្ញុំចេញលុយផ្ទាល់ខ្លួនឡើងរីងខ្លួនហើយ។ ខ្ញុំលក់ឡានលក់អីអស់ដោយសារស្មោះស្ម័គ្រនឹងកាសែតហ្នឹងពេក ដើម្បីចង់ឲ្យកាសែតហ្នឹងបម្រើប្រជាពលរដ្ឋទូទៅ ព្រោះយើងចង់ធ្វើឲ្យទៅជាកាសែតឯករាជ្យ ដោយសារស្រលាញ់ខ្លាំងពេក លះបង់ខ្លាំងពេក ឥឡូវធ្លាក់ខ្លួនក្រហើយ»។

លោកបានថ្លែងទៀតថា អង្គភាពសារព័ត៌មានសេរីភាពថ្មីនេះ លោកទើបតែបានកាន់កាប់ក្នុងជាងកន្លះឆ្នាំកន្លងមកនេះ ដែលមាននិន្នាការគាំទ្រគោលនយោបាយគណបក្សជំទាស់។

លោក លឹម គីហុង បានមានប្រសាសន៍ឲ្យដឹងដូច្នេះទៀតថា ៖ «ពាណិជ្ជកម្ម ខ្ញុំធ្លាប់ទាក់ទងទៅគេ គេថា គេចង់ផ្សាយដែរ ប៉ុន្តែសម្ពាធនយោបាយ។ មានផលវិបាកច្រើនណាស់ធ្វើកាសែតប្រឆាំង។ ការគំរាមកំហែងអីក៏ចេះតែមានតិចតួច សុវត្ថិភាព សន្តិសុខផ្ទាល់ខ្លួនក៏ពិបាក យើងធ្វើដំណើរទៅណាទៅណីក៏យ៉ាប់ ឃើញថា ស្ថិតក្នុងការឃ្លាំមើលតាមដានរបស់គេ»៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។