លោកបណ្ឌិត យ៉ង សាំងកុមារ នាយកអង្គការសេដាក់ មានប្រសាសន៍ឲ្យវិទ្យុអាស៊ីសេរីដឹងនៅថ្ងៃ២២ វិច្ឆិកា ថា អង្គការសេដាក់គ្រោងនាំអង្ករសរីរាង្គ ឬហៅថាអង្ករផលិតចេញតាមបែបគោលការណ៍ធម្មជាតិមិនប្រើសារធាតុគីមី ចំនួនពី២០០ទៅ៣០០តោនទៅកាន់ទីផ្សារអឺរ៉ុប សហរដ្ឋអាមេរិក និងប្រទេសអាល្លឺម៉ង់ នៅឆ្នាំ២០១០ ប្រសិនបើការនាំចេញអង្ករសរីរាង្គជំហានសាកល្បង៣២តោនទៅកាន់សហរដ្ឋអាមេរិកនាចុងខែវិច្ឆិកាទទួលបានជោគជ័យនោះ។
លោកបញ្ជាក់ថា ការនាំចេញអង្ករសរីរាង្គជំហានដំបូងទៅកាន់ទីផ្សារអឺរ៉ុបបច្ចុប្បន្នបាននិងកំពុងវេចខ្ចប់ ៖ «អត់ទាន់បានធ្វើជាកុងត្រាជាមួយគេទេ។ ក្នុងពេលនេះយើងកំពុងរៀបចំផ្ញើចេញ ការនាំចេញសាកល្បងទៅអាមេរិកហ្នឹងក្នុងចំនួនប្រហែលជា៣២តោន បន្ទាប់មកបើសិនជាការនាំសាកល្បងជោគជ័យ យើងនឹងធ្វើកុងត្រាសម្រាប់ការនាំចេញឆ្នាំ២០១០តែម្ដង»។
ប្រធានមជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា បន្តឲ្យដឹងថា បច្ចុប្បន្នអង្គការសេដាក់បានជួលអ្នកជំនាញមកពីក្រៅប្រទេសមកត្រួតពិនិត្យគុណភាពក្នុងការវេចខ្ចប់ ក៏ដូចជាការកិនអង្ករដើម្បីឲ្យស្របតាមស្តង់ដារទីផ្សារនៅអឺរ៉ុប។
លោកបណ្ឌិត យ៉ង សាំងកុមារ បញ្ជាក់ឲ្យដឹងដូច្នេះ ៖ «មានបញ្ហាច្រើនទាក់ទងនឹងការកិន ការវេចខ្ចប់។ យើងខ្វះខាតទាំងពីសម្ភារៈវេចខ្ចប់ ឧទាហរណ៍ថង់ដែលយើងវេចខ្ចប់ យើងត្រូវកុម៉្មង់មកពីក្រៅប្រទេសអីអ៊ីចឹង ព្រោះយើងត្រូវការថង់ដែលអាចខ្ចប់អត់ឲ្យមានខ្យល់ចេញចូល អាចទុកបានរយៈពេល១ឆ្នាំអីអ៊ីចឹងទៅណា៎»។
លោក ម៉ាក សឿន ប្រធាននាយកដ្ឋានផ្សព្វផ្សាយកសិកម្ម រុក្ខាប្រមាញ់និងនេសាទ មានប្រសាសន៍ថា តាមដែលលោកទទួលបានពីសមាគមម៉ាស៊ីនកិនស្រូវ បានឲ្យដឹងថា ប្រភេទអង្ករក្រអូបកាលពីឆ្នាំពី២០០៩កន្លងទៅ និងឆ្នាំ២០១០ គឺកម្ពុជាមានតួលេខនាំចេញទៅក្រៅប្រទេសមានចំនួនច្រើន ប៉ុន្តែលោកមិនបានបង្ហាញរបាយការណ៍ថា មានតួលេខចំនួនប៉ុន្មាននោះទេ។
លោក ម៉ាក សឿន បានបញ្ជាក់ថា ៖ «តាមស្ថិតិពីសមាគមរោងម៉ាស៊ីនកិនស្រូវគឺយើងមានការនាំចេញទៅអឺរ៉ុប នាំចេញទៅសាំងហ្គាពួរ នាំចេញទៅហុងកុង ពូជដែលមានគុណភាព ពូជផ្ការំដួល ផ្កាម្លិះ»។
ទាក់ទងការនាំអង្ករចេញទៅកាន់ទីផ្សារក្រៅប្រទេសនេះដែរ សម្រាប់លោក ភូ ពុយ អគ្គនាយកក្រុមហ៊ុនបៃតងកម្ពុជា ធ្លាប់បានអះអាងថា ក្រុមហ៊ុនបានត្រៀមអង្ករកែច្នៃរួច ជាប្រភេទអង្ករក្រអូបនិងអង្ករធម្មតាយ៉ាងហោចកន្លះលានតោននៅឆ្នាំ២០១០ ដើម្បីនាំចេញទៅធ្វើការប្រកួតប្រជែងនៅលើទីផ្សារអន្តរជាតិ។
មន្ត្រីក្រសួងកសិកម្មបានឲ្យដឹងថា នៅឆ្នាំ២០០៨និងឆ្នាំ២០០៩នេះកម្ពុជាបានសល់អង្ករប្រមាណជិត៤លានតោន ដូច្នេះឆ្នាំ២០១០ខាងមុខ កម្ពុជារំពឹងទុកថា ទិន្នផលស្រូវក៏ដូចជាអង្ករនឹងប្រមូលបានចំនួនប្រហាក់ប្រហែលគ្នានឹងឆ្នាំកន្លងទៅដែរ សម្រាប់ផ្គត់ផ្គង់តម្រូវការក្នុងស្រុកនិងសល់សម្រាប់នាំចេញទៅទីផ្សារក្រៅប្រទេស៕