ក្រុមសហគមន៍ឲ្យដឹងថា អ្នកលួចកាប់ឈើលក់ឲ្យវៀតណាមនោះ អាចជាប់ពាក់ព័ន្ធនឹងតម្រួតព្រំដែនខ្មែរនៅតំបន់នោះ។
ក្រុមសហគមន៍ការពារព្រៃឈើភូមិ ពូលេះ ឃុំដាក់ដាំ ស្រុកអូររាំង ខេត្តមណ្ឌលគិរី នៅថ្ងៃទី១ ខែមេសា ឆ្នាំ២០១២ បានឲ្យដឹងថា ក្រុមប្រជាសហគមន៍អ្នកដើរល្បាតក្នុងព្រៃចំនួន ៦ នាក់ បានរកឃើញគំនរឈើមួយកន្លែង មានបរិមាណឈើជាង ៣០ដើម ត្រូវគេលួចកាប់គរទុក ដើម្បីដឹកជញ្ជូនឆ្លងដែនចូលទៅប្រទេសវៀតណាមមានព្រំដែនជាប់និងតំបន់ព្រៃនោះ។
សមាជិកសហគមន៍មួយរូបសុំមិនឲ្យបញ្ចេញឈ្មោះ មានបញ្ជាក់ថា គំនរឈើដែលសហគមន៍រកឃើញនោះ នៅចម្ងាយប្រមាណពី ៥ ទៅ ៦ គីឡូម៉ែត្រពីភូមិពូលេះ។ ឈើនោះ ជាប្រភេទឈើលេខ ១ ត្រូវគេអារច្រៀកជាឈើជ្រុងទំហំពី ៦ ទៅ ៩ តឹកបួនជ្រុង និងមានបណ្ដោយពី ២ ម៉ែត្រ ៥០
ដល់ ៣ ម៉ែត្រ។
ប្រជាសហគមន៍ដដែលបន្តទៀតថា សហគមន៍បានចំណាយពេលអស់ពីរថ្ងៃ ដើម្បីយាមការពារឈើនោះ ហើយសុំកិច្ចអន្តរាគមន៍ពីមន្ត្រីសង្កាត់ព្រៃឈើដាក់ដាំ។ ក៏ប៉ុន្តែ សហគមន៍មិនឃើញមន្ត្រីព្រៃឈើចុះមកបំពេញការងាររបស់ខ្លួននោះឡើយ។
សំឡេង៖ «សង្ស័យពួកប៉ូលិសពួកទាហានហ្នឹងគាត់កាប់ឈើយកទៅលក់ឲ្យវៀតណាម។ ឃើញឈើហ្នឹង ខ្ញុំទូរស័ព្ទទៅរដ្ឋបាលព្រៃឈើ។ គាត់ថាអត់អីទេ គាត់ទៅយកឡានដឹក និងកម្លាំងសហគមន៍ជួយលើក ហើយពួកខ្ញុំចាំនៅហ្នឹង អត់ឃើញមក។ រង់ចាំពីរថ្ងៃហ្នឹង ជួបការលំបាកអត់បាយអត់ទឹកខ្ញុំត្រឡប់ទៅផ្ទះវិញហ្នឹង»។
មេឃុំដាក់ដាំ លោក សំ វ៉ាន្នី មានប្រសាសន៍ថា តំបន់ដែលសហគមន៍រាយការណ៍ថាមានបទល្មើសព្រៃឈើ ជាតំបន់ឆ្ងាយមិនមានផ្លូវគមនាគមន៍ដឹកជញ្ជូនទេ។ ហេតុនេះ ក្រុមសហគមន៍មិនមានលទ្ធភាពដឹកជញ្ជូនវត្ថុតាងបទល្មើសព្រៃឈើនោះ មកមូលដ្ឋានបានឡើយ។
លោក សំ វ៉ាន្នី៖ «ពិបាកត្រង់ថា មេឃវាភ្លៀង។ ណាវានៅឆ្ងាយ។ សន្តិសុខវាអត់ធានា យើងអត់ហ៊ានដែរ របស់ហ្នឹងរបស់ព្រំដែនអីទេ»។
នាយសង្កាត់ព្រៃឈើដាក់ដាំនៃខណ្ឌរដ្ឋបាលព្រៃឈើខេត្តមណ្ឌលគិរី លោក តូច រតនា បដិសេធមិនឆ្លើយនឹងសំណួរអ្នកយកព័ត៌មានវិទ្យុអាស៊ីសេរីក្នុងរឿងនេះទេ នៅថ្ងៃអាទិត្យទី១ ខែមេសា ឆ្នាំ ២០១២។
លោកបញ្ជាក់ថា លោកកំពុងរវល់ក្នុងប្រតិបត្តិការមួយ។ ចំណែកនាយខណ្ឌរដ្ឋបាលព្រៃឈើខេត្តមណ្ឌលគិរី គឺលោក កែប តក់ ។ លោកបានបញ្ជាក់ថា លោកមិនបានទទួលសេចក្ដីរាយការណ៍ពីករណីនេះទេ។ ប៉ុន្តែករណីនេះ លោកនឹងចាត់មន្ត្រីសង្កាត់ព្រៃឈើចុះពិនិត្យសេចក្ដីរាយការណ៍នេះ។
សេចក្ដីរាយការណ៍របស់ប្រជាសហគមន៍ឃុំដាក់ដាំឲ្យដឹងថា ដើមឈើប្រណិតក្នុងព្រៃសហគមន៍ការពារ ត្រូវគេលួចកាប់ច្រើនឆ្នាំកន្លងមកនេះ ហើយនាំឆ្លងចូលទៅប្រទេសវៀតណាម តាមប៉ុស្តិ៍ការពារព្រំដែនអូរស្វាយ។
កន្លងទៅនេះក្រុមសហគមន៍បានរកឃើញមានករណីលួចកាប់ឈើមួយចំនួនជាប់ពាក់ព័ន្ធនឹងមន្ត្រីតម្រួតការពារព្រំដែននៅតំបន់នោះឃុបឃិតឲ្យពលរដ្ឋវៀតណាម ចូលមកអារឈើនាំចូលទៅដីវៀតណាម។
ទោះជាយ៉ាងនេះក្ដី ក្រុមសហគមន៍ឃុំដាក់ដាំ អះអាងថា ពួកគេកំពុងត្រូវការមន្ត្រីជំនាញព្រៃឈើ ដើម្បីចុះទៅប្រមូលយកឈើនោះ មកទុកជាវត្ថុតាង និងស្រាវជ្រាវរកមុខអ្នកប្រព្រឹត្តល្មើស៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។