អាជ្ញាធរខេត្តប៉ៃលិនបានប្រកាសបិទមិនឲ្យកងទ័ពកាប់ឈើយកទៅសាងសង់បន្ទាយនៅតាមខ្សែបន្ទាត់ព្រំដែនខ្មែរនៅជាប់ព្រំដែនប្រទេសថៃ ខណៈដែលការបំផ្លាញព្រៃក្នុងខេត្តនេះត្រូវបានគេរាយការណ៍មកថា កំពុងកើតមានភាពអនាធិបតេយ្យ។
លោក អ៊ី ឈាន អភិបាលខេត្តប៉ៃលិនបានមានប្រសាសន៍នៅព្រឹកថ្ងៃច័ន្ទ ទី២៥ ខែមករាថា កាលពីចុងសប្តាហ៍កន្លងទៅនេះអាជ្ញាធរខេត្តប៉ៃលិន បានចាត់វិធានការមិនឲ្យកងទ័ពកាប់ឈើយកទៅសាងសង់បន្ទាយដោយសារឈើដែលរងការកាប់បំផ្លាញនោះត្រូវបានគេលក់ដូរមិនយកទៅសាងសង់បន្ទាយទ័ពទេ។
លោក អ៊ី ឈាន មានប្រសាសន៍ថា ៖ «អ្នកផ្សេងវាច្របូកច្របល់។ ពីណាពីណីមក យើងផ្អាកសិនដើម្បីរៀបចំគណៈកម្មការមួយចុះទៅធ្វើការងារជាក់ស្តែងដើម្បីបម្រើការងារការពារឲ្យបានពិតប្រាកដ»។
ក្រោយថ្ងៃទី១៥ ខែកក្កដា ឆ្នាំ២០០៨ បន្ទាប់ពីមានសភាពការតានតឹងរវាងកងទ័ពខ្មែរ-ថៃ នៅតំបន់ព្រំដែននិងនៅតំបន់ប្រាសាទព្រះវិហារ រដ្ឋាភិបាលខ្មែរបានដាក់ពង្រាយកងទ័ពរបស់ខ្លួនការពារនៅតាមខ្សែបន្ទាត់ព្រំដែនដោយបានប្រកាសឲ្យអាជ្ញាធរខេត្តធ្វើការសម្របសម្រួលក្នុងការអនុញ្ញាតឲ្យកងទ័ពកាប់ឈើយកទៅធ្វើទីជម្រក ឃ្លាំងនិងបន្ទាយនៅតាមតំបន់ព្រំដែន។
ប្រជាពលរដ្ននៅខេត្តប៉ៃលិនបានឲ្យដឹងថា ឈើប្រណីតដែលត្រូវបានកងទ័ពកាប់នោះត្រូវបានគេដឹកយកទៅលក់ឲ្យថៃនិងដឹកចេញទៅប្រទេសវៀតណាម។
ប្រជាពលរដ្ឋមួយរូបនោះបានអះអាងថា ៖ «ឈើយកទៅលក់ខាងក្រៅច្រើនជាងឈើយកមកធ្វើបន្ទាយ។ ឈើយកមកធ្វើបន្ទាយគឺឈើរបៀបឈើគ្រោងធ្វើផ្ទះ។ ដល់ពេលអារឈើនាំទៅលក់ ឈើហ្នឹងអារពីព្រៃមកដែរ តែ២គុណ៨ ឈើនាំចេញទៅលក់នៅថៃ ទៅយួននេះ»។
លោកឧត្តមសេនីយ៍ ហ៊ាន ហ៊ឹម មេបញ្ជាការតំបន់ប្រតិបត្តិការសឹកប៉ៃលិនបានមានប្រសាសន៍ថា ការកាប់ឈើយកទៅលក់កើតមានខ្លះមែន ប៉ុន្តែលោកអះអាងថា ជារឿងបុគ្គល ដោយលោកបញ្ជាក់ដូច្នេះ ៖ «ជាការណែនាំរបស់យើង គឺយើងមិនឲ្យធ្វើផ្តេសផ្តាសក្រៅពីសង់ជម្រកកងទ័ពទេ។ រឿងហ្នឹងជារឿងបុគ្គលទេ ខ្ញុំក៏មានវិធានការតឹងតែងដែរអារឿងអារឈើ»។
លោក ឆាង ភូរិន នាយផ្នែករដ្ឋបាលព្រៃឈើខេត្តប៉ៃលិន បានគាំទ្រវិធានការរបស់លោក អ៊ី ឈាន។ លោកបានមានប្រសាសន៍ថា ក្រោយពីការអនុញ្ញាតឲ្យមានការកាប់ឈើយកទៅធ្វើបន្ទាយកងទ័ពគឺមានជនឆ្លៀតឱកាសលួចធ្វើអាជីវកម្ម។
លោកនាយផ្នែករដ្ឋបាលព្រៃឈើខេត្តប៉ៃលិនដែលគាំទ្រការប្រកាសបិទរបស់រដ្ឋាភិបាលមានប្រសាសន៍ដូច្នេះ ៖ «ពេលគាត់អនុញ្ញាតឲ្យគេកាប់ឈើធ្វើបន្ទាយវាមានជនឆ្លៀតឱកាសមិនបានយកឈើហ្នឹងទៅធ្វើបន្ទាយបែរជាធ្វើការជួញដូរទៅវិញ»។
ប្រពភពីអ្នកស្រុកប៉ៃលិនបានថ្លែងថា ការហាមឃាត់មិនឲ្យកងទ័ពកាប់ឈើគឺបានធ្វើឡើងហាក់ដូចយឺតពេលទៅហើយ ព្រោះព្រៃឈើធំៗត្រូវបានគេកាប់បំផ្លាញស្ទើរអស់ទាំងស្រុង។
អ្នកភូមិម្នាក់ដែលមិនបញ្ចេញឈ្មោះបន្ថែមថា ៖ «ដល់ពេលប្រកាសបិទហ្នឹងក៏វាល្មមចប់ពេលហ្នឹងដែរ ចប់ពេលហ្នឹងតែម្តងហ្នឹង។ (ព្រៃឈើ) នៅសល់តែខាងក្រោមជាយៗដូចជាម្តុំបរហ៊ុយ»។
គេរង់ចាំមើលជាបន្តទៀតថា តើវិធានការនេះមានប្រសិទ្ធភាពឬក៏អត់៕