សេចក្តីរាយកាណ៍នេះធ្វើឡើងតាមរយៈពាក្យបណ្តឹងរបស់តំណាងអ្នកភូមិទ្រួសច្រាច់ ឃុំតាអង ស្រុកកូនមុំ ២៨នាក់ដែលបានផ្តិតមេដៃប្តឹងទៅព្រះរាជអាជ្ញាអមតុលាការខេត្តកាលពីថ្ងៃទី៦ តុលា ឆ្នាំ២០០៨ ដើម្បីសុំឲ្យចាត់វិធានការនិងផ្តន្ទាទោសជនល្មើសដែលបានបំផ្លាញព្រៃឈើនិងធ្វើឲ្យផ្លូវលំអភិវឌ្ឍន៍ក្នុងភូមិរងការខូចខាត។
តំណាងអ្នកភូមិ លោក ប៉ង សាម៉ុញ មានប្រសាសន៍បា្រប់វិទ្យុអាស៊ីសេរី នៅថ្ងៃអង្គារ ទី៧ តុលា ឆ្នាំ២០០៨ ថា ចាប់ពីខែកញ្ញា ឆ្នាំ២០០៧ រហូតបច្ចុប្បន្ន ឈើប្រណីតគ្រប់ប្រភេទចំនួន ២១៧ឡានចំណុះជិត ៥០០ម៉ែត្រគូបត្រូវឈ្មោះ ហ៊ន សុគង់ មានលំនៅនៅឃុំឡាបានសៀក ស្រុកបានលុង ខេត្តរតនគិរី និងបក្សពួកកាប់នៅចំណុចភ្នំគ្រុយ ជាតំបន់ព្រៃឈើសហគមន៍ ហើយករណីនេះអ្នកភូមិបានស្ទាក់ចាប់ឡានដឹកឈើមួយគ្រឿងនិងសុំកិច្ចអន្តរាគមន៍ពីមេឃុំក៏ប៉ុន្តែក្រុមអ្នកដឹកឈើបានសូកប៉ាន់មេឃុំហើយនាំឈើចេញទៅវិញ។
លោក ប៉ង សាម៉ុញ រៀបរាប់ដូច្នេះថា ៖ «ពួកខ្ញុំចង់ប្ដឹងឲ្យឈប់ធ្វើតែម្ដង ប៉ះពាល់ដល់ផ្លូវអភិវឌ្ឍន៍ទៀត អត់កើតទេឥឡូវ»។
មេឃុំតាអង លោក វ៉ាន់ ប៉ាន ទទួលស្គាល់ថា ពិតជាមានការកាប់ឈើដូចរបាយការណ៍អ្នកភូមិមែន។ លោកថា មេខ្លោងនៃក្រុមកាប់ឈើគឺនាយនគរបាលប៉ុស្តិ៍ឃុំលោក ស៊ឹម ណារ៉ូ ហើយករណីនេះ លោកបានរាយការណ៍ជូនអាជ្ញាធរស្រុករួចហើយ ក៏ប៉ុន្តែលោកមិនមានលទ្ធភាពទប់ស្កាត់បានឡើយ។
តាមបណ្តឹងអ្នកភូមិជនពាក់ព័ន្ធផ្សេងទៀត នៅក្នុងការកាប់ឈើខាងលើមានឈ្មោះ ប៊ិន និងឈ្មោះ ថាន ដែលអ្នកភូមិមិនស្គាល់អត្តសញ្ញាណច្បាស់លាស់។
នៅថ្ងៃអង្គារនេះ វិទ្យុអាស៊ីសេរីមិនអាចស្វែងរកជនដែលរងការចោទប្រកាន់ខាងលើដើម្បីអធិប្បាយបញ្ហានេះបានទេ ចំណែកនាយប៉ូលិសប៉ុស្តិ៍លោក ស៊ឺម ណារ៉ូ ក៏ដូចគ្នា ព្រោះលោកមិនមានវត្តមាននៅការិយាល័យ។
យ៉ាងនេះក្តី ព្រះរាជអាជ្ញាអមតុលាការខេត្តរតនគិរី លោក ម៉ី សាខន មានប្រសាសន៍បញ្ជាក់ថា ស្ថាប័នលោកបានទទួលពាក្យបណ្តឹងពីអ្នកភូមិរួចហើយ ហើយកំពុងពិនិត្យករណីនេះ។
ចំណែកនាយផ្នែកនៃខណ្ឌរដ្ឋបាលព្រៃឈើទទួលបន្ទុកស្រុកកូនមុំ លោក ឡេង យុត មានប្រសាសន៍ថា នឹងធ្វើការស៊ើបអង្កេតរបាយការណ៍នេះដូចគ្នា។
មន្រ្តីសមាគមអាដហុក ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា ព្រៃឈើដែលអ្នកភូមិរាយការណ៍ថា មានការកាប់យកឈើប្រណីតគឺជាការពិត។
លោកថា ជាការទទួលខុសត្រូវរបស់អាជ្ញាធរមូលដ្ឋាននិងស្ថាប័នខណ្ឌរដ្ឋបាលព្រៃឈើប្រចាំមូលដ្ឋាននោះដូចគ្នា។
លោក ប៉ែន ប៊ុណ្ណារ៍ មានប្រសាសន៍ថា ៖ «គេធ្វើដល់ឥឡូវ តាមគាត់កត់វា ២១៧[ឡាន]។ មួយឡានហ្នឹងជាមធ្យមមានពីរម៉ែត្រគូប អ៊ីចឹងប្រហែលជា ៥០០ម៉ែត្រគូប ហើយនៅតំបន់ព្រៃហ្នឹងក៏អស់។ សុំឲ្យមានចាត់វិធាការជាបន្ទាន់»។
ឈើប្រណីតកម្រមានតម្លៃក្នុងខេត្តរតនគិរី បើតាមប្រជាសហគមន៍ជនជាតិដើមដែលអភិរក្សព្រៃឈើនៅតាមមូលដ្ឋាននានា ឲ្យដឹងថា ត្រូវបានគេកាប់អារច្រៀកនាំចេញលក់ទៅតាមរោងសិប្បកម្មក្នុងខេត្តនិងដឹកជញ្ជូនចេញទៅទីផ្សារក្នុងប្រទេស ជាពិសេសលួចនាំចេញតាមច្រករបៀងព្រំដែនទៅកាន់ទីផ្សារប្រទេសវៀតណាមដែលនៅជាប់នឹងខេត្តរតនគិរី អស់ស្ទើរគ្មានសល់នាប៉ុន្មានឆ្នាំចុងក្រោយនេះ៕