អ្នកភូមិឲ្យដឹងថា ក្រុមហ៊ុននេះឈូសឆាយព្រៃដើម្បីយកដីដាំកៅស៊ូ ប៉ុន្តែសកម្មភាពនេះវាបានបំផ្លាញព្រៃដែលប្រជាពលរដ្ឋធ្លាប់រកអនុផលព្រៃឈើសម្រាប់ចិញ្ចឹមជីវិតតាំងពីដូនតារបស់ពួកគាត់ និងប៉ះពាល់ដល់តំបន់ព្រៃអភិរក្សរបស់សហគមន៍ថែមទៀត។
ប្រជាសហគមន៍ជនជាតិភាគតិចព្នង នៅភូមិស្រែអំពិលជាង ៦០គ្រួសារ បានអំពាវនាវទៅអាជ្ញាធរមូលដ្ឋាន និងអាជ្ញាធរពាក់ព័ន្ធក្នុងកិច្ចការអភិរក្សព្រៃឈើក្នុងស្រុកកែវសីមា មានវិធានការជាបន្ទាន់ ដើម្បីទប់ស្កាត់ចំពោះក្រុមហ៊ុនដែលវិនិយោគលើដីសម្បទានសេដ្ឋកិច្ចរបស់រដ្ឋ ប៉ះពាល់ដល់តំបន់អភិរក្សព្រៃឈើរបស់សហគមន៍នេះ។
ប្រធានសហគមន៍ លោក ភួន សី បានឲ្យដឹងថា នៅប៉ុន្មានខែមុននេះ សហគមន៍លោកបានដាក់ពាក្យប្ដឹងទៅអាជ្ញាធរព្រៃឈើ អាជ្ញាធរមូលដ្ឋាន និងតុលាការ ឲ្យរកយុត្តិធម៌លើករណីដែលក្រុមហ៊ុន សុវណ្ណរាជសី បានឈូសផ្ដួលរំលំដើមឈើធំៗ ក្នុងតំបន់ដែលប្រជាពលរដ្ឋជនជាតិភាគតិចធ្លាប់រកអនុផលព្រៃឈើ ដូចជាបោចវល្លិ កាប់ផ្ដៅ រកជ័រជាដើម នៅតំបន់ដែលមានព្រំប្រទល់ជាប់គ្នារវាងស្រុកឆ្លូង ខេត្តក្រចេះ និងស្រុកកែវសីមា ខេត្តមណ្ឌលគិរី។
លោកបន្តថា រហូតមកដល់ពេលនេះ ពាក្យបណ្ដឹងរបស់ប្រជាពលរដ្ឋពុំទាន់ឃើញមានចំណាត់ការណាមួយពីអាជ្ញាធរពាក់ព័ន្ធនៅឡើយ ហើយក្រុមហ៊ុននៅតែមានសកម្មភាពឈូសឆាយបន្តចូលមកក្នុងតំបន់ព្រៃការពាររបស់សហគមន៍ប្រហែល ៤០០ម៉ែត្រថែមទៀត។
លោក ភួន សី៖ «ខាងក្រុមហ៊ុនឈូសឆាយប្រាប់ថា ដីព្រំប្រទល់អត់ច្បាស់ទៀត។ ថ្ងៃណាមកល្បាតគាត់មិនឈូស ថ្ងៃណាមិនមកល្បាតគាត់ឈូស វាពិបាកអ៊ីចឹងទៀត។ ខាងសហគមន៍មានប្រាក់ខែណា មានពេលណារាល់តែថ្ងៃ មួយខែដើរ បីបួនដងវាច្រើនពេកហើយសម្រាប់សហគមន៍ រវល់ធ្វើស្រែផង ធ្វើចំការផង។ រដ្ឋាភិបាលគាត់មិនមើលឃើញសោះ បានខាងអង្គការក្រៅរដ្ឋាភិបាលគាត់ជួយតិចៗ បើនៅតែឈូសយ៉ាងនេះទៀត កុំថា តែដីចំការ តែដីស្រែមិនដឹងនៅ ឬមិននៅផងទៅមុខទៀត។ មានន័យថា អភិវឌ្ឍយ៉ាងនេះធ្វើឲ្យសហគមន៍ជនជាតិភាគតិចយើងខ្ញុំទឹកភ្នែក អភិវឌ្ឍយ៉ាងហ្នឹង»។
អ្នកភូមិម្នាក់ទៀតឈ្មោះ ចេង សាម៉ាន់ បានថ្លែងទាំងក្ដីបារម្ភថា ការកាប់ព្រៃឈើដើម្បីអភិវឌ្ឍន៍ដំណាំកៅស៊ូនេះ ជាការបំផ្លិចបំផ្លាញព្រៃធម្មជាតិដ៏មានតំលៃ និងជាការវាយបំបែកឆ្នាំងបាយប្រពលរដ្ឋ ជាពិសេសជនជាតិដើមភាគតិចតែម្ដង៖ «ពីព្រោះថា មាម្ដុំត្រង់នេះដឹងថា ព្រៃជ័រ ព្រៃអារក្ស អ្នកតាទាំងអស់ហើយតាមហ្នឹង ជ័រចុង ជ័រច្បោះយើងហ្នឹង។ អ៊ីចឹងបានន័យថា ព្រៃដែលគេកំពុងឈូសឆាយនេះសុទ្ធតែព្រៃធំៗ សុទ្ធតែព្រៃធំទាំងអស់ ព្រៃចាស់ សុទ្ធតែបងប្អូនប្រជាពលរដ្ឋទៅដងជ័រដងអីហ្នឹង»។
វិទ្យុអាស៊ីសេរីមិនទាន់អាចរកប្រភពពីតំណាងក្រុមហ៊ុន សុវណ្ណរាជសី ដើម្បីបកស្រាយពីបញ្ហាដែលប្រជាពលរដ្ឋបានលើកឡើងមកនេះបានទេ នៅថ្ងៃអង្គា ទី១៥ វិច្ឆិកា។ ប៉ុន្តែបុរសម្នាក់ឈ្មោះ នាក់ គង់ ដែលអះអាងថា ជាអ្នកអារច្រៀកដើមឈើដែលក្រុមហ៊ុនឈូសផ្ដួលរំលំរួចហើយ បានអះអាងថា ដើមឈើដែលលោកឃើញនៅសេសសល់នោះមិនមែនជាប្រភេទឈើធំៗទេ៖ «ឈើដែលដួលហ្នឹងមុខ ២០ មុខ ៣០ ហ្នឹងតូចៗដែរ តូចជាងព្រៃដែលគេគ្រប់គ្រងហ្នឹងទេ»។
អ្នកភូមិអះអាងទៀតថា ផលលំបាកម្យ៉ាងទៀតនៅពេលមានក្រុមហ៊ុនវិនិយោគនៅជិតតំបន់ព្រៃអភិរក្សនោះ ធ្វើឲ្យមានជនខិលខូចលួចកាប់ឈើប្រណិតក្នុងព្រៃសហគមន៍ ដោយចេញចូលតាមច្រកឆ្លងកាត់តំបន់គ្រប់គ្រងដោយក្រុមហ៊ុនដែលមានឈូសធ្វើផ្លូវរថយន្តចូលដល់តំបន់ព្រៃការពារ។
ទោះយ៉ាងណា មេឃុំស្រែខ្ទម លោក ជា ឆឹង មានប្រសាសន៍ថា បញ្ហានេះជារឿងស្មុគស្មាញមួយ ពីព្រោះតំបន់នោះស្ថិតក្នុងភូមិសាស្ត្រដែលគ្រប់គ្រងដោយអាជ្ញាធរពីរផ្សេងគ្នា។ លោកបន្តថា ចំពោះករណីក្រុមហ៊ុនប្រើគ្រឿងចក្រឈូសចូលព្រៃអភិរក្សការពារដោយសហគមន៍ជនជាតិភាគតិចនៅភូមិស្រែអំពិល ក្នុងទឹកដីឃុំស្រែខ្ទុំ ស្រុកកែវសីមា ខេត្តមណ្ឌលគិរី នោះ អាជ្ញាធរខាងបរិស្ថាន និងអាជ្ញាធរពាក់ព័ន្ធ រួមមានសង្គមស៊ីវិលផង បានកោះប្រជុំគ្នារយៈពេល ២ថ្ងៃ គឺនៅថ្ងៃទី១៥ និងថ្ងៃទី១៦ ខែវិច្ឆិកា ដោយផ្ដោតសំខាន់លើបញ្ហាបោះព្រំកំណត់ដីរបស់សហគមន៍។
លោក ជា ឆឹង៖ «កាលណាយើងរៀបចំព្រំសហគមន៍ហើយ យើងមានលំនឹងហើយ ក្រុមហ៊ុនមិនអាចមកជ្រៀតបានទេ ហើយខាងក្រុមហ៊ុនក៏គាត់ស្ដាប់បានដែរ សុំគាត់ក៏ផ្អាកដែរ។ ដូចថា កន្លងមកគាត់បាន ស.ជ.ណ. (សេចក្ដីជូនដំណឹង) អ៊ីចឹងមកគាត់មិនបានសិក្សាឲ្យជ្រៅធ្វើឲ្យមានការប៉ះពាល់ដល់សហគមន៍ជនជាតិភាគតិចនៅស្រែអំពិល និងភូមិនានាដែរ ដែលមានផលប៉ះពាល់ហ្នឹង»។
អ្នកសម្របសម្រួលការងារអភិវឌ្ឍន៍សហគមន៍ជនជាតិភាគតិចក្នុងស្រុកកែវសីមា លោក ដេន ណារ៉ា បានឲ្យដឹងថា ទោះយ៉ាងណាក្ដី អ្នកភូមិបានរងគ្រោះរួចទៅហើយ ពីព្រោះពួកគាត់រស់នៅពឹងតែទៅអនុផលព្រៃឈើតាំងពីដូនតាមក ប៉ុន្តែតំបន់ព្រៃកាន់តែរួមតូច ធនធានព្រៃសំខាន់ៗដែលស្ថិតក្នុងរង្វង់ការពារដោយច្បាប់ ក៏មិនអាចការពារបាន ហើយបច្ចុប្បន្នវាកំពុងបាត់បង់ស្ទើរតែអស់ទៅហើយ។
លោក ដេន ណារ៉ា៖ «មុនដែលក្រុមហ៊ុនចូលមកកន្លែងហ្នឹង ជាកន្លែងពួកគាត់រកជ័រ រកចុងផ្ដៅអីទៅតាមប្រពៃណីពួកគាត់។ ខ្ញុំគិតថា វាប៉ះពាល់ហើយដល់ការរកស៊ីរបស់គាត់មែនទែនតែម្ដង ជាទូទៅគាត់រកមិនត្រឹមតែកន្លែងកៀកៗភូមិហ្នឹងទេ គឺគាត់រកទូទៅអ៊ីចឹង»។
របាយការណ៍ពីប្រជាសហគមន៍ និងមន្ត្រីអង្គការក្រៅរដ្ឋាភិបាលនានា បានបង្ហាញថា ក្នុងចំណោមប្រភេទដើមឈើសំខាន់ៗ ដែលអ្នកភូមិអាចយកជ័របាន ដូចជាដើមឈើទាល និងដើមត្រាចជាដើមនោះ កាលពីមុនមានជាង ៤ពាន់ដើម នៅក្នុងតំបន់ព្រៃអភិរក្សរបស់សហគមន៍ស្រែអំពិល ប៉ុន្តែបច្ចុប្បន្នវាបានបាត់បង់អស់ជាង ២ពាន់ដើមទៅហើយ ដោយសារមានជនល្មើសលួចកាប់ឈើធ្វើអាជីវកម្ម។
អ្នកភូមិបានកត់សម្គាល់ថា ការបាត់បង់លឿនបំផុត គឺក្រោយពេលកើតមានក្រុមហ៊ុនវិនិយោគលើដីសម្បទានសេដ្ឋកិច្ចដែលផ្ដល់ដោយរដ្ឋាភិបាលនៅតំបន់នោះ កាលពីខែមេសា ឆ្នាំ២០១១នេះ៕