តុលាការខេត្តសៀមរាបបានចោទប្រកាន់បុរស ២នាក់ ពីបទថាបានដឹកជញ្ជូន និងប្រមូលផល អនុផលព្រៃឈើដែលមានដោយកម្រ ដើម្បីយកទៅធ្វើអាជីវកម្មខុសច្បាប់ បន្ទាប់ពីអ្នកទាំង២នោះ ត្រូវមន្ត្រីរដ្ឋបាលព្រៃឈើចាប់ខ្លួន នៅពេលដែលកំពុងដឹកជញ្ជូនឈើលួចលាក់តាមរថយន្តកូរ៉េ ១គ្រឿង ដោយកប់បន្លំជាមួយដំឡូងមីនិងអង្កាមផងនោះ។
លោក ហុក ពៅ ចៅក្រមស៊ើបសួរដែលកាន់សំណុំរឿងក្ដីនោះ បានមានប្រសាសន៍កាលពីព្រឹកថ្ងៃច័ន្ទ ទី១៤ ខែមិនាថាលោកបានសម្រេចឲ្យធ្វើការឃុំខ្លួនបុរសឈ្មោះ យាន ទិន អាយុ២៩ឆ្នាំ និងម្នាក់ទៀតឈ្មោះ វ៉ាន់ ម៉ាច អាយុ២៧ឆ្នាំ ជាបណ្ដោះអាសន្ននៅក្នុងពន្ធនាគារដើម្បីបន្តការស៊ើបសួរ កាលពីរសៀលថ្ងៃអាទិត្យ ៖ "ចោទពីបទដឹកជញ្ជូន និងប្រមូលផល អនុផលព្រៃឈើដែលមានដោយកម្រ។ គាត់នឹងមានទោសពិន័យផង និងទោសត្រូវផ្ដន្ទាទោសជាប់ពន្ធនាគារផង ហើយក្នុងចំណោម ២នាក់ហ្នឹងមានម្នាក់ជាអ្នកស៊ីឈ្នួលបើករថយន្តដែលគាត់គេជួលគាត់ណា"។
មន្ត្រីរដ្ឋបាលព្រៃឈើបានឲ្យដឹងថា គេបានចាប់ខ្លួនបុរសទាំង ២នាក់ នោះ កាលពីព្រឹកថ្ងៃអាទិត្យ នៅពេលដែលគេឃើញរថយន្តកូរ៉េ ១គ្រឿង បានដឹកដំឡូង និងដាក់អង្កាមពីលើ ហើយសមត្ថកិច្ចមានការសង្ស័យ និងធ្វើការឆែកឆេរ។
លោក ម៉ុង ប៊ុនលីម នាយសង្កាត់រដ្ឋបាលព្រៃឈើកន្ទួតខ្នារក្រៅ បានមានប្រសាសន៍ថានៅពេលដែលមន្ត្រីជំនាញព្រៃឈើកាក់រថយន្តនោះឆែកឆេរក៏ប្រទះឃើញសុទ្ធតែឈើប្រណីតប្រភេទគ្រញូង ដែលជាឈើកម្រប្រមាណ ៤ម៉ែត្រកូប និង៣ផ្លាន។
មន្ត្រីដដែលបានមានប្រសាសន៍ថា តាមការសាកសួរជនទាំងពីរនាក់នោះ បានឆ្លើយថាឈើទាំងនោះគេបានដឹកចេញពីតំបន់ភូមិស្រអែម ចម្ងាយប្រមាណ ២៧គីឡូម៉ែត្រភាគខាងកើតពីតំបន់ប្រាសាទព្រះវិហារ ៖ "ដល់កន្លែងទីស្នាក់ការរបស់ខ្ញុំហ្នឹង គ្នាយើងបានពិនិត្យទៅឃើញថាឡានហ្នឹងបានដាក់ដំឡូង និងដាក់អង្កាមពីលើយើង មើលទៅស្មានតែដឹកស្រូវ ប៉ុន្តែមានលក្ខណធ្ងន់ប្លែកខុសពីឡានដទៃទៀត ដល់ហើយក៏យើងធ្វើការសាកល្បងឆែកឆេរមើលទៅ ក៏ឃើញគ្រញូងនោះចំនួន ៣៧ដុំ"។
ព័ត៌មានចុងក្រោយបានឲ្យដឹងថា មន្ត្រីសង្កាត់រដ្ឋបាលព្រៃឈើដដែល បានចាប់រថយន្តដឹកឈើម៉ាកកូរ៉េចំណុះ ២តោនកន្លះ ១គ្រឿងទៀត កាលពីព្រឹក ថ្ងៃច័ន្ទ ទី១៤ ខែមិនានេះ។
មន្ត្រីសង្កាត់រដ្ឋបាលព្រៃឈើកន្ទួតខ្នារក្រៅ បានឲ្យដឹងថាចាប់តាំងពីដើមខែមករារហូតមក ដល់ពាក់កណ្ដាលខែមិនា ឆ្នាំ២០១១ នេះ គេបានបង្ក្រាបអំពើដឹកជញ្ជូនឈើធ្វើអាជីវកម្មខុសច្បាប់ ដែលជាសកម្មភាពរបស់ក្រុមឈ្មួញ បានចំនួន១០លើក ដោយបានរឹបអូសឈើខុសច្បាប់ប្រភេទគ្រញូង និងត្រសេកចំនួនជាង ២០ម៉ែត្រកូប និងបានចាប់ខ្លួនអ្នកដឹកជញ្ជូនឈើខុសច្បាប់ចំនួន ៧នាក់ហើយ បញ្ជូនទៅតុលាការ៕