លោកវេជ្ជបណ្ឌិត ដួង សុជាតិ ប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់របស់ក្រសួងសុខាភិបាល បានមានប្រសាសន៍នៅថ្ងៃទី២៣ កុម្ភៈ ឲ្យដឹងថា នៅក្នុងឆ្នាំ២០០៩កន្លងទៅ ចំនួនអ្នកកើតជំងឺគ្រុនចាញ់មានការកើនឡើងជាងឆ្នាំ២០០៨ ដោយក្នុងឆ្នាំ២០០៩ មានអ្នកកើតជំងឺគ្រុនចាញ់ប្រមាណ៨ម៉ឺនករណី ហើយមានស្លាប់ចំនួន២៨០នាក់ ច្រើនជាងឆ្នាំមុនដែលមានអ្នកស្លាប់ចំនួន២០០នាក់ប៉ុណ្ណោះ។
លោកវេជ្ជបណ្ឌិត ដួង សុជាតិ បានមានប្រសាសន៍ឲ្យដឹងថា មូលហេតុនៃការកើនឡើងចំនួនអ្នកមានជំងឺគ្រុនចាញ់មានច្រើន ក្នុងនោះដោយសារមានការប្រែប្រួលធាតុអាកាសដែលធ្វើឲ្យមូសដែលជាសត្វចម្លងមេរោគគ្រុនចាញ់ឆាប់ពងនិងឆាប់ញាស់ជាដើម។
លោកវេជ្ជបណ្ឌិត ដួង សុជាតិ បានឲ្យដឹងដូច្នេះ ៖ «កើនជាង២០០៨បន្តិច ព្រោះឆ្នាំ២០០៩ យើងឃើញកត្តាខ្លះធ្វើឲ្យមានការកើន ដូចជាមានភ្លៀងធ្លាក់ដើមឆ្នាំលឿនពេក អ៊ីចឹងវាបង្កឲ្យមានជម្រកមូសច្រើន ហើយមុងដែលយើងកុម្ម៉ង់តាមអង្គការសុខភាពពិភពលោកមកយឺត មកតាំងពីខែ៤ ខែ៥បានមកដល់ អ៊ីចឹងភ្លៀងធ្លាក់ហើយ ហើយការចែកចាយទម្រាំដឹកទៅដល់កន្លែងផ្សេងទៀត អ៊ីចឹងទាល់តែខែ៦ ខែ៧ បានយើងបានចែក អ៊ីចឹងវាមានការយឺតយ៉ាវក្នុងការការពារប្រជាជន។ ទី៣ យើងឃើញថា ប្រជាជនក្នុងឆ្នាំ២០០៩ មានការចល័តច្រើន ហើយយើងឃើញការដ្ឋានធំៗដែលគេត្រូវការកម្មករច្រើន អ៊ីចឹងយើងឃើញថា កម្មករទាំងនោះគាត់ទៅទាំងប្រពន្ធកូន អ៊ីចឹងគាត់ជាជនចំណូលថ្មី នៅកន្លែងដីថ្មី គាត់អត់បានការពារ គាត់អត់យល់រឿងគ្រុនចាញ់ អ៊ីចឹងបានយើងឃើញថា មានកើតជំងឺគ្រុនចាញ់ច្រើនមែនទែន។ ចំណុចមួយទៀត គឺដោយសាររដ្ឋាភិបាលកសាងផ្លូវអីច្រើននៅតាមជនបទ អ៊ីចឹងទៅប្រជាជនងាយស្រួលមករកសេវារបស់យើងប្រើប្រាស់ច្រើនវិញ អ៊ីចឹងយើងឃើញចំនួនប្រជាជនមកប្រើសេវារដ្ឋមានការកើនឡើង អ៊ីចឹងក្នុងនោះក៏ធ្វើឲ្យជំងឺគ្រុនចាញ់យើងមានតួលេខកើនតាមគេអ៊ីចឹងដែរ»។
ចំពោះវិធានការការពារជំងឺគ្រុនចាញ់វិញ លោកវេជ្ជបណ្ឌិត ដួង សុជាតិ បានមានប្រសាសន៍ថា ប្រជាពលរដ្ឋត្រូវតែសម្រាកក្នុងមុងដើម្បីការពារមូសខាំ ៖ «វិធានការការពារយើង យើងសង្កត់ធ្ងន់ទៅលើមុងជ្រលក់ថ្នាំ ធ្វើម៉េចឲ្យប្រជាជនគាត់យកមុងទៅប្រើឲ្យបានត្រឹមត្រូវ។ ទី២ ធ្វើយ៉ាងណាឲ្យគាត់ឆាប់រកសេវាព្យាបាលដែលនៅជិតភូមិគាត់ ឬក៏ទៅរកអ្នកស្ម័គ្រចិត្តភូមិដែលយើងបានបង្កើតហើយនៅតាមភូមិឃុំរបស់គាត់ហ្នឹង ធ្វើម៉េចឲ្យបានទាន់ពេល កុំរង់ចាំទៅព្យាបាលសេវាឯកជន ឬទិញថ្នាំព្យាបាលខ្លួនឯងដែលជាប្រការមួយធ្វើឲ្យគ្រុនចាញ់ធ្ងន់ធ្ងរអាចធ្វើឲ្យស្លាប់បាន»។
ក្នុងចំណោមរាជធានីខេត្តទាំង២៤នៅប្រទេសកម្ពុជា ខេត្តដែលកើតមានជំងឺគ្រុនចាញ់ច្រើនជាងគេ គឺមានខេត្តកំពង់ចាម ក្រចេះ ស្ទឹងត្រែង រតនគិរី មណ្ឌលគិរីនិងកោះកុង៕