ខ្សែអាត់របស់លោកសូណង់ដូ បង្ហាញថាលោកគ្មានពាក់ព័ន្ធនឹងលោកសួនសេរីរដ្ឋា
h092212in.mp3
ខ្សែអាត់សំឡេងនោះ ត្រូវបានអះអាងថា អាចជាតឹកតាងបញ្ជាក់ពីភាពស្អាតស្អំរបស់លោក ហើយក៏ធ្លាប់ត្រូវបានស្នើទៅតុលាការឲ្យយកជាភស្តុតាង ក្នុងរឿងក្តីចោទប្រកាន់លោកដែរ តែចៅក្រមបដិសេធ។
សាលាដំបូងរាជធានីភ្នំពេញ បានបញ្ចប់សវនាការរយៈពេល ៣ថ្ងៃកន្លះរបស់ខ្លួន កាលពីថ្ងៃទី១៤ ខែកញ្ញា លើសំណុំរឿងចោទប្រកាន់របស់រដ្ឋាភិបាលកម្ពុជា ទៅលើលោក ម៉ម សូណង់ដូ ប្រធានវិទ្យុសំបុកឃ្មុំ និងជនជាប់ចោទមួយចំនួនទៀតថា ជាអ្នកប៉ុនប៉ងបង្កើតតំបន់អបគមន៍នៅខេត្តក្រចេះ។
ព្រះរាជអាជ្ញា បានប្រកាសចោទលោក ម៉ម សូណង់ដូ ថា បានសហការជាមួយប្រធានចលនាអំណាចពលរដ្ឋខ្មែរ គឺលោក សួន សេរីរដ្ឋា ដើម្បីផ្ដួលរំលំរដ្ឋាភិបាលកម្ពុជា។
នៅក្រោយសវនាការនោះបានបញ្ចប់ វិទ្យុសំបុកឃ្មុំ បានផ្សព្វផ្សាយពីខ្លឹមសារមួយចំនួននៃសម្ដីរបស់លោក ម៉ម សូណង់ដូ ដែលថ្លែងនៅតាមបណ្ដាវេទិកាសាធារណៈ ដែលលោកបានចូលរួមជាមួយប្រធានអំណាចពលរដ្ឋខ្មែរនៅសហរដ្ឋអាមេរិក។
ខ្លឹមសារសំខាន់ៗមួយចំនួននៃសម្ដីរបស់ប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ លោក ម៉ម សូណង់ដូ ដែលត្រូវបានចាក់ផ្សាយតាមវិទ្យុសំបុកឃ្មុំ បានបញ្ជាក់ថា លោកពុំមាននិន្នាការចូលរួម ឬមានជាប់ពាក់ព័ន្ធជាមួយចលនាអំណាចពលរដ្ឋរបស់លោក សួន សេរីរដ្ឋា នោះឡើយ។
ក្នុងការចាក់ផ្សាយរយៈពេល ១៦នាទី ដោយមានអ្នកអធិប្បាយអមផង គេបានផ្សាយឡើងវិញនូវខ្លឹមសារសំខាន់ៗទាំងនោះ នៅក្រោយពេលដែលតុលាការក្រុងភ្នំពេញ បានបញ្ចប់សវនាការលើសំណុំរឿង លោក ម៉ម សូណង់ដូ និងអ្នកពាក់ព័ន្ធ កាលពីថ្ងៃទី១៤ ខែកញ្ញា និងសម្រេចថា នឹងប្រកាសសាលក្រមនៅថ្ងៃទី១ ខែតុលា ខាងមុខ។
គេបានរំលឹកថា រាល់ពេលដែលលោក ម៉ម សូណង់ដូ ជួបជាមួយពលរដ្ឋនៅសហរដ្ឋអាមេរិក និងនៅក្នុងសមាជប្រចាំឆ្នាំលើកទី២ នៃចលនាអំណាចពលរដ្ឋខ្មែរ នៅក្រុងលីនវូដ (Lynnwood) រដ្ឋវ៉ាស៊ីនតោន (Washington) កាលពីខែមីនា និងមេសា ឆ្នាំ២០១២ កន្លងទៅ លោក ម៉ម សូណង់ដូ តែងតែបានថ្លែងបញ្ជាក់ទុកជាមុនថា លោកទៅនិយាយក្នុងនាមប្រធានវិទ្យុសំបុកឃ្មុំ និងជាប្រធានចលនាប្រជាធិបតេយ្យ ហើយបើទោះជាយ៉ាងណា លោក និងចលនាអំណាចពលរដ្ឋខ្មែរ ដែលមានមូលដ្ឋាននៅសហរដ្ឋអាមេរិក គឺពុំអាចចូលរួមជាមួយគ្នាបានទេ ពីព្រោះឆន្ទៈខុសគ្នា និងមានទិសដៅ គោលបំណង មិនដូចគ្នាទេ៖ «ខ្ញុំមិនអាចចូលរួមចលនាអំណាចពលរដ្ឋខ្មែរ ពីព្រោះខ្ញុំរស់នៅក្នុងព្រះរាជាណាចក្រកម្ពុជា មានច្បាប់រដ្ឋធម្មនុញ្ញ មានព្រះមហាក្សត្រ ទិសដៅ និងគោលដៅរបស់សមាគមអ្នកប្រជាធិបតេយ្យ និងជាប្រធានវិទ្យុសំបុកឃ្មុំ»។
ជាមួយគ្នានេះ លោក ម៉ម សូណង់ដូ ក៏បានលើកឡើងពីលក្ខន្តិកនៃសមាគមរបស់លោក និងថាជានិច្ចកាលសមាគមនេះធ្វើការទៅតាមលំអានច្បាប់កម្ពុជា ដែលផ្ទុយគ្នាពីចលនាប្រជាពលរដ្ឋរបស់លោក សួន សេរីរដ្ឋា៖ «ចំណែកចលនាអំណាចពលរដ្ឋ គេប្រើច្បាប់របស់សហរដ្ឋអាមេរិក ដូច្នេះ ដែលអនុញ្ញាតអោយខ្ញុំអង្គុយកៅអីជិតគ្នាហ្នឹង គឺជាខ្មែរដូចគ្នា។ សិទ្ធិសេរីភាព ហើយនិងអធិបតេយ្យភាព ឯករាជ្យ គឺចលនាអំណាចពលរដ្ឋខ្មែរហ្នឹង គេមានរបស់គេ។ ចំពោះខ្ញុំ គឺមានរបស់ខ្ញុំ ដែលមិនអាចលូកដៃចូលអ្នកណាទេ»។
បន្ទាប់មកទៀត នៅក្នុងពេលលោកទៅជួបជាមួយពលរដ្ឋខ្មែរ នៅអូរីហ្គេន (Oregon) សហរដ្ឋអាមេរិក ដែរនោះ លោក ម៉ម សូណង់ដូ បានអះអាងថា វត្តមានរបស់លោកនៅក្នុងសមាជប្រចាំឆ្នាំលើកទី២ របស់ចលនាអំណាចពលរដ្ឋនោះ គឺក្នុងតួនាទីជាអ្នកសារព័ត៌មានសុទ្ធសាធ ។ លោកថា លោកចង់ស្វែងយល់ពីគ្រប់ប្រភេទក្រុមមនុស្ស ដោយពុំរើសមុខឡើយ៖ «ខ្ញុំមិនត្រឹមតែជាប្រធានសមាគមទេ តែក៏ជាប្រធានសំបុកឃ្មុំ ហេតុដូច្នោះ ខ្ញុំក៏ជាអ្នកសារព័ត៌មាន។ ហើយបើនិយាយពីនាទីអ្នកសារព័ត៌មានទៅជួបអ្នកណាក៏បាន។ ទៅជួបមេចោរក៏បាន សួរអ្នកឯងរឿងអីបាន ចូលចិត្តលួចម្ល៉េះ។ ហើយទៅជួបអ្នកក្បត់ជាតិក៏បាន សួរថាតើហេតុអ្វីបានជាអ្នកឯងចូលចិត្តកាត់ដីអោយយួនម្ល៉េះ ហ្នឹងជាឧទាហរណ៍»។
ពាក់ព័ន្ធនឹងចលនាងើបឡើងរបស់ពលរដ្ឋនៅតាមបណ្ដាប្រទេសមួយចំនួន ដើម្បីផ្លាស់ប្ដូរការគ្រប់គ្រងរដ្ឋាភិបាលកម្ពុជាបច្ចុប្បន្ន លោក ម៉ម សូណង់ដូ បានបញ្ជាក់ថា លោកពុំគាំទ្រចលនាបែបនេះឡើយសម្រាប់បរិបទកម្ពុជា៖ «រឿងប្រើអំពើហិង្សា ទោះត្រូវក្តី ក៏មិនត្រូវប្រើដែរ។ អារឿងចលនាបំបះបំបោរធ្វើដូចម្តេចអោយមានកាប់សម្លាប់ដូចជំនាន់ខ្មែរក្រហម ឬក៏ដូចជាទុយនេស៊ី ឬនៅក្នុងអេហ្ស៊ីប ឬក្នុងប្រទេសក្នុងតំបន់អារ៉ាប់ មួយចំនួនផ្សេងទៀត ដែលគេធ្វើបានជោគជ័យហ្នឹង ខ្ញុំអត់គាំទ្រទេ ពីព្រោះខ្ញុំចង់ដោះស្រាយរឿងច្បាប់ គឺការបោះឆ្នោតហ្នឹង»។
ការផ្សព្វផ្សាយតាមវិទ្យុសំបុកឃ្មុំ ពីសម្រង់សម្ដីរបស់ប្រធានវិទ្យុនេះ បង្ហាញថា លោក ម៉ម សូណង់ដូ ព្យាយាមរលាស់ខ្លួនចេញពីការចោទប្រកាន់រូបលោកថា បានជាប់ពាក់ព័ន្ធនឹងចលនាអំណាចពលរដ្ឋខ្មែររបស់លោក សួន សេរីរដ្ឋា ក្នុងកិច្ចសហការក្នុងបំណងចង់ផ្ដួលរំលំរដ្ឋាភិបាលកម្ពុជា។
នៅក្នុងសវនាការនៅសាលាដំបូងរាជធានីភ្នំពេញ កន្លងទៅ មេធាវីការពារក្ដីអោយលោក ម៉ម សូណង់ដូ គឺលោក សុក សំអឿន បានស្នើឲ្យតុលាការទទួលយកនូវភស្តុតាងមួយចំនួនរបស់កូនក្តីលោកជាប្រភេទខ្សែអាត់សំឡេង ដើម្បីជាភស្តុតាងដោះបន្ទុកលោក ម៉ម សូណង់ដូ ពីការចោទប្រកាន់នេះ ប៉ុន្តែត្រូវចៅក្រមជំនុំជម្រះបដិសេធ។
ព្រះរាជអាជ្ញារង លោក មាស ច័ន្ទពិសិដ្ឋ នៅក្នុងពេលសន្និដ្ឋានបញ្ចប់សវនាការលើលោក ម៉ម សូណង់ដូ និងអ្នកពាក់ព័ន្ធ កាលពីថ្ងៃទី១៤ ខែកញ្ញា បានបញ្ជាក់ថា គេពុំឃើញមានភស្តុតាងជាក់លាក់ថា ការជួបគ្នានៅក្រៅប្រទេសរបស់ លោក ម៉ម សូណង់ដូ ជាមួយលោក សួន សេរីរដ្ឋា នៅក្នុងប្រទេសថៃ និងនៅសហរដ្ឋអាមេរិកនោះ ថាជាទំនាក់ទំនងធម្មតា ឬក្នុងនាមជាអ្នកសារព័ត៌មាន និងថា កន្លងមក លោក ម៉ម សូណង់ដូ ពុំដែលបង្ហាញជំហរមិនគាំទ្រចំពោះលោក សួន សេរីរដ្ឋា នោះដែរ។
ករណីដែលសវនាការបានបញ្ចប់ ហើយភស្តុតាងមួយចំនួនដែលរំពឹងថា អាចដោះបន្ទុកលោក ម៉ម សូណង់ដូ នោះ ពុំត្រូវបានបង្ហាញដល់អង្គសវនាការនោះ ធ្វើឲ្យក្រុមអ្នកច្បាប់ដែលបានឃ្លាំមើលដំណើររឿងនេះ បានលើកឡើងថា គេនឹងអាចស្នើឲ្យតុលាការទទួលយកភស្តុតាងនោះជាថ្មីទៀត ប្រសិនបើរឿងក្ដីនេះត្រូវបន្តដល់សាលាឧទ្ធរណ៍។
ប្រធានផ្នែកស៊ើបអង្កេតរបស់សមាគមការពារសិទ្ធិមនុស្សអាដហុក លោក នី ចិយា មានប្រសាសន៍ថា ការមិនទទួលយកភស្តុតាង ដែលជាការដោះបន្ទុកជនជាប់ចោទ គឺជាទង្វើខុសនីតិវិធីរបស់ចៅក្រម។ លោកថា បើមេធាវីទទួលស្គាល់ថា ភស្តុតាងនោះមានតម្លៃដោះបន្ទុក គេអាចស្នើឡើងនៅក្នុងសវនាការនៅតុលាការបន្ទាប់ទៀត៖ «ការពិត ចៅក្រមមិនគួរបដិសេធការដាក់ភស្តុតាងទេ។ គេអាចបដិសេធតែខ្លឹមសារនៃភស្តុតាង មិនអាចទាត់ចោលភស្តុតាងទេ នៅពេលណាមិនទាន់ដឹងថា ភស្តុតាងនោះត្រូវដោះបន្ទុក ឬដាក់បន្ទុក ឬក៏អីផង ហើយគេមិនអោយដាក់ភស្តុតាងហ្នឹង គឺជាកំហុស»។
បើទោះជាយ៉ាងណា អ្នកឃ្លាំមើលបានអំពាវនាវដល់រដ្ឋាភិបាលកម្ពុជា អោយដោះស្រាយបញ្ហានេះតាមការសម្របសម្រួលផ្នែកនយោបាយ នឹងផ្ដល់ការព្រមានដល់ប្រធានវិទ្យុនេះពីការផ្សព្វផ្សាយរបស់គាត់ជាជាងការប្រើប្រាស់មធ្យោបាយតុលាការ ដើម្បីដាក់ទោសទណ្ឌ៖ «គឺអាចព្រមាន ឧទាហរណ៍ថា យកមកផ្សាយខុសអ៊ីចឹងទៅ ក្រសួងព័ត៌មានហ្នឹងអាចចេញលិខិតណែនាំទៅ កុំអោយផ្សាយអ៊ីចឹងទៅ។ វាល្អជាងការដែលប្រើប្រាស់ប្រព័ន្ធតុលាការមកដាក់ទោសទណ្ឌ វាធ្វើអោយប៉ះពាល់កិត្តិយសតុលាការខ្មែរយើងផង និងកិត្តិយសថ្នាក់ដឹកនាំផង»។
សវនាការសំណុំរឿងក្ដីជម្លោះដីធ្លី បង្កើតតំបន់អបគមន៍ប្រឆាំងរដ្ឋាភិបាល នៅខេត្តក្រចេះ បានបើកចាប់តាំងពីថ្ងៃអង្គារ ទី១១ ខែកញ្ញា ឆ្នាំ២០១២ ដោយមានជនជាប់ចោទសរុបចំនួន ១០នាក់ រាប់ទាំងលោក ម៉ម សូណង់ដូ និងឈ្មោះ ប៊ុន រដ្ឋា ដែលកំពុងគេចខ្លួន។
ក្នុងរឿងក្ដីជម្លោះដីធ្លី នៅខេត្តក្រចេះ តុលាការបានចោទប្រកាន់លោក ម៉ម សូណង់ដូ និងអ្នកពាក់ព័ន្ធ ពីបទប្រឆាំងអ្នករាជការសាធារណៈ កុបកម្ម ជ្រៀតជ្រែកខុសច្បាប់ក្នុងការបំពេញមុខងារសាធារណៈ ញុះញង់ឲ្យប្រជាពលរដ្ឋកាន់កាប់អាវុធខុសច្បាប់ និងដឹកជញ្ជូនអាវុធដោយគ្មានការអនុញ្ញាត។ ប្រសិនបើរកឃើញថាមានកំហុស លោក ម៉ម សូណង់ដូ ដែលមានវ័យជាង ៧០ឆ្នាំ ប្រឈមនឹងជាប់ពន្ធនាគារយូរបំផុតរហូត ៣០ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
When you need the time and strength to develop our country. You create the problem with your innocent people. Can you take a break and think again, how can Ta Mam Sonando create a war with two arrow? Please don't be afraid of losing power unless you you nothing for the country. Please release him from the present and say sorry to him. The let the world look down on you and the whole Cambodian Nation.
If you real love our country don't waste your time to use the court as your weapon. Bring Cambodian to the wealthy Country rather than beg from other countries to feed your people.
Sep 29, 2012 06:59 AM
អ្នកអានអនាមិក
តើអ្នកចោទគេថាចង់វាយរំលំរដ្ធាភិបាលទាំងនោះ ធ្វើជាល្ងង់ឬជាឆ្កួត
មនុស្សចេះដឹងស្គាល់អ្វីថាជាអ្វីដូចលោកម៉មសូណង់ដូ មិនល្ងង់ទៅធ្វើដូចគេចោទនោះទេរ
គាត់ឆ្លាតជាងនេះឆ្ងាយណាស់ ដូច្នេះសូមអ្នកចោទអស់នោះឈប់ធ្វើល្ងង់ធ្វើឆ្កួតទៀតទៅ!
Sep 25, 2012 11:02 PM
អ្នកអានអនាមិក
ពី PPរដ្ឋាភិបាលខែ្មរប្រសព្វធ្វើឆ្កួតណាស់ ព្រោះថាបញ្ជាតុលាការខែ្មរឲ្យចាប់អ្នកមិនមានទោសថាមានទោស
Sep 25, 2012 10:38 PM
អ្នកអានអនាមិក
CAN PUBLIC READ JUDGMENT OPINIONS ALL THE PREVOURS CASES THAT THE COURT HAS DECIDED.
Sep 25, 2012 08:23 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
