តាមប្រជាពលរដ្ឋនៅកន្លែងកើតហេតុដែលបានឃើញហេតុការណ៍ បានឲ្យដឹងថា នៅព្រឹកថ្ងៃទី២២ កញ្ញានេះ មានប៉ូលិសប្រមាណពី ៣០ ទៅ ៤០នាក់ រួមមានអាវុធគ្រប់ដៃ អមដោយព្រះរាជអាជ្ញាតុលាការក្រុងនិងមន្រ្តីសុរិយោដីក្រុងផង បានចុះទៅវាស់ដីមានទំនាស់នៅតំបន់សេអ៊ី៥ ក្នុងភូមិភូធឿង សង្កាត់ប៊ិតត្រាំង ហើយត្រូវប្រជាពលរដ្ឋរស់នៅតំបន់នោះរារាំងមិនឲ្យវាស់ ដោយសំអាងថា ដីជាង១១០ហិកតារនោះ កាន់កាប់ដោយប្រជាពលរដ្ឋចំនួន១២៦គ្រួសារ ហើយកំពុងប្តឹងផ្ដល់គ្នានៅតុលាការនៅឡើយ។
ប្រជាពលរដ្ឋមួយរូបឈ្មោះ ចាន់ថា ដែលបានឃើញហេតុការណ៍បានឲ្យដឹងថា ៖ «មានប្រទូសប្រទាំងគ្នា ហើយចាប់ប្រជាពលរដ្ឋទៅម្នាក់»។
លោក ចាន់ ចំរើន អ្នកឃ្លាំមើលរបស់សមាគម អាដហុក នៅក្រុងព្រះសីហនុ ដែលបានចុះផ្ទាល់តាមដានហេតុការណ៍នៅកន្លែងកើតហេតុបានឲ្យដឹងថា ៖ «ក្រោយពីវាស់វែងហ្នឹងប្រជាពលរដ្ឋគាត់បានហាមមិនឲ្យវាស់វែង ដោយសារគាត់និយាយថា ដីនោះនៅចំណុចនោះ វាមានចំណុចមិនប្រក្រតីជាច្រើនដែលគាត់ឆែកមើលឃើញនៅក្នុងប័ណ្ណ។ គាត់មិនឲ្យវាស់វែងទេ ព្រោះដីហ្នឹងដីទំនាស់ គាត់ចង់ឲ្យដោះស្រាយរួចរាល់ជាមុនសិន ទើបបានវាស់។ ពេលហ្នឹងមានការប្រទាញប្រទង់គ្នា រហូតដល់ការប្រើអំពើហិង្សាទៅលើប្រជាពលរដ្ឋម្នាក់ ភេទប្រុស អាយុ ២៣ឆ្នាំ គឺថា វ៉ៃគាត់រហូតដល់ប៉ោងភ្នែក ហើយមានឈាមហូរតាមភ្នែកទៀត។ វ៉ៃដំគាត់ហ្នឹង ហើយចាប់បោះមកលើឡាន ដាក់ខ្នោះយកមកសួរចម្លើយ...។ ម្នាក់ហ្នឹងគាត់បានបណ្ដើរឆ្កែ មើលព្រឹត្តិការណ៍ហ្នឹងដែរ គាត់ប្រជាពលរដ្ឋមានដីនៅហ្នឹងដែរ បានបណ្ដើរឆ្កែទៅមើល ហើយប្រជាពលរដ្ឋមួយចំនួនហ្នឹង អត់ហាមឃាត់ ដល់ពេលអ៊ីចឹងខាងប៉ូលិស បានរកចាប់មនុស្សមួយចំនួន អ៊ីចឹងពួកខ្ញុំចាប់មិនបាន ទៅបានចោទគាត់ថាប្រើអំពើហិង្សាលើប៉ូលិស ហើយខាងសាមីខ្លួនគាត់ ហើយខាងក្រុមគ្រួសារ បានបដិសេធថាមិនបានប្រើទេ»។
ស្នងការប៉ូលិសក្រុងព្រះសីហនុ លោក តាក វណ្ណថា បានប្រសាសន៍ឲ្យដឹងថា ការប៉ះទង្គិចគ្នានោះដោយសារមនុស្សមួយចំនួនបានទៅរស់នៅបំពានលើដីគេដែលមានម្ចាស់មានកម្មសិទ្ធិត្រឹមត្រូវ។
តាមប្រជាពលរដ្ឋនិងបុគ្គលិក អាដហុក ឲ្យដឹងថា តំណាងម្ចាស់ដីដែលបានសុំឲ្យប៉ូលិសចុះជួយការពារការវាស់ដីនៅថ្ងៃទី២២ កញ្ញានេះ មានឈ្មោះលោក ដាន តារា និងលោក ប៉ិល រតនា។
វិទ្យុអាស៊ីសេរីមិនអាចទាក់ទងលោក ដាន តារា និងលោក ប៉ិល រតនា បាននៅឡើយទេ។
សូមជំរាបថា ទំនាស់ដីចំនួនជាង១១០ហិកតារនៅតំបន់ភូមិសេអ៊ី៥ សង្កាត់ប៊ិតត្រាំង ខណ្ឌព្រៃនប់នេះ មានតាំងពីឆ្នាំ២០០៦មកម្ល៉េះរវាងប្រជាពលរដ្ឋប្រមាណ១២៦គ្រួសារជាមួយម្ចាស់ដីមួយចំនួនដែលបានអះអាងថា មានប័ណ្ណកម្មសិទ្ធិស្របច្បាប់ត្រឹមត្រូវ តែអ្នករស់លើដីនោះបានអះអាងថា ពួកគេបានមកកាន់កាប់រស់លើដីតាំងពីឆ្នាំ១៩៩៣ ឬ ៩៤, ៩៥ មកម្ល៉េះ ហើយគេថា ដីនេះជាដីរបស់រដ្ឋ៕