លោក សឹម ឈិន ជាប្រធានប៉ុស្តិ៍រដ្ឋបាលនគរបាលនៅក្នុងឃុំបឹងខ្យាង ស្រុកកណ្តាលស្ទឹង ខេត្តកណ្តាល បានមានប្រសាសន៍ប្រាប់វិទ្យុអាស៊ីសេរីថា បុរសនោះកំពុងត្រូវគេឃុំខ្លួននៅអធិការដ្ឋាននគរបាល។ សមត្ថកិច្ចកំពុងតែបន្តកសាងសំណុំរឿងប្តឹងទៅតុលាការនាពេលឆាប់ៗនេះទៀតដើម្បីផ្តន្ទាទោសតាមច្បាប់។
លោក សឹម ឈិន បានបញ្ជាក់ថា ៖ «ចាប់ពីថ្ងៃម្សិលមិញពីបទប្រើអំពើហិង្សាវ៉ៃកូនដល់សន្លប់។ ខាងព្រហ្មទណ្ឌគេយកទៅខាងតុលាការដំណើរហ្នឹង ជាការព្រមានមួយដល់បងប្អូនទាំងអស់កុំឲ្យយកតម្រាប់តាម។ កុមារីហ្នឹងគឺត្រូវរបួសខ្នងហើយនិងដៃ»។
លោក ម៉ែន មករា ជាមន្រ្តីសម្របសម្រួលនៃអង្គការការពារសិទ្ធិមនុស្សក្រៅរដ្ឋាភិបាល (អាដហុក) នៅក្នុងខេត្តកណ្តាល ដែលកំពុងតែស្វែងរកការផ្តន្ទាទោសបុរសនោះតាមផ្លូវច្បាប់ បានមានប្រសាសន៍ថា លោកចង់ផ្ញើសារសំខាន់មួយទៅគ្រួសារដទៃទៀតមិនឲ្យប្រើប្រាស់អំពើហិង្សាលើកុមារ។
លោក ម៉ែន មករា បានមានប្រសាសន៍ថា ៖ «សង្គមកម្ពុជាយើងសព្វថ្ងៃមានច្បាប់ហើយ ហើយកុំយកវិធីអប់រំកូនដោយការប្រើអំពើហិង្សាហ្នឹង ព្រោះការប្រើអំពើហិង្សាមិនអាចបញ្ចប់បញ្ហាបានទេ»។
ស្រ្តីឈ្មោះ ព្រីង កំសត់ អាយុ៣៥ឆ្នាំ នៅក្នុងភូមិបឹងខ្យាង ឃុំបឹងខ្យាង ស្រុកកណ្តាលស្ទឹង ខេត្តកណ្តាល ត្រូវជាម្តាយកុមារីរងគ្រោះនោះ បានថែ្លងថា លោកស្រីចង់ឃើញសមត្ថកិច្ចផ្តន្ទាទោសស្វាមីនោះតាមច្បាប់។
អ្នកស្រី ព្រីង កំសត់ បានឲ្យដឹងថា ៖ «ចំតែដៃនិងខ្នងហ្នឹង ខ្លាំងជាងគេដៃខាងស្ដាំ។ រាល់ថ្ងៃហ្នឹងវា(ប្ដី)រករឿងយើង វាវ៉ៃកូនវ៉ៃចៅរហូត ហើយខ្ញុំក៏វាវ៉ៃដែរ អត់មានថ្ងៃណាបានសុខទេ! វារករឿង វាផឹកស៊ីអ៊ីចឹងទៅ! ខ្ញុំធ្វើការ ចេញមកវិញខ្ញុំដាំបាយហូបខ្លួនឯង»។
ប្រភពពីសមត្ថកិច្ចនគរបាលនិងគ្រួសារបានឲ្យដឹងថា បុរសនោះឈ្មោះ ហ៊ុយ ម៉េងអាង និងកុមារីរងគ្រោះឈ្មោះ យាង ស្រីកា អាយុ១០ឆ្នាំ រៀនថ្នាក់ទី៣ តែងតែរងគ្រោះដោយសារការវាយដំនិងប្រើអំពើហិង្សាជាប្រចាំនៅពេលដែលឪពុកស្រវឹងស្រា។
ក្រុមសមត្ថកិច្ចមូលដ្ឋាននិងសកម្មជនការពារសិទ្ធិមនុស្សអាដហុកបានចាប់ខ្លួនបុរសនោះកាលពីថៃ្ងសៅរ៍ថ្មីៗនេះ ក្រោមបទចោទថា បានបង្ករបួសស្នាមក្នុងបទល្មើសមជ្ឈិមតាមមាត្រា៤១នៃច្បាប់ព្រហ្មទណ្ឌសម័យអន្តរកាល អ៊ុនតាក់។
ប្រទេសកម្ពុជាមានច្បាប់រដ្ឋធម្មនុញ្ញចែងក្នុងមាត្រា៤៨ស្តីពីការគាំពារសិទ្ធិកុមារ ហើយប្រទេសកម្ពុជាបានចុះហត្ថលេខាលើកតិកាសញ្ញានិងអនុសញ្ញារបស់អង្គការសហប្រជាជាតិស្តីពីការប្រឆាំងនឹងអំពើហិង្សាលើកុមារ។ ក្រៅពីនេះប្រទេសកម្ពុជាមានច្បាប់ស្តីពីការទប់ស្កាត់អំពើហិង្សាក្នុងគ្រួសារនិងការពារជនរងគ្រោះ៕