បុរសម្នាក់រាវរកវត្ថុបុរាណនៅតំបន់អង្គរត្រូវចាប់ខ្លួន
ដោយ សាវយុត
2009-06-28
ប៉ូលិសបេតិកភណ្ឌដែលការពារវត្ថុបូរាណនៅតាមប្រាសាទនៃតំបន់អង្គរខេត្តសៀមរាបបានអះអាងថា គេបានចាប់ខ្លួនបុរសម្នាក់ដែលជាប់ពាក់ព័ន្ធនឹងការធ្វើសកម្មភាពខុសច្បាប់រាវរកនិងជីកយកវត្ថុបូរាណនៅក្នុងបរិវេណប្រាសាទអង្គរធំយកទៅធ្វើការលក់ដូរ។
ប្រាសាទអង្គរវត្តថតនៅឆ្នាំ២០០២។
អនុប្រធានអង្គភាពប៉ូលិសការពារបេតិកភណ្ឌរបស់ស្នងការពិសេស លោក លី ហុកសេង បានមានប្រសាសន៍កាលពីព្រឹកថ្ងៃអាទិត្យ ទី២៨ ខែមិថុនា ថាកងកម្លាំងប៉ូលិសរបស់លោកដែលដើរល្បាតតាមព្រៃនៃតំបន់អង្គរធំបានពើបប្រទះនឹងបុរសម្នាក់ដែលមានម៉ាស៊ីនរាវរកវត្ថុបូរាណផងកំពុងធ្វើសកម្មភាពខុសច្បាប់នៅជិតតំបន់ប្រាសាទកែវ ហើយកងកម្លាំងរបស់លោកក៏បានធ្វើការចាប់ខ្លួនជននោះរូបជាមួយវត្ថុតាងមួយចំនួន។
លោក លី ហុកសេង បានបញ្ជាក់ថា ៖ «កម្លាំងខ្ញុំចេញប្រតិបត្តិការទៅឃើញកំពុងតែធ្វើសកម្មភាពម្ដុំប្រាសាទកែវ ក៏ចាប់។ មានម៉ាស៊ីនរាវ ម៉ាស៊ីនអី ឥឡូវខ្ញុំប្រគល់ឲ្យទៅខាងកម្រិតស្រាលគេធ្វើការ។ យើងមានវិធានការប្រយ័ត្នប្រយែងរៀងរាល់ថ្ងៃដែរ ឥឡូវយើងចេញយប់ជ្រៅអីរាល់តែថ្ងៃដែរ»។
ទោះយ៉ាងណាមន្ត្រីប៉ូលិសបេតិកភណ្ឌមិនបានប្រាប់ឲ្យដឹងពីឈ្មោះបុរសដែលសមត្ថកិច្ចបានចាប់ខ្លួននោះទេ គ្រាន់តែប៉ូលិសនិយាយថា ជនសង្ស័យនោះជាអ្នកមកពីខេត្តផ្សេងមិនមែនជាអ្នករស់នៅក្នុងខេត្តសៀមរាបទេ។
លោក ធុយ វុទ្ធី ជាមន្ត្រីប៉ូលិសបេតិកភណ្ឌប្រចាំប៉ុស្តិ៍ប្រាសាទព្រះខ័ន បានមានប្រសាសន៍ថា ការចាប់ខ្លួនបុរសមានម៉ាស៊ីនរាវរកវត្ថុបូរាណនោះបានធ្វើឡើងកាលពីវេលាម៉ោងប្រមាណ៩ព្រឹកថ្ងៃអាទិត្យនៅតំបន់ជិតប្រាសាទតាណី ភាគខាងកើតទំនប់បារាំង ហើយសមត្ថកិច្ចសង្ស័យថា ជននោះអាចនឹងមានបក្សពួកមួយចំនួនទៀត។
លោក ធុយ វុទ្ធី បានឲ្យដឹងថា ៖ «ចាប់បាននៅខាងប្រាសាទតាណី ខាងកើតទំនប់បារាំងកាលពីព្រឹកមិញ ឃើញចូលទៅរាវរកវត្ថុបូរាណ... យើងធ្វើការតាមវាបណ្ដោយ»។
ប្រធានការិយាល័យព្រហ្មទណ្ឌកម្រិតស្រាលរបស់ស្នងការនគរបាលខេត្តសៀមរាប លោក ផឹង ចិន្តារ៉េត បានមានប្រសាសន៍ថា លោកបានបញ្ជាឲ្យកងប៉ូលិសរបស់លោកទៅទទួលយកជនសង្ស័យនោះពីប៉ូលិសបេតិកភណ្ឌហើយ ប៉ុន្តែលោកមិនអាចអធិប្បាយបានលម្អិតនៅឡើយទេ ដោយសារជនសង្ស័យមិនទាន់បញ្ជូនមកដល់ ហើយប៉ូលិសពុំទាន់បានធ្វើការសាកសួរនៅឡើយ។
លោក ផឹង ចិន្ដារ៉េត បានមានប្រសាសន៍ថា ៖ «ខ្ញុំមិនទាន់បានជួបជនសង្ស័យហ្នឹងផង។ ខ្ញុំឲ្យកម្លាំងខ្ញុំទៅទទួលយកមិនទាន់បានដល់កន្លែងទេ។ ចាំគេរាយការណ៍ឲ្យខ្ញុំ ចាំខ្ញុំដឹងខ្ញុំនឹងមានរបាយការណ៍ប្រាប់»។
តាមសមត្ថកិច្ចឲ្យដឹងថា បច្ចុប្បន្ននេះក្រុមអ្នករកស៊ីជួញដូរវត្ថុបូរាណខ្លះនៅតែធ្វើសកម្មភាពខុសច្បាប់លួចចូលទៅក្នុងបរិវេណប្រាសាទបូរាណខ្លះដែលនៅក្នុងព្រៃនៃតំបន់អង្គរ ខេត្តសៀមរាប និងនៅឯប្រាសាទព្រះខ័នកំពង់ស្វាយ ស្រុកសង្គមថ្មី ខេត្តព្រះវិហារផង លួចរាវរកវត្ថុបូរាណដែលកប់នៅក្រោមដីនិងគាស់កកាយយកទៅលក់ដូរ។
កាលពី២ខែមុនអាជ្ញាធរស្រុកសង្គមថ្មី ខេត្តព្រះវិហារ បានចាប់ខ្លួនមនុស្សម្នាក់ពីបទចោទប្រកាន់ពាក់ព័ន្ធនឹងសកម្មភាពរាវនិងគាស់យកវត្ថុបូរាណពីប្រាសាទព្រះខ័នកំពង់ស្វាយទៅលក់ដូរដូចគ្នានេះ ហើយរហូតមកដល់ពេលនេះតាមអ្នកភូមិការអះអាងថា ជនសង្ស័យនោះត្រូវបានគេដោះលែងឲ្យរួចខ្លួនវិញហើយ៕
អត្ថបទដែលទាក់ទង
ប៉ូលិសខែត្រមណ្ឌលគិរីតាមចាប់ជនសង្ស័យ២នាក់ក្នុងករណីប្លន់
បុរសម្នាក់ត្រូវសមត្ថកិច្ចចាប់ខ្លួនដោយសារទាត់កូនស្រីឲ្យសន្លប់
បុគ្គលិកអង្គការមិត្តគ្មានព្រំដែនអំពាវនាវឲ្យពន្លឿនការស៊ើបអង្កេតករណីឃាតកម្ម
ទាហានម្នាក់រងរបួសធ្ងន់ដោយសារមេបញ្ជាការវាយដំ
ប៉ូលិសម្នាក់នៅមណ្ឌលគិរីរងការចោទថាប៉ុនប៉ងធ្វើឃាតអ្នកភូមិ
ពលរដ្ឋម្នាក់នៅកំពង់ឆ្នាំងត្រូវអ្នកយាមឡូត៍នេសាទបាញ់ឲ្យស្លាប់
អតីតអ្នកកាសែតម្នាក់ត្រូវផ្តន្ទាទោសឲ្យជាប់គុក២ឆ្នាំពីបទផ្សាយព័ត៌មានមិនពិត
បុរសតៃវ៉ាន់ម្នាក់ជាប់គុក៣៧ឆ្នាំពីបទរត់ពន្ធគ្រឿងញៀន
ជនដាណាម៉ាកម្នាក់រងការចោទថាចាប់បង្ខំរួមភេទជាមួយកុមារីខ្មែរ
ក្មេងស្រី១៧នាក់ត្រូវឃាត់ខ្លួនពីបទសង្ស័យថាប្រកបរបរផ្លូវភេទ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.