លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ មានប្រសាសន៍នៅថ្ងៃទី១៧ ខែកក្កដា បានរិះគន់ថ្នាក់ដឹកនាំក្រសួងអប់រំ ដែលមិនបានបញ្ជូនសិស្សពូកែផ្នែកគណិតវិទ្យា ចេញទៅប្រកួតលំដាប់ថ្នាក់ពិភពលោកនៅឆ្នាំ២០១១ ថាបង្ហាញឲ្យឃើញនូវភាពមិនទទួលខុសត្រូវ និងអសមត្ថភាព រួមតាំងមានអំពើពុករលួយរបស់ថ្នាក់ដឹកនាំស្ថាប័ននេះ។
ខ្វះលុយ១ម៉ឺនដុល្លារ?
លោកបន្តថា គ្មានហេតុផលណាមួយដែលក្រសួងអប់រំធ្វើជាលេសមិនបញ្ជូនសិស្សពូកែលើមុខវិជ្ជាគណិតវិទ្យាចេញទៅប្រកួតយកជ័យលាភីលើវិញ្ញាសានេះទេ ៖ «យើងធ្វើហ្នឹងជារូបភាពមួយអាក្រក់ ដែលក្រសួងលុបចោលហើយវាជាការបាត់នូវទំនាក់ទំនងសម្រាប់អន្តរជាតិជាមួយប្រទេសកម្ពុជា ក្នុងការប្រកួតប្រជែងផ្នែកគណិតវិទ្យា។ ហើយយើងមើលឃើញវាមិនមានហេតុផលលុយ ១ម៉ឺនដុល្លារអត់មានឲ្យសិស្សជិះយន្តហោះទៅប្រកួតប្រជែងទេ ក្រសួងមួយប៉ុណ្ណាណី»។
បន្ថែមលើនេះ គ្រូបង្រៀនឯកទេសគណិតវិទ្យា និងសិស្សពូកែគណិតវិទ្យា ត្រៀមចេញទៅប្រកួតលំដាប់ពិភពលោក លើវិញ្ញាសានេះ ក៏បានបង្ហាញពីក្ដីសោកស្ដាយ ដែលពួកគេត្រូវខកខានមិនបានចេញទៅប្រកួតជាលក្ខណៈអន្តរជាតិនាពេលនេះ។
យុវជន ហែម សុធីរ៉ាក់ សិស្សពូកែលើមុខវិជ្ជាគណិតវិទ្យា មកពីវិទ្យាល័យព្រះសីហនុ នាខេត្តកំពង់ចាម ស្ថិតក្នុងចំណោមសិស្សឆ្នើមចំនួន ៥នាក់ ផ្សេងទៀត នៅថ្ងៃអាទិត្យ ទី១៧ ខែកក្កដា ក្រៅពីបានសម្ដែងភាពសោកស្ដាយ ដែលក្រសួងអប់រំមិនបានបញ្ជូនពួកគេចេញទៅប្រកួតជាលក្ខណៈពិភពលោកនាឆ្នាំ២០១១ នេះ ពួកគេក៏សោកស្ដាយផងដែរ ដែលមិនមានឱកាសបង្ហាញឲ្យពិភពលោកបានដឹងពីសមត្ថភាពរបស់យុវជនកម្ពុជា ក៏មានសមត្ថភាពចូលរួមប្រកួតប្រជែងលើវិញ្ញាសាគណិតវិទ្យា ដូចជាយុវជនក្នុងបណ្ដាប្រទេសមានការអភិវឌ្ឍខ្ពស់នៅលើពិភពលោកដូចគ្នាដែរ។
យុវជនរូបនេះបានឲ្យដឹងថា ក្នុងអំឡុងពេលត្រៀមសិក្សារយៈពេលបីខែ លើមុខវិជ្ជាគណិតវិទ្យាដើម្បីចេញទៅប្រកួតនៅក្រៅប្រទេស ពួកគេទាំង ៦នាក់ មានជំនឿចិត្តដូចៗគ្នាថា នឹងដណ្ដើមបានជ័យជម្នះនាំមកនូវកិត្តិយសជូនជាតិ ក៏ដូចជាភាពល្បីល្បាញរបស់កម្ពុជានៅលើឆាកអន្តរជាតិ ពីការវិវត្តឈានឡើងលើវិស័យសិក្សាធិការអប់រំរបស់កម្ពុជា។ ប៉ុន្តែយុវជនរូបនេះបានថ្លែងថា គួរឲ្យសោកស្ដាយ សុបិនទាំងអស់នេះ បានរលាយសាបសូន្យទៅវិញ។
យុវជន ហែម សុធីរ៉ាក់ ឲ្យដឹងដូច្នេះ ៖ «សំណូមពរខ្ញុំអត់មានអីច្រើនទេ សំខាន់ឲ្យតែក្រសួងធ្វើម៉េចត្រូវរៀបចំការប្រឡងហ្នឹងកុំឲ្យខកខានទៀតនៅលើក្រោយ។ ពីព្រោះសិស្សបានខំប្រឹងប្រែងរយៈពេល ៣ខែ អត់បានរៀនសូត្រលើមុខវិជ្ជាអីទាំងអស់។ យើងខំប្រឹងប្រែងលើមុខវិជ្ជាគណិតវិទ្យា ដើម្បីបញ្ចេញសមត្ថភាពនៅលើឆាកអន្តរជាតិ ព្រោះការប្រឡងនេះគឺជាការប្រឡងធំជាងគេនៅលើពិភពលោក មានជាង ១០០ប្រទេសចូលរួមប្រកួត»។
ចំណែកលោក រឿង សោភណ្ឌ គ្រូជំនួយការបង្រៀនលើមុខវិជ្ជាគណិតវិទ្យាជូនដល់សិស្សពូកែគណិតវិទ្យាទាំង ៦នាក់ ត្រៀមចេញទៅប្រកួតនៅលើពិភពលោក ក៏បានសម្ដែងការខកចិត្តដែលយុវជនកម្ពុជាមិនមានឱកាសបានចេញទៅប្រកួតនៅក្រៅប្រទេស ដើម្បីបង្ហាញពីសមត្ថភាពយុវជនកម្ពុជាពេលនេះ។
លោក រឿង សោភណ្ឌ ដែលជាគ្រូបង្រៀននៅសាលាចំណេះទូទៅភ្នំពេញ ឬសាលាជ័យថាវីផងនោះ បានឲ្យដឹងបន្ថែមដូច្នេះ ៖ «ក្មេងៗ ទាំងអស់ហ្នឹងខ្ញុំហ៊ានប្រើពាក្យមួយម៉ាត់ថា ប្រសិនបើយើងជម្រុះយកសិស្សជាង ៣លាននាក់នៅក្នុងស្រុកខ្មែរ យើងយកមកជម្រុះយ៉ាងច្រើនយើងថា បានត្រឹម១០០នាក់ ប៉ុន្តែ១០០នាក់ យើងយកមកជម្រុះយកមកបំប៉នបានត្រឹមពី ៣ទៅ ៥-៦នាក់ហ្នឹងទេ។ ៥-៦នាក់ហ្នឹងយើងបំប៉នមិនមែនតែខ្ញុំម្នាក់ទេ គឺមានព្រឹទ្ធបុរសរងមកពីសាកលវិទ្យាល័យភ្នំពេញមួយរូបទៀត គាត់ឈ្មោះ សួន សុវណ្ណ។ គាត់ត្រូវបានគេបញ្ជូនពីសាកលវិទ្យាល័យភ្នំពេញមកបំប៉ន ហើយខ្ញុំគ្រាន់តែជាគ្រូជំនួយទេ»។
វិទ្យុអាស៊ីសេរីបានព្យាយាមទំនាក់ទំនងជាមួយលោក អ៊ឹម សិទ្ធី រដ្ឋមន្ត្រីក្រសួងអប់រំ និងមន្ត្រីជាន់ខ្ពស់ដទៃទៀតតាមទូរស័ព្ទ នៅរសៀលថ្ងៃទី១៧ ខែកក្កដា ដើម្បីបំភ្លឺជុំវិញបញ្ហានេះ ប៉ុន្តែត្រូវបានមន្ត្រីទាំងនោះបដិសេធន៍មិនផ្ដល់អត្ថាធិប្បាយ។
ជាមេរៀនសម្រាប់ឆ្នាំក្រោយ
ទោះយ៉ាងណា លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យថ្លែងថា តាមអ្វីលោកបានដឹង ការខកខានមិនបញ្ជូនសិស្សពូកែគណិតវិទ្យាចេញប្រកួតលំដាប់ពិភពលោកនៅឆ្នាំនេះ មន្ត្រីក្រសួងអប់រំបានលើកហេតុផលថា មិនមានថវិកាគ្រប់គ្រាន់សម្រាប់ចំណាយថ្លៃសំបុត្រយន្តហោះ និងការស្នាក់នៅរបស់សិស្សពូកែគណិតវិទ្យាទាំង ៦នាក់នោះ។ ដោយក្រសួងអប់រំគន់គូរថា គ្រាន់តែសំបុត្រយន្តហោះមួយផ្នែក សរុបអស់ប្រមាណ ១ម៉ឺនដុល្លារទៅហើយ។ ដូច្នេះក្រសួងគ្មានលទ្ធភាពឧបត្ថម្ភជូនទេ។ ប៉ុន្តែការអះអាងរបស់មន្ត្រីក្រសួងអប់រំនេះ ត្រូវបានលោក រ៉ុង ឈុន ធ្វើការទិតៀន និងស្នើដល់ប្រមុខរដ្ឋាភិបាលកម្ពុជា ឲ្យបើកការស៊ើបអង្កេត ក៏ដូចជាទប់ស្កាត់កុំឲ្យកើតមានទង្វើដូចគ្នានេះកើតមានទៅបណ្ដាឆ្នាំខាងមុខទៀត។
គ្រូបង្រៀនឈ្មោះ រឿង សោភណ្ឌ បានឲ្យដឹងថា កម្មវិធីប្រឡងផ្នែកគណិតវិទ្យាលំដាប់ថ្នាក់ពិភពលោកឆ្នាំ២០១១ នឹងប្រព្រឹត្តទៅនៅថ្ងៃច័ន្ទ ទី១៨ ខែកក្កដា ដោយមានសិស្សពូកែផ្នែកគណិតវិទ្យាមកពីប្រទេសចំនួន១០៥ ចូលរួម។ ការប្រកួតនេះ គឺដើម្បីដណ្ដើមពានរង្វាន់មេដាយផ្នែកគណិតវិទ្យាលំដាប់ថ្នាក់ពិភពលោកសម្រាប់សិស្សផ្នែកមធ្យមសិក្សា៕