មន្ត្រីក្រសួងការងារនិងបណ្តុះបណ្តាលវិជ្ជាជីវៈនិងអង្គការពលកម្មអន្តរជាតិ រួមជាមួយអង្គការពាក់ព័ន្ធជាច្រើនទៀត នៅថ្ងៃ២៧ វិច្ឆិកានេះ នាទីក្រុងភ្នំពេញ បានបើកកិច្ចប្រជុំពិគ្រោះយោបល់ថ្នាក់ជាតិស្តីពីការងារសមរម្យសម្រាប់កម្មករបម្រើការងារតាមផ្ទះ ធ្វើឡើងក្នុងបំណងទាមទារនូវសិទ្ធិសេរីភាពរបស់ពួកគេ ខណៈពេលអ្នកបម្រើនៅតាមផ្ទះ មានការរំលោភសិទ្ធិ មើលងាយនិងកេងប្រវ័ញ្ចកម្លាំងពលកម្មកាន់តែធ្ងន់ធ្ងរនៅកម្ពុជា។
លោក បៀល សាល់ទ័រ (Bill Salter) នាយកអង្គការអន្តរជាតិខាងការងារនៃការិយាល័យប្រចាំអនុតំបន់អាស៊ីខាងកើតនៅទីក្រុងបាងកក មានប្រសាសន៍ថា ការងារជាអ្នកបម្រើត្រូវតែទទួលបានប្រាក់បៀវត្សរ៍សមរម្យចំពោះការងាររបស់គេ ជាងនេះទៅទៀតអ្នកបម្រើតាមផ្ទះគឺដាច់ខាតមិនមែនជាកុមារឡើយ។
លោក បៀល សាល់ទ័រ បន្តថា នៅក្នុងប្រទេសកម្ពុជាថ្មីៗនេះសមត្ថកិច្ចបានរកឃើញថា មានកុមារបម្រើការនៅតាមផ្ទះត្រូវបានម្ចាស់ផ្ទះវាយធ្វើបាបលើរាងកាយ កេងប្រវ័ញ្ចកម្លាំងពលកម្មយ៉ាងធ្ងន់ធ្ងរ រំលោភដល់សិទ្ធិរស់នៅរបស់កុមារដែលការពារដោយច្បាប់។
លោក វង សូត រដ្ឋមន្ត្រីក្រសួងការងារ មានប្រសាសន៍ក្នុងកិច្ចប្រជុំពិគ្រោះយោបល់ស្តីពីការងារសមរម្យសម្រាប់កម្មករបម្រើការងារតាមផ្ទះ ដោយទទួលស្គាល់ថា បច្ចុប្បន្ននេះអ្នកបម្រើនៅតាមផ្ទះភាគច្រើនបំផុតនៅទីក្រុងភ្នំពេញ គឺត្រូវបានម្ចាស់ផ្ទះកេងប្រវ័ញ្ចកម្លាំងពលកម្ម បំបិទសិទ្ធិសេរីភាព និងទទួលបានប្រាក់បៀវត្សរ៍តិចតួច ក្នុងនោះក៏មានកុមារភាគច្រើនផងដែរ។
លោក វង សូត បានបញ្ជាក់ថា ៖ «ការងារបម្រើនៅតាមផ្ទះ យើងមិនបានគ្រប់គ្រង ការជាក់ស្ដែងភាគច្រើនអ្នកក្រុងសុទ្ធតែមានអ្នកបម្រើតាមផ្ទះ។ ខ្ញុំគិតថា ប្រសិនបើថ្ងៃក្រោយយើងមានភ្នាក់ងារផ្ដល់ការផ្គត់ផ្គង់កម្លាំងពលកម្មផ្នែកបម្រើតាមផ្ទះនេះបាន គឺពិតជាល្អជាង ហើយត្រូវតែមានកម្រិតថា មិនអាចឲ្យអ្នកហ្នឹងយកក្មេងទៅបម្រើតាមផ្ទះ»។
គោលជំហររបស់អង្គការសង្គមស៊ីវិលចំពោះអ្នកធ្វើការតាមផ្ទះ គឺគាំទ្រឲ្យមានការអនុម័តអនុសញ្ញារបស់អង្គការពលកម្មអន្តរជាតិស្តីពីអ្នកធ្វើការតាមផ្ទះ ដោយបង្កើតឲ្យមានបទដ្ឋានអន្តរជាតិគំរូមួយ ដែលរដ្ឋជាភាគីត្រូវអនុវត្តតាម ដើម្បីដោះស្រាយបញ្ហារំលោភបំពានលើអ្នកធ្វើការតាមផ្ទះនិងធ្វើការសិក្សាស្រាវជ្រាវលើបញ្ហាប្រឈមរបស់អ្នកធ្វើការតាមផ្ទះឲ្យបានទូទាំងប្រទេស ដើម្បីកាត់បន្ថយការរំលោភបំពានផ្សេងៗដែលកើតមានជាយថាហេតុ។
ការអង្កេតស្តីពីកុមារបម្រើការតាមផ្ទះរបស់វិទ្យាស្ថានស្ថិតិនៃក្រសួងផែនការឆ្នាំ២០០៣ បានបង្ហាញឲ្យឃើញថា នៅទីក្រុងភ្នំពេញ ក្នុងចំណោមគ្រួសារចំនួន៩ មានគ្រួសារ១បានជួលមនុស្សម្នាក់ឲ្យបម្រើការងារក្នុងផ្ទះ ដែលមនុស្សនោះគឺជាកុមារ។
របាយការណ៍ដដែលនេះបានអះអាងថា នៅទីក្រុងភ្នំពេញមានកុមារម្នាក់ក្នុងចំណោម១០នាក់ មានអាយុ៧ឆ្នាំទៅ១៧ឆ្នាំ កំពុងធ្វើការជាអ្នកបម្រើតាមផ្ទះ ឬស្មើចំនួន២៧.៩៥០នាក់ដែលបានធ្វើការជាអ្នកបម្រើតាមផ្ទះ៕