មន្ត្រីនាំពាក្យក្រសួងការបរទេសកម្ពុជា លោក កុយ គួង នៅថ្ងៃ៨ កញ្ញា មានប្រសាសន៍ប្រាប់វិទ្យុអាស៊ីសេរីឲ្យដឹងថា កម្ពុជានៅមិនទាន់មានព័ត៌មានច្បាស់លាស់ ថាតើ លោក ហ៊ុន សែន នាយករដ្ឋមន្ត្រីកម្ពុជា និងលោក អាភីស៊ិត វ៉េតឆាឈីវ៉ាក់ (Abhisit Vejjajiva) នាយករដ្ឋមន្ត្រីថៃ នឹងអាចមានជំនួបទ្វេភាគី នៅឯកិច្ចប្រជុំ អាស៊ាន-សហរដ្ឋអាមេរិក ដើម្បីពិភាក្សាអំពីជម្លោះព្រំដែននៃប្រទេសទាំងពីរនេះ នៅឡើយទេ។
លោក កុយ គួង មានប្រសាសន៍បន្តទៀតថា លោក ហ៊ុន សែន នឹងទៅចូលរួមកិច្ចប្រជុំ អាស៊ាន-សហរដ្ឋអាមេរិក ដែលនឹងប្រារព្ធនៅថ្ងៃទី២៤ ខែកញ្ញា នៅទីក្រុងញូវយ៉ក (New York) សហរដ្ឋអាមេរិក។ ប៉ុន្តែចំពោះលោក ហ៊ុន សែន និងសមភាគីរបស់លោក គឺលោក អាភីស៊ិត វ៉េតឆាឈីវ៉ាក់ នៅមិនទាន់មានគម្រោងជួបគ្នានៅឡើយទេ។ កាលពីដើមខែកញ្ញា មន្ត្រីកម្ពុជា និងថៃ បានឲ្យដឹងថា មេដឹកនាំទាំងពីរនេះនឹងអាចជួបគ្នានៅទីក្រុងញូវយ៉ក សហរដ្ឋអាមេរិក ក្នុងកិច្ចប្រជុំអាស៊ាន-សហរដ្ឋអាមេរិក ហើយនឹងអាចជួបគ្នាម្ដងទៀតនៅឯក្នុងកិច្ចប្រជុំអាស៊ី-អឺរ៉ុប នៅទីក្រុងប្រូស៊ែល ប្រទេសប៊ែលហ្ស៊ិក នៅថ្ងៃទី៤ និង ៥ ខែតុលា។
កាសែតថៃ ឌឹនេសិន (The Nation) នៅថ្ងៃពុធ ទី៩ កញ្ញា បានដកស្រង់សម្ដីរបស់អគ្គលេខាធិការអាស៊ាន លោក ស៊ូរិន ពិតស៊ូវ៉ាន (Surin Pitsuwan) ឲ្យដឹងថា មន្ត្រីក្រសួងការបរទេសកម្ពុជា និងថៃ កំពុងធ្វើការរៀបចំកិច្ចប្រជុំទ្វេភាគីមួយ សម្រាប់លោក ហ៊ុន សែន និងលោក អាភីស៊ិត វ៉េតឆាឈីវ៉ាក់ នៅក្នុងកិច្ចប្រជុំ អាស៊ាន-សហរដ្ឋអាមេរិក នៅថ្ងៃទី២៤ កញ្ញា។ លោក ស៊ូរិន ពិតស៊ូវ៉ាន បន្ថែមថា កិច្ចប្រជុំទ្វេភាគីនេះជាកិច្ចប្រជុំសាមញ្ញ និងជាមិត្តភាព ដោយសំដៅទៅលើកិច្ចសហប្រតិបត្តិការតែមួយប៉ុណ្ណោះ ដោយមិនពិភាក្សាលើបញ្ហាជម្លោះនោះទេ៕