សេចក្ដីព្រាងអនុក្រឹត្យនេះ បានឆ្លងអន្តរក្រសួងនៅថ្ងៃទី២៩ ខែកុម្ភៈ ហើយនឹងបញ្ជូនទៅទីស្ដីការគណៈរដ្ឋមន្ត្រីនៅពេលឆាប់ៗនេះ។
ប្រធានគណៈកម្មការអភិរក្សត្រីផ្សោតទន្លេមេគង្គ លោក ទូច សៀងតាណា មានប្រសាសន៍នៅថ្ងៃទី ២៩ កុម្ភៈថា សេចក្ដីព្រាងអនុក្រឹត្យស្ដីពីការបង្កើតតំបន់អភិរក្សសត្វផ្សោតទន្លេមេគង្គនេះ បានឆ្លងកាត់ការពិភាក្សាយ៉ាងម៉ត់ចត់ និងទៅឆ្លងអន្តរក្រសួងរួចហើយ នៅតែបញ្ជូនទៅទីស្ដីការគណៈរដ្ឋមន្ត្រីទៀតប៉ុណ្ណោះ ដើម្បីបានអនុក្រឹត្យមួយដែរល្អ និងត្រឹមត្រូវ។
លោកថា អនុក្រឹត្យនេះ ពុំបានបិទផ្លូវប្រជាពលរដ្ឋដែលរស់នៅក្បែរតំបន់អភិរក្សនោះទេ៖ «សំខាន់ចំណុចទាំងអស់នេះ គឺយើងចង់បង្ហាញអំពីគោលនយោបាយរបស់រាជរដ្ឋាភិបាល ចំពោះប្រជាពលរដ្ឋ និងក៏ដូចជាចំពោះប្រជាពលរដ្ឋ និងការអភិរក្សធនធានធម្មជាតិដែរ។ ២យ៉ាងហ្នឹងដែលយើងចង់បង្ហាញទៅលើពិភពលោកឲ្យគាត់មើលឃើញថា រដ្ឋាភិបាលគាត់មានការយកចិត្តទុកដាក់ទៅនឹងបញ្ហាទាំងអស់ហ្នឹង។ ចំណុចមួយទៀតដែរខ្ញុំចង់បានដែរ គឺកិច្ចសហការរវាងស្ថាប័នដែលពាក់ព័ន្ធ ៣សំខាន់ គឺមានគណៈកម្មការអភិរក្សផ្សោតមួយ មានរដ្ឋបាលជលផលដែលជាស្ថាប័នជំនាញរបស់ក្រសួងកសិកម្ម»។
លោក ទូច សៀងតាណា បានបញ្ជាក់ថា សេចក្ដីព្រាងអនុក្រឹត្យនេះ មានចំណុចសំខាន់៣ ទី១ គឺមិនឲ្យពលរដ្ឋប្រើប្រាស់មងដែលអាចបង្កឲ្យសត្វផ្សោតងាប់ដល់ទៅ ៩៥%។ ចំណុចទី២ មិនឲ្យមានការតាំងទីលំនៅ ឬធ្វើផ្ទះបណ្ដែតទឹកក្នុងតំបន់អភិរក្សដែលធ្វើឲ្យខូចសោភ័ណភាពតំបន់ទេសចរណ៍ ហើយទី៣ មិនអនុញ្ញាតឲ្យចិញ្ចឹមត្រីក្នុងបែនៅក្នុងតំបន់អភិរក្សនោះទេ។
សេចក្ដីព្រាងអនុក្រឹត្យនេះមានកិច្ចសហការគ្នារវាងគណៈកម្មការអភិរក្សត្រីផ្សោតទន្លេមេគង្គរដ្ឋបាលជលផល និងក្រសួងកសិកម្មរុក្ខាប្រមាញ់ និងនេសាទ បានធ្វើឡើងតាំងពីខែកញ្ញា ឆ្នាំ២០១១។
គណៈកម្មការអភិរក្សត្រីផ្សោតទន្លេមេគង្គ បានសន្និដ្ឋានថា ត្រីផ្សោតនៅទន្លេមេគង្គបច្ចុប្បន្នមានប្រមាណជិត ២០០ក្បាល៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។