រដ្ឋាភិបាលកម្ពុជានៅថៃ្ងអង្គារបានប្រើប្រាស់កម្លាំងអន្តរាគមន៍ចម្រុះចំនួនជាង ៦០០នាក់ដើម្បីហ្វឹកហាត់និងធ្វើសមយុទ្ធជួយសង្រ្គោះជាបន្ទាន់មួយនៅក្នុងព្រឹត្តិការណ៍ធ្លាក់យន្តហោះសិប្បនិម្មិតនៅឯព្រលានយន្តហោះអន្តរជាតិភ្នំពេញដើម្បីពង្រឹងសុវត្ថិភាពនិងប្រសិទ្ធភាពក្នុងការជួយសង្រ្គោះ នៅគ្រាដែលមានការធ្លាក់យន្តហោះ ឬក៏រងការវាយប្រហារដោយអំពើភេរវកម្ម។
កងកម្លាំងចម្រុះទាំងនោះមកពី ១៩អង្គភាព និង ១៨ក្រុមហ៊ុន សរុបចំនួន ៦៣០នាក់មកពីអង្គភាពប្រឆាំងអំពើភេរវកម្ម, អង្គភាពឆ័ត្រយោង, កងពល ង៧០, អង្គភាពពន្លត់អគ្គីភ័យ, អង្គភាពគយ, កងរាជអាវុធហត្ថ, អង្គភាពសង្រ្គោះអគ្គីភ័យ, ទ័ពអាកាស, កងអង្គរក្ស និងកងសន្តិសុខព្រលានយន្តហោះ ព្រមទាំងទ្បានពេទ្យ និងទ្បានពន្លត់អគ្គីភ័យជាច្រើនគ្រឿង បានចូលរួមក្នុងសមយុទ្ធដ៏ធំនោះ។
ទស្សនាវីដេអូនៅវឹបសាយថ៍ YouTube
គេបានរៀបចំដុតសំបកកង់ទ្បានចាស់ៗជាច្រើន និងបានចាក់ប្រេងដុតចំនួន ១ពាន់លីត្រដើម្បីបង្កើតជាអណ្តាតភ្លើង និងផ្សែងខ្មួលខ្មាញ់ សម្រាប់ហ្វឹកហាត់សមយុទ្ធពន្លត់អគ្គីភ័យនោះប្រកបដោយប្រសិទ្ធភាពក្នុងរយៈពេលខ្លី។
លោក សុខ អាន ជាឧបនាយករដ្ឋមន្រ្តី និងជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ដែលបានចូលរួមជាអធិបតីនៅក្នុងការបើកសមយុទ្ធនោះ បានមានប្រសាសន៍ថា ៖ «រាជរដ្ឋាភិបាលបាននិងកំពុងបន្តលើកកម្ពស់ការហ្វឹកហ្វឺននៅនឹងកន្លែងក្នុងគោលបំណងដើម្បីធ្វើឲ្យមន្ត្រីរាជការគ្រប់ស្ថាប័ន កងកម្លាំងប្រដាប់អាវុធគ្រប់អង្គភាព ចាប់ពីមេបញ្ជាការរហូតដល់អ្នកអនុវត្តទទួលបាននូវជំនាញពិតប្រាកដ ជាពិសេសពង្រឹងជំនឿទុកចិត្តរបស់អ្នកប្រើប្រាស់ និងលើកតម្កើងវិស័យអាកាសចរណ៍កម្ពុជា»។
រដ្ឋលេខាធិការនៃអាជ្ញាធរអាកាសចរណ៍ស៊ីវិលប្រទេសកម្ពុជា លោក ម៉ៅហាក់ វ៉ានណាល់ និងជាទីប្រឹក្សារបស់ប្រមុខរដ្ឋាភិបាល លោក ហ៊ុន សែន បានមានប្រសាសន៍ដែរថា ៖ «ត្រូវរៀបចំធ្វើសមយុទ្ធសង្គ្រោះអាសន្នទ្រង់ទ្រាយធំនៅតាមបណ្ដាអាកាសយាន្តដ្ឋានយ៉ាងតិចរៀងរាល់ ២ឆ្នាំម្ដង។ ត្រូវរៀបចំធ្វើសមយុទ្ធទ្រង់ទ្រាយតូចក្នុងមួយឆ្នាំម្ដង។ ត្រូវរៀបចំធ្វើលំហាត់សមយុទ្ធលើទឹកជារៀងរាល់ ៦ខែម្ដង»។
ការធ្វើសមយុទ្ធទ្រង់ទ្រាយធំបែបនេះត្រូវបានគេរៀបចំធ្វើចំនួន ២លើករួចមកហើយនៅជាយទីក្រុងភ្នំពេញ នៅរៀងរាល់ ២ឆ្នាំម្តង តាំងពីឆ្នាំ២០០៧មក។
គេបានឃើញទ្បានពេទ្យនិងទ្បានពន្លត់អគ្គីភ័យជាច្រើនគ្រឿងបានបន្លឺសំឡេងស៊ីរ៉ែន និងបានដឹកអ្នករងគ្រោះ និងរងរបួសជាច្រើននាក់បន្តកន្ទុយគ្នានៅក្នុងយុទ្ធនាការហ្វឹកហ្វាត់សមយុទ្ធនោះ។
ប្រធានក្រុមពន្លត់អគ្គីភ័យនៃក្រុមហ៊ុន ខេម លោក ស សុផល ដែលបានចូលរួមក្នុងសមយុទ្ធនោះដោយមានអាវការពារនិងមួកការពារសុវត្ថិភាព បានមានប្រសាសន៍ថា លោកប្រើកងកម្លាំងពន្លត់អគ្គីភ័យចំនួន ១៧នាក់ និងទ្បានពន្លត់អគ្គីភ័យចំនួន ៤គ្រឿង។
លោក លឹម ហួន ជាគ្រូពេទ្យសង្គ្រោះបន្ទាន់នៅក្នុងសមយុទ្ធនោះ បានមានប្រសាសន៍ថា ក្រុមរបស់លោកប្រើប្រាស់កងកម្លាំងជួយសង្រ្គោះចំនួន ៣៧នាក់ ដើម្បីជួយសង្គ្រោះជនរងគ្រោះធ្លាក់យន្តហោះចំនួន ១០០នាក់ ៖ «តាមមើលសភាពការណ៍ជាក់ស្ដែងហ្នឹងគឺអាចដោះស្រាយបាន»។
សុខ សេរី ៖ បើសិនជារឿងពិតតើយើងអាចដោះស្រាយបានអ៊ីចឹងទេ? លឹម ហួន ៖ បាទ យើងអាចដោះស្រាយបាន។
គេបានកត់សម្គាល់ឃើញថា ប្រទេសកម្ពុជាមានព្រឹត្តិការណ៍ធ្លាក់យន្តហោះជាច្រើនលើកកាលពីឆ្នាំ១៩៩៧មួយលើក និងឆ្នាំ២០០៧ ចំនួន២លើក នៅក្នុងនោះការធ្លាក់យន្តហោះកាលពីខែមិថុនា ឆ្នាំ២០០៧ នៅភ្នំបូកគោ ខេត្តកំពត បានបណ្តាលឲ្យមនុស្សចំនួន ២២នាក់ស្លាប់ដោយសារអាកាសធាតុភ្លៀងខ្លាំងនិងខ្យល់ខ្លាំង៕