អ្នកភូមិដែលសុំមិនឲ្យបញ្ចេញឈ្មោះបញ្ជាក់ថា ពួកគាត់ប្រមាណ៥នាក់ខ្លះបានបង់ប្រាក់ហើយបានទទួលម៉ាស៊ីនមកវិញ ហើយខ្លះទៀតគ្មានប្រាក់បង់មិនត្រូវបានប្រគល់ម៉ាស៊ីនវិញទេ ដោយមន្ត្រីយោធាសំអាងថា ប្រាក់នោះពួកគេយកទៅឧបត្ថម្ភទាហានការពារប្រាសាទព្រះវិហារ ៖ «មួយហ្នឹងយក៥០ម៉ឺន គេថាយកទៅឲ្យកងទ័ព ទាហាន ទៅព្រះវិហារនោះ»។
ចំណែកអ្នកភូមិដែលសុំមិនបញ្ចេញឈ្មោះដូចគ្នាឲ្យដឹងដែរថា ពួកគាត់ចូលព្រៃកាប់ឈើជាប្រការខុសច្បាប់ ក៏ប៉ុន្តែក្រុមសមត្ថកិច្ចបង្រ្កាបធ្វើបានតែចំពោះអ្នកភូមិក្រីក្រគ្មានប្រាក់សំណូកតែប៉ុណ្ណោះ ៖ «បង់ឲ្យគេមែន បង់ឲ្យគេហើយអស់ហើយ សុំអង្វរគេទម្រាំបាន៥០ម៉ឺនរៀល។ នៅស្រុកស្រែបើមិនអារឈើមានមុខរបរអី គេអ្នកធំៗចេះតែរកបាន ខ្ញុំអ្នកស្រែ អ្នកក្រីក្រ ខ្ញុំរកមិនបានគេទេ»។
ឆ្លើយតបចំពោះសេចក្តីចោទប្រកាន់នេះមេបញ្ជាការយោធាស្រុកកូនមុំ លោក ឡោ សារឹទ្ធ បដិសេចថាមិនបានយកប្រាក់ពីអ្នកភូមិណាម្នាក់ទេ ហើយក៏មិនមានពាក់ព័ន្ធនឹងការរកប្រាក់ទៅឧបត្ថម្ភទាហានការពារប្រាសាទព្រះវិហារនោះដែរ។ លោកថាបានចាប់រណារយន្តអ្នកភូមិមែន ក៏ប៉ុន្តែកំពុងរក្សាទុកដើម្បីសុំការសម្រេចពីថ្នាក់លើលោកតែប៉ុណ្ណោះ។
លោក ឡោ សារឹទ្ធ បានមានប្រសាសន៍ថា ៖ «ចំពោះប៉ុន្មានដែលខ្ញុំយកមក គឺនៅរក្សាដដែល អត់មានបាននរណាមកទំនាក់ទំនងខ្ញុំ ឬក៏បុគ្គលណាមក អត់មានទាល់តែសោះ ដល់សួរអ៊ីចឹងខ្ញុំវាក់អ៊ើដែរ»។
តាមច្បាប់ព្រៃឈើបានហាមឃាត់ការប្រើប្រាស់រណារយន្តអារកាត់ឈើដោយគ្មានច្បាប់អនុញ្ញាត ហើយប្រមុខរាជរដ្ឋាភិបាល លោក ហ៊ុន សែន កាលពីឆ្នាំ២០០៦ ក៏បានចេញបទបញ្ជាឲ្យប្រមូលរណារយន្តកាត់ឈើនិងរឹបអូសដុតបំផ្លាញចោល។
សកម្មជនឃ្លាំមើលការកាប់បំផ្លាញព្រៃឈើនៃសមាគមអាដហុកខេត្តរតនគិរី លោក ឆាយ ធី មានប្រសាសន៍ថា សមាគមលោកក៏ទទួលបានរបាយការណ៍ពីប្រជាសហគមន៍ដូចគ្នាស្តីពីការបង់ប្រាក់ទៅឲ្យមន្ត្រីយោធាស្រុក។ លោកថា ការឃុបឃិតណាមួយដើម្បីទទួលយកប្រាក់ហើយប្រគល់រណារយន្តខុសច្បាប់គឺជាកំហុសនាំឲ្យមានការកាប់បំផ្លាញព្រៃឈើត្រូវតែមានការស៊ើបអង្កេតដើម្បីរកការពិត។
លោក ឆាយ ធី បានមានប្រសាសន៍ថា ៖ «សហគមន៍គាត់បញ្ជាក់ប្រាប់យើងថា ខាងក្រុមយោធាហ្នឹងគាត់ទៅចាប់ ប៉ុន្តែតម្រូវឲ្យពួកគាត់ហ្នឹងបង់លុយទៅរៃអង្គាសជួយដល់ខាងយោធាជាយដែនប្រាសាទព្រះវិហារ»។
មេបញ្ជាការយោធាខេត្តរតនគិរី លោក ម៉ុង ថែន មានប្រសាសន៍បញ្ជាក់ថា មិនមានគោលការណ៍ឲ្យមន្រ្តីយោធានៅតាមមូលដ្ឋានប្រមូលប្រាក់ពីអ្នកប្រើប្រាស់រណារយន្តខុសច្បាប់ដើម្បីឧបត្ថម្ភទាហានការពារប្រាសាទព្រះវិហារនោះឡើយ ៖ «ជាការងាររបស់គេ ចេះតែថា ខាងនេះអត់មានគោលការណ៍បង់អ៊ីចឹងទេ»។
របាយការណ៍ប្រចាំឆ្នាំ២០០៧របស់អាជ្ញាធរខេត្តរតនគិរីឲ្យដឹងថា អាជ្ញាធរបានដកហូតរណារយន្តបាន៤៥គ្រឿង ក៏ប៉ុន្តែសមាគមអាដហុកខេត្តរតនគិរីអះអាងថា ស្ថិតិរណារយន្តដែលមានតាមបណ្តាស្រុកទាំង៩ក្នុងខេត្តមានរហូតដល់១៤៤២គ្រឿង៕