មន្ត្រីយោធាមួយរូបនៅរតនគិរី ពាក់ព័ន្ធក្នុងការរត់ពន្ធជ័រកៅស៊ូ
ដោយ រដ្ឋា វិសាល
2008-08-22
មន្ត្រីប៉ូលិសខេត្តរតនគិរី មានប្រសាសន៍ឲ្យដឹងថា វរសេនីយ៍ត្រីយោធាខេត្តរតនគិរី លោក វ៉ាន់ ថូ បានធ្វើសកម្មភាពរត់ពន្ធជ័រកៅស៊ូដោយប្រើប្រាស់រថយន្តពាក់ផ្លាកលេខរាជការនិងបានលួចយករថយន្តចេញពីស្នងការដ្ឋានប៉ូលិស បន្ទាប់ពីរថយន្តត្រូវបានចាប់ឃាត់ទុកដើម្បីជាវត្ថុតាង។
អនុប្រធានការិយាល័យកណ្តាលប្រឆាំងបទល្មើស លោក នៅ ដារ៉ា មានប្រសាសន៍ថា ៖ «មើលងាយ ចូលយក ដូចគ្មានច្បាប់ទម្លាប់អីអ៊ីចឹង។ ខ្ញុំបានទៅជួបមេគេហើយ គេថាឲ្យយកឡានហ្នឹង មកទុកនៅកន្លែងស្នងការវិញ ដោះស្រាយទៅតាមផ្លូវច្បាប់»។
កាលពីថ្ងៃទី១៥ សីហា ក្រុមបង្រ្កាបចម្រុះមាននគរបាលកងរាជអាវុធហត្ថនិងបុគ្គលិកសន្តិសុខក្រុមហ៊ុនវិនិយោគចម្ការកៅស៊ូតាយសេង បានស្ទាក់ចាប់បានរថយន្តម៉ាក SURF ពណ៌ក្រហមពាក់ផ្លាកលេខរាជការ៣១៤៦ ដឹកជញ្ជូនជ័រកៅស៊ូបង្កកជាងមួយពាន់គីឡូក្រាមនៅចំណុចភូមិដង្កាប់ បើកបរដោយមន្ត្រីយោធាខាងលើ បន្ទាប់ពីបានព្យាយាមបើកគេចដោយមិនឲ្យសមត្ថកិច្ចត្រួតពិនិត្យ។ ហើយបន្ទាប់មក រថយន្តនិងវត្ថុតាងត្រូវបានចាប់នាំមករក្សាទុកនៅស្នងការដ្ឋានតែពុំបានឃាត់ខ្លួនមន្ត្រីយោធានោះទេ រហូតមកទល់នឹងថ្ងៃពុធ ទី២០ សីហា ស្រាប់តែមន្ត្រីយោធាចូលមកយករថយន្តពីស្នងការដា្ឋនទៅទុកឯបញ្ជាការដ្ឋានយោធាខេត្ត ដោយពុំមាននរណាដឹង។
វរសេនីយ៍ត្រី វ៉ាន់ ថូ ទទួលស្គាល់ថា សេចក្តីរាយការណ៍ខាងលើគឺជាការពិត ក៏ប៉ុន្តែលោកបញ្ជាក់ពីហេតុផលយ៉ាងដូច្នេះ ៖ «ខ្ញុំដឹងថាខុសច្បាប់រួចហើយ ក៏ប៉ុន្តែបើយើងមិនដោះស្រាយមួយដង មួយគ្រា តើបានស្អីសម្រាប់ដោះស្រាយជីវភាព?»។
មេបញ្ជាការយោធាខេត្តរតនគិរី លោក ម៉ុង ថែន មានប្រសាសន៍បញ្ជាក់ថា វាជាបញ្ហាបុគ្គល ៖ «មិនមែនរបស់អង្គភាពទេ ឯកជនរបស់គេ»។
សកម្មភាពរត់ពន្ធជ័រកៅស៊ូ បើតាមក្រុមហ៊ុនចម្ការកៅស៊ូតាយសេង ដែលទទួលសិទ្ធិវិនិយោគចម្ការកៅស៊ូរដ្ឋខេត្តរតនគិរី បញ្ជាក់ថា កើតមានពីក្រុមសាមគ្គីចម្ការកៅស៊ូដែលក្រសួងកសិកម្មផ្តល់អាទិភាពឲ្យចៀរជ័រលើចម្ការកៅស៊ូប្រមាណ ១៣០០ហិកតាលក់ទៅឲ្យក្រុមហ៊ុនតាមគោលការណ៍វិនិយោគ ក៏ប៉ុន្តែសកម្មភាពរត់ពន្ធកើតមានច្រើនដោយសារក្រុមសាមគ្គីបានឃុបឃិតជាមួយបុគ្គលនិងមន្រ្តីកងកម្លាំងប្រដាប់អាវុធ លួចជ័រកៅស៊ូនាំចេញទៅទីផ្សារសេរី ខេត្តកំពង់ចាម មានតម្លៃខ្ពស់។
នាយកក្រុមហ៊ុនតាយសេង លោក លី ហុងស៊ីន មានប្រសាសន៍ថា ក្រុមហ៊ុនមានកាតព្វកិច្ចបង់ពន្ធជូនរដ្ឋលើការវិនិយោគចម្ការកៅស៊ូនៅខេត្តរតនគិរីទាំងអស់ ដូច្នេះការរត់ពន្ធនឹងធ្វើឲ្យបាត់ប្រាក់ចំណូលប្រមាណ ១០ម៉ឺនដុល្លារក្នុងមួយខែៗ។
លោក លី ហុងស៊ីន មានប្រសាសន៍ដូច្នេះថា ៖ «ពីរបីខែនេះរត់ចេញច្រើនណាស់ ដូច្នេះសង្ឃឹមថា ក្រសួងកសិកម្មនឹងចុះទៅរំសាយហើយ ឲ្យខាងខ្ញុំ បង្កើតភូមិអាជីវកម្ម... អ៊ីចឹងឧបករណ៍ហ្នឹងមិនអាចចេញទៅក្រៅទេ»។
ក្រសួងកសិកម្មនៃប្រទេសកម្ពុជា បានចេញសេចក្តីសម្រេចរួចហើយកាលពីចុងឆ្នាំ២០០៧ ឲ្យរំសាយក្រុមសាមគ្គីចៀរជ័រកៅស៊ូ ហើយរៀបចំក្រុមកម្មករជាភូមិផលិតគ្រប់គ្រងដោយក្រុមហ៊ុន។
បើតាមមន្រ្តីឃ្លាំមើលសិទ្ធិមនុស្សកត់សម្គាល់ថា សកម្មភាពរត់ពន្ធច្រើនធ្វើឡើងដោយក្រុមបុគ្គលក្នុងកងប្រដាប់អាវុធ ហើយជាញឹកញយ មានការប្រឈមមុខដោយអាវុធជាមួយដាក់ក្រុមបង្រ្កាប៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ប៉ូលិសកំពុងតាមចាប់ខ្លួនក្មេង១០នាក់ដែលបានចាប់រំលោភនារី២នាក់
មន្ត្រីអាដហុកនៅស្ទឹងត្រែងសុំឲ្យស៊ើបអង្កេតឡើងវិញជុំវិញមរណភាពអ្នកភូមិម្នាក់
អំពើហិង្សាមួយផ្ទុះឡើងនៅឯទីរួមខេត្តរតនគិរី
ប៉ូលិសច្រកប៉ោយប៉ែតរងការចោទថា ប្រើហិង្សាលើកុមារ
បុរសខ្មែររស់នៅអាមេរិកត្រូវនាំខ្លួនទៅតុលាការពីបទចាក់សាំងដុតគូដណ្ដឹង
សកម្មជនបក្សសមរង្ស៊ីនៅខេត្តស្ទឹងត្រែងត្រូវគេបាញ់សម្លាប់
ក្រុមការពារសិទ្ធិសត្វរិះគន់ចំពោះការជួញដូរសត្វស្វានៅកម្ពុជា
ស្ត្រីម្នាក់និងកុមារីម្នាក់រងរបួសធ្ងន់ដោយសារជនល្មើសចាក់សាំងដុតទាំងរស់
ជនល្មើសស្លៀកពាក់ទាហានធ្វើសកម្មភាពប្លន់នៅខេត្តបន្ទាយមានជ័យ
ចោរមួយក្រុមធ្វើសកម្មភាពប្លន់អ្នកស្រុកនៅបន្ទាយមានជ័យ
