ផ្អែកតាមប្រភពបានឲ្យដឹងថា មន្រ្តីយោធាចំនួន ៧រូប ដែលកំពុងរងការប្តឹងនោះ មានឈ្មោះ ទូច ភី, ទូច សុវណ្ណារិទ្ធិ, ឆេង ឆិះ, សូន គឿន, ហួរ ថន, ផាន់ រិន និង ឈ្មោះ កាន់ ណាំង។
លោក ជា ហ៊ាង ប្រធានអង្គការឃ្លាំមើលការពារសម្បត្តិធនធានធម្មជាតិនៅក្នុងប្រទេសកម្ពុជា បានមានប្រសាសន៍ប្រាប់វិទ្យុអាស៊ីសេរីនៅថៃ្ងអង្គារនេះថា ៖ «ដែលខ្ញុំប្ដឹងហ្នឹង គឺពាក់ព័ន្ធនឹងការកាប់រុករានទន្រ្ទានយកដីរដ្ឋដោយខុសច្បាប់»។
សុខ សេរី ៖ ចំនួនប៉ុន្មានហិកតារដែរ? ជា ហ៊ាង ៖ បើសរុបទាំងអស់គ្នាយ៉ាងតិចបំផុត គឺ ១ពាន់ហិកតារជាង។ សុខ សេរី ៖ ទន្រ្ទានតាំងពីឆ្នាំណា? ជា ហ៊ាង ៖ ២០០៧ និង ២០០៨។ សុខ សេរី ៖ តើហេតុអីបានជាលោកដឹង តើលោកបានឃើញផ្ទាល់ភ្នែក ឬមួយក៏យ៉ាងម៉េច? ជា ហ៊ាង ៖ ខ្ញុំចុះទៅស៊ើបអង្កេតជាមួយបុគ្គលិករបស់ខ្ញុំ ឈ្មោះ កែវ យ៉ា គឺក្នុងនោះក៏មានព្រះរាជអាជ្ញា ហួត ហ៊ី ហ្នឹង គាត់ក៏បានចុះទៅស៊ើបអង្កេតជាមួយមន្រ្តីឧទ្យានុរក្សបរិស្ថាន គឺលោក ញ៉ឹល ធន់ ហ្នឹង។
លោកបានមានប្រសាសន៍ថា តុលាការខេត្តកោះកុងនៅមិនទាន់បានចាត់វិធានការដើម្បីកោះហៅមន្រ្តីយោធាទាំង ៧រូបនោះ មកសាកសួរជុំវិញបណ្ដឹងរបស់លោកនៅឡើយទេ។
មិនអាចទាក់ទងមន្រ្តីយោធាទាំង៧រូបនៃយោធភូមិភាគ៣ នៅក្នុងខេត្តកោះកុង បានភ្លាមៗទេដើម្បីសុំសេចក្តីប្រតិកម្មជុំវិញការប្តឹងរបស់អង្គការក្រៅរដ្ឋាភិបាលខាងលើនេះ។
លោក យុទ្ធ ភូថង ជាអភិបាលខេត្តកោះកុង បានមានប្រសាសន៍ថា ព្រៃឈើនៅតំបន់នោះជាព្រៃឈើអភិរក្សនិងការពារ ហើយលោកនឹងចាត់កម្លាំងឲ្យចុះស៊ើបអង្កេតជុំវិញបញ្ហាខាងលើនេះ ៖ «ខ្ញុំអត់ទាន់ដឹងទេ។ ទន្រ្ទានយកមិនបានទេ ម្ដុំហ្នឹងជាតំបន់អភិរក្សទេតើ»។
ទាក់ទងនឹងការចោទប្រកាន់របស់អង្គការក្រៅរដ្ឋាភិបាលខាងលើនេះ មន្រ្តីមួយរូបនៃក្រសួងបរិស្ថានក្នុងប្រទេសកម្ពុជា បានមានប្រសាសន៍ថា លោកនឹងចាត់កម្លាំងមន្រ្តីបរិស្ថានក្នុងខេត្តកោះកុង ឲ្យចុះពិនិត្យមើលជុំវិញការកាប់ព្រៃឈើខុសច្បាប់នៅតំបន់នោះ ដែលកំពុងរងការចោទប្រកាន់៕