ស្ត្រីម្នាក់នៅស្រុកឈូក ខែត្រកំពត ចោទថាត្រូវក្រុមយោធាវាយ

ដោយ ហ៊ុល រស្មី

2008-06-23

ស្ត្រីម្នាក់បានចោទក្រុមយោធាថាបានវាយប្រហារលើរូបគាត់ឲ្យរបួសក្រោមភ្នែកឆ្វេង នៅក្នុងការប្រឈមមុខដាក់គ្នារវាងប្រជាពលរដ្ឋនិងក្រុមយោធាពីរឡាន នៅក្នុងចំណុចក្បាលដំរី ភូមិជ័យសេនា ឃុំតាកែន ស្រុកឈូក ខេត្តកំពត នៅថ្ងៃច័ន្ទនេះ ។

អ្នកស្រី សុខ ហេង អាយុ៣៩ឆ្នាំ បានមានប្រសាសន៍ថាក្រុមយោធាបានស្ទុះមកវាយលើលោកស្រី ខណៈដែលគាត់កំពុងតែដកស្លាកសញ្ញាខណ្ឌបែងចែកដី ដោយធ្វើឲ្យបែកក្រោមភ្នែកឆ្វេងប្រវែងបីថ្នេរ ។

អ្នកស្រី សុខ ហេង បានឲ្យដឹងថា ៖ «ខឹងខ្ញុំដកស្លាក ខ្ញុំដកស្លាកដីប្រជាពលរដ្ឋបងប្អូនយើងទាំងអស់គ្នាហ្នឹងណា៎ ។ វាវាស់លក់ដូរ» ។

លោកស្រីបានបន្ថែមទៀតថា ក្រុមយោធាដែលមកពីកងពលលេខ៣១ ដែលដឹកនាំដោយ លោក អ៊ុក សោភ័ណ ថែមទាំងបានគំរាមចាប់អ្នកស្រីដាក់គុក ហើយតាមចាប់ក្រុមប្រជាពលរដ្ឋអ្នកតវ៉ាផ្សេងទៀតផងដែរ ។

វិទ្យុអាស៊ីសេរីនៅមិនទាន់អាចសុំការបំភ្លឺពីលោក អ៊ុក សោភ័ណនោះ បាននៅឡើយទេនៅថ្ងៃច័ន្ទនេះ។

លោកស្រី សុខ ហេង និងប្រជាពលរដ្ឋនៅក្នុងចំណុចក្បាលដំរី បានអំពាវនាវសុំឲ្យលោកនាយករដ្ឋមន្ត្រី ហ៊ុន សែន ជួយធ្វើអន្តរាគមន៍ក្នុងជម្លោះដីធ្លីនោះផងដែរ បើទោះបីជាដីធ្លីនោះត្រូវបានមន្ត្រីអង្គការសិទ្ធិមនុស្ស អាដហុក ខេត្តកំពត លោកស្រី ទ្រី ឈួន បានមានប្រសាសន៍ថា ត្រូវលោកនាយករដ្ឋមន្ត្រី ហ៊ុន សែន និងអគ្គមេបញ្ជាការរងនៃកងយោធពលខេមរភូមិន្ទ លោក គន់ គីម យកទៅអភិវឌ្ឍជាមណ្ឌលសម្រាប់យុទ្ធជនពិការក៏ដោយ ។

លោកស្រី ទ្រី ឈួន បានមានប្រសាសន៍ថា ៖ «ឃើញមានការអភិវឌ្ឍហ្នឹងជាផ្ទះដែលមានឯកសណ្ឋានហ្នឹងជាង២០០ផ្ទះហើយ ។ ហើយក្រៅពីហ្នឹងយើងឃើញថា គេពង្រីករចនាសម្ព័ន្ធហ្នឹងគួរឲ្យចាប់អារម្មណ៍មែនទែន ។ ដោយសារតែការពង្រីករចនាសម្ព័ន្ធហ្នឹងហើយ ដែលធ្វើឲ្យប៉ះពាល់ទៅលើប្រជាពលរដ្ឋដែលរស់នៅហ្នឹង ។ កាលណាពង្រីកផ្លូវទៅដល់ណាគឺប៉ះដីប្រជាពលរដ្ឋកន្លែងណា ត្រូវបានបណ្ដេញ ត្រូវបានរុះរើអីអ៊ីចឹងទៅ» ។

លោកស្រី ទ្រី ឈួន ក៏បានមានប្រសាសន៍ផងដែរថា អាជ្ញាធរខេត្តកំពតមិនមានលទ្ធភាពជួយដោះស្រាយជម្លោះដីធ្លីនៅចំណុចក្បាលដំរី ភូមិជ័យសេនា ឃុំតាកែន ស្រុកឈូក រវាងប្រជាពលរដ្ឋប្រមាណជាង១ពាន់គ្រួសារនោះ ហើយថាអាជ្ញាធរនិងរដ្ឋាភិបាលមិនបានជួយសងជំងឺចិត្តដល់ប្រជាពលរដ្ឋរងគ្រោះនោះឡើយ ។

មន្ត្រីអង្គការសិទ្ធិមនុស្សអាដហុក ខេត្តកំពត លោកស្រី ទ្រី ឈួន ក៏បានមានប្រសាសន៍ទៀតថា ចាប់តាំងពីថ្ងៃទី៨ មិថុនាមក ក្រុមយោធារហូតមកទល់នឹងពេលនេះបានរុះរើលំនៅរបស់ប្រជាពលរដ្ឋអស់ប្រមាណ១៣៧ខ្នង ។ ហើយក្រុមប្រជាពលរដ្ឋបានអះអាងទៀតថា ពួកគាត់មួយចំនួនកំពុងតែខ្វះទីជម្រកដោយរស់នៅក្រោមតង់ ខ្វះអាហារ និងថ្នាំសង្កូវ ។

ប្រជាពលរដ្ឋបានអះអាងថា ពួកគាត់បានមករានដីនិងតាំងទីលំនៅនៅចំណុចក្បាលដំរី តាំងពីឆ្នាំ២០០១មក ដោយអាជ្ញាធរបានបែងចែកដីឲ្យពួកគាត់ទំហំក្បាល ៥០ម៉ែត្រ និងបណ្ដោយ ៣០០ម៉ែត្រ ហើយក្រោយមកនៅពេលគេយកដីទៅអភិវឌ្ឍអាជ្ញាធរបានផ្ដល់ដីឲ្យទំហំក្បាល ៣០ម៉ែត្រ និងបណ្ដោយ ១០០ម៉ែត្រវិញ តែនៅពេលវាស់វែងថ្មីៗនេះ អាជ្ញាធរបានចែកឲ្យប្រជាពលរដ្ឋត្រឹមតែក្បាល ៣០ម៉ែត្រ និងបណ្ដោយ ៥០ម៉ែត្រតែប៉ុណ្ណោះ ៕

បោះពុម្ព អ៊ីម៉េល