ស្រ្ដីឈ្មោះ ពេជ្រ ភីន រស់នៅភូមិកោះជ្រឹង ឃុំអូរម្រះ មានប្រសាសន៍បញ្ជាក់ថា គាត់បានដាក់ពាក្យបណ្ដឹងទៅអាជ្ញាធរប៉ូលិសមូលដ្ឋានស្រុក និងផ្ដល់របាយការណ៍ទៅក្រុមសិទ្ធិមនុស្សរួចហើយ ដើម្បីជួយអន្តរាគមន៍រឿងនេះ ទៅអង្គភាពកងរាជអាវុធហត្ថខេត្ត និងតុលាការដើម្បីរកយុត្តិធម៌ និងដាក់ពិន័យនាយអាវុធហត្ថ ។
ស្ត្រី ពេជ្រ ភីន រៀបរាប់ដូច្នេះថា ៖ «វាស់ដី គាត់អត់ឲ្យវាស់ទេ វាស់មានរឿង ។ រឿងវាយកបន្លាឫស្សីគ្របក្បាលខ្ញុំ៣ដង ពេលនោះវាថា បើហងឯងថាដីហងឯងទៀត រឿងឥឡូវហើយ គេថាអ៊ីចឹង ។ តែខ្ញុំថា ខ្លាចអីនឹងថា គឺដីខ្ញុំ តាអឿនឯងវាស់ចូលដីខ្ញុំ ពេលនៅខ្ញុំរុញចូលដី វាដាក់ផូង ដាក់ខ្ញុំចំក្បាលមួយដៃ ដល់ពេលខ្ញុំរបូតចបចេញពីដៃ ខ្ញុំងើបឡើងវាដាក់ខ្ញុំមួយដៃទៀត» ។
មន្រ្តីសមាគមការពារសិទ្ធិមនុស្សអាដហុក ខេត្តស្ទឹងត្រែងឲ្យដឹងថា រឿងហេតុខាងលើ កើតឡើងកាលពីថ្ងៃទី២៨ ឧសភា ឆ្នាំ២០០៨ នៅក្នុងជម្លោះព្រំដីរវាងស្រ្តី និងនាយអាវុធហត្ថខាងលើ ហើយក្នុងជម្លោះនោះ សាក្សីបំភ្លឺថា នាយអាវុធហត្ថបានដាល់ស្រ្តីចំនួនពីរដៃ និងយកបន្លាឫស្សីគ្របទៅលើក្បាលស្រ្តីនោះទៀតផង ។
សាក្សីឃើញហេតុការណ៍ឈ្មោះ ឈួន ទាន អាយុ ២៩ឆ្នាំ ជាញាតិជិតខាងបញ្ជាក់ ៖ «ឃើញ អឿន វ៉ៃចំក្បាល ខ្ញុំបានទាំងជួយចាប់ចេញពីគ្នា យកបន្លាឫស្សីគ្របក្បាល» ។
វិទ្យុអាស៊ីសេរី មិនអាចស្វែងរកនាយអាវុធហត្ថលោក ជា សំណាង ដើម្បីបំភ្លឺសេចក្ដីចោទប្រកាន់ខាងលើនេះបានទេ នៅថ្ងៃអាទិត្យឈប់សម្រាកនេះ ។
យ៉ាងនេះក្ដី អធិការប៉ូលិសស្រុកសៀមបូក លោក មឿង ថងផាន់ មានប្រសាសន៍បញ្ជាក់ថា លោកបានអង្កេតករណីនេះ មួយជំហានហើយ រកឃើញថា ពិតជាមានការវាយដំទៅលើស្រ្តីនោះមែន ។ លោកថា នឹងកោះអញ្ជើញនាយអាវុធហត្ថមកបំភ្លឺករណីនេះ នៅថ្ងៃចន្ទសប្ដាហ៍ក្រោយ ៖ «គាត់ទៅវ៉ៃគេ វ៉ៃស្រីទៀត គាត់ប្រុស គាត់ក្លាយជាកម្រោលចូលអ៊ីចឹង» ។
តាមសេចក្ដីរាយការណ៍ ពីអាជ្ញាធរមូលដ្ឋាននិងក្រុមសិទ្ធិមនុស្សឲ្យដឹងថា នេះជាលើកទីពីរហើយ ដែលនាយអាវុធហត្ថត្រូវបានប្ដឹងចោទប្រកាន់ពីបទវាយដំ ទៅលើអ្នកភូមិដូចគ្នា ហើយពាក្យបណ្ដឹងទាំងពីរករណីនេះ តាមផ្លូវតុលាការពុំទាន់មានឃើញដំណោះស្រាយនៅឡើយ ។
មន្រ្តីសម្របសម្រួលសមាគមអាដហុក ខេត្តស្ទឹងត្រែង លោក ឆាយ រ៉េត ចាត់ទុកសកម្មភាពរបស់នាយអាវុធហត្ថថា ជាអំពើរំលោភទៅលើស្រ្តីភេទ និងរំលោភទៅលើសិទ្ធិមនុស្សយ៉ាងធ្ងន់ធ្ងរ ។ លោកអំពាវនាវឲ្យតុលាការប្រញាប់ប្រញាល់ចាត់ការរឿងក្ដីទាំងអស់នោះ ។
លោក ឆាយ រ៉េត មានប្រសាសន៍ថា ៖ «វ៉ៃម្ដងហើយ ខ្ញុំបានចាត់ការទៅព្រះរាជអាជ្ញាហើយ ដូចជាមិនសូវរវីរវល់យ៉ាងម៉េច ។ អ៊ីចឹងថា បើលើកហ្នឹងសូមអំពាវនាវឲ្យខាងក្រសួងយុត្តិធម៌ក្ដី ឬក៏ខាងឧត្ដមក្រុមប្រឹក្សាចៅក្រម ពិនិត្យខាងតុលាការបន្តិចផង តើរឿងនោះបើទុកបណ្ដោយឲ្យអ៊ីចឹង ដើរតែវ៉ៃគេវ៉ៃឯង អត់មានខ្លាចផង» ។
របាយការណ៍របស់សមាគមអាដហុកខេត្តឲ្យដឹងថា ចាប់ពីឆ្នាំ២០០៧ មក សមាគមនេះ រកឃើញថា មានសកម្មភាពមន្រ្តីកងរាជអាវុធហត្ថ តាមបណ្ដាស្រុកក្នុងខេត្តស្ទឹងត្រែង ត្រូវបានអ្នកភូមិប្ដឹងបានចំនួន ៤ករណីពីបទប្រើអំពើហិង្សាវាយដំទៅលើអ្នកភូមិ ៕