ក្រសួងការពារជាតិកម្ពុជា និងកងទ័ពសហរដ្ឋអាមេរិកនឹងធ្វើលំហាត់យោធារួមគ្នាមួយ ឈ្មោះថាឆ្មាំអង្គរឆ្នាំ២០១១ នៅខេត្តកំពង់ស្ពឺ ដែលមានកងទ័ពចំនួនជាង ៥០០នាក់ចូលរួមក្នុងលំហាត់នេះ ចាប់ផ្ដើមនៅថ្ងៃទី១៦ ខែឧសភា រហូតដល់ថ្ងៃទី២៧ ខែឧសភា ឆ្នាំ២០១១ ដើម្បីរឹតចំណងសហប្រតិបត្តិការរវាងប្រទេសទាំងពីរ។
លំហាត់យោធា ឬឆ្មាំអង្គរឆ្នាំ២០១១ នេះ គឺជាលើកទី២ ហើយ នៅក្នុងប្រទេសកម្ពុជា ដែលរៀបចំដោយសហរដ្ឋអាមេរិក តាមសំណើរបស់ក្រសួងការពារជាតិកម្ពុជា។ តំណាងមកពីប្រទេសឥណ្ឌូណេស៊ី ប្រទេសនេប៉ាល់ និងប្រទេសម៉ុងហ្គោលី មកចូលរួមផងដែរ។ ចំណែកឯប្រទេសថៃ វៀតណាម និងលាវ នៅជិតកម្ពុជា មិនត្រូវបានអញ្ជើញចូលរួមក្នុងលំហាត់យោធានេះផងទេ។
មន្ត្រីអ្នកនាំពាក្យក្រសួងការពារជាតិកម្ពុជា លោកឧត្ដមសេនីយ៍ឯក ឈុំ សុជាតិ បានមានប្រសាសន៍នៅថ្ងៃទី១៣ ខែឧសភាថា លំហាត់យោធានេះ មានសារប្រយោជន៍សម្រាប់កម្ពុជា ៖ "ជាការរីកចំរើនគួរឲ្យមានមោទនភាព លើការពង្រឹងកិច្ចសហប្រតិបត្តិការ មិត្តភាពជាមួយអន្តរជាតិ ជាពិសេសជាមួយសហរដ្ឋអាមេរិក លើការហ្វឹកហ្វឺនការងារយោធាយើង ក្នុងកិច្ចការងារថែរក្សាសន្តិភាព និងមនុស្សធម៌"។
មន្ត្រីអ្នកនាំពាក្យ នៃស្ថានទូតសហរដ្ឋអាមេរិក នៅក្នុងប្រទេសកម្ពុជា លោក ម៉ាក វីនិគ (Mark Wenig) បានមានប្រសាសន៍តាមអ៊ីមែលថា ស្ថានទូតសហរដ្ឋអាមេរិក មេបញ្ជាការសហរដ្ឋអាមេរិក នៅតំបន់មហាសមុទ្រប៉ាស៊ីហ្វិក និងរដ្ឋាភិបាលសហរដ្ឋអាមេរិក ឧទ្ទិសដល់ទំនាក់ទំនងយូរអង្វែងរវាងកម្ពុជា និងសហរដ្ឋអាមេរិក។ វាជាការផ្លាស់ប្ដូរបទពិសោធន៍គ្នា រវាងកម្ពុជា និងសហរដ្ឋអាមេរិក។
ប្រភពពីមន្ត្រីអ្នកនាំពាក្យក្រសួងការពារជាតិកម្ពុជាបានឲ្យដឹងថា លំហាត់យោធានោះ និងអនុវត្តសកម្មភាពដូចជាការហ្វឹកហ្វឺននៅទីបញ្ជាការ ការសង្គ្រោះប្រជាពលរដ្ឋផ្នែកមនុស្សធម៌ និងការហ្វឹកហ្វឺនផ្នែកវិស្វកម្មសាងសង់សាលារៀន មន្ទីរពេទ្យ និងការព្យាបាលប្រជាពលរដ្ឋ។
ក្រសួងការពារជាតិកម្ពុជា និងសហរដ្ឋអាមេរិក បានធ្វើលំហាត់យោធាឆ្មាំអង្គរលើកដំបូងនៅឆ្នាំ២០១០ កន្លងទៅ ដោយមានកងទ័ពមកពីប្រទេសចិន រុស្ស៊ី អាល្លឺម៉ង់ ថៃ និងប្រទេសជាច្រើនទៀតមកចូលរួម ចំនួនជាង ៥០០នាក់៕