លោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃ បានមានប្រសាសន៍នៅក្នុងសន្និសីទកាសែតមួយដែលមានឯកអគ្គរដ្ឋទូតអាមេរិកស្តីទីចូលរួមជាមួយផងដែរថា ៖ «ខ្ញុំបានប្រកាន់នូវជំហរមួយច្បាស់លាស់ថា រដ្ឋាភិបាល ជាពិសេស ក្រសួងមហាផ្ទៃ នឹងអនុវត្តច្បាប់ចំពោះមន្ត្រីដែលត្រូវបានចោទប្រកាន់ថាបានរំលោភទៅលើស្ត្រីរកស៊ីផ្លូវភេទ ហើយយើងខ្ញុំតាមរយៈក្រសួងកិច្ចការនារីផង ក៏ដូចជាតាមរយៈមន្ត្រីដែលចូលរួមពីម្សិលមិញផង គឹសូមឲ្យបង្ហាញនិងផ្ដល់នូវភស្តុតាងទាក់ទងនឹងមន្ត្រីណាមួយ ឬក៏ក្រុមណាមួយដែលបានប្រព្រឹត្តមិនគប្បីទៅលើស្ត្រីរកស៊ីផ្លូវភេទ ប៉ុន្តែមកដល់ពេលនេះ យើងខ្ញុំមិនទាន់ទទួលបានភស្តុតាងជាក់លាក់ទេ» ។
ការមានប្រសាសន៍របស់លោក ស ខេង បានកើតមានឡើង ក្រោយពីមានរបាយការណ៍ព័ត៌មានអំពីស្រ្តីរកស៊ីផ្លូវភេទដែលបានជួបជុំគ្នាប្រមាណ ៤០០នាក់ កាលពីថ្ងៃទី៤ មិថុនាថា មានការធ្វើបាបចំពោះស្រ្តីរកស៊ីផ្លូវភេទ ក្រោយពេលពួកគេត្រូវប៉ូលិសចាប់ ។
តំណាងស្រ្តីរកស៊ីផ្លូវភេទមួយរូបឈ្មោះ កែវ ថា បានរៀបរាប់អំពីការធ្វើបាបទាំងនោះថា ៖ «បច្ចុប្បន្ននេះ គឺស្ត្រីតែគាត់ចាប់បានហើយ បើសិនជាក្មេងគឺគាត់ត្រូវការរំលោភតែម្ដង ... បើច្បាប់ចេញថ្មី គឺតឹងរ៉ឹងតែម្ដង ទីមួយ ធ្វើឲ្យមានផលប៉ះពាល់ទៅលើស្ត្រីរកស៊ីផ្លូវភេទ ពិបាក NGO អប់រំ ទីពីរទៀត ច្បាប់ហ្នឹងគឺតម្រូវឲ្យបិទបនតែម្ដង ហើយដេញចាប់ស្រី ដូចផ្សារត្រី ដូចចាប់ចោរអ៊ីចឹង» ។
លោកឧបនាយករដ្ឋមន្ត្រី ស ខេង បានលើកឡើងនៅក្នុងសន្និសីទកាសែតនោះផងដែរថា តាមលោកយល់ ច្បាប់ប្រឆាំងអំពើជួញដូរនិងការកេងប្រវ័ញ្ចផ្លូវភេទ ដែលរដ្ឋសភាបានអនុម័តកាលពីខែកុម្ភៈ កន្លងទៅ មិនបានហាមការរកស៊ីផ្លូវភេទដោយស្ម័គ្រចិត្តនោះទេ ៖ «បើខ្ញុំមិនច្រឡំទេ មានមាត្រាខ្លះនិយាយថា យើងប្រឆាំងការជួញដូរ ហើយការធ្វើអាជីវកម្មលើផ្លូវភេទ មានន័យថា បើថៅកែប្រមូលអ្នករកស៊ីផ្លូវភេទទៅដាក់ម្ដុំ ដើម្បីកេងប្រវ័ញ្ចយកចំណេញនោះ ការបកស្រាយរបស់ខ្ញុំ ៗ យល់ថា ច្បាប់ដូចជាមិនអនុញ្ញាតទេ ប៉ុនែ្តនៅក្នុងច្បាប់នោះ ក៏គ្មានកន្លែងណា ដែលហាមឃាត់ទាក់ទងនឹងសាមីខ្លួនគេស្ម័គ្រចិត្ត» ។
សូមជម្រាបថា តាមរបាយការណ៍របស់ក្រសួងការបទេសអាមេរិក ដែលចេញផ្សាយនាពេលថ្មីៗ ថា អាជ្ញាធរកម្ពុជាបានប្រឹងប្រែងជាខ្លាំងក្នុងការប្រឆាំងការជួញដូរនិងកេងប្រវ័ញ្ចផ្លូវភេទ ដោយក្នុងឆ្នាំ២០០៨នេះ កម្ពុជាបានទទួលឋានៈជាប្រទេសបានលំដាប់លេខ២ ហើយមន្ត្រីរដ្ឋាភិបាលបានប្រកាសជាសាធារណៈនូវគោលនយោបាយ គ្មានការអត់ឱនចំពោះមន្រ្តីដែលបានទទួលផលប្រយោជន៍ឬឃុបឃិតក្នុងការជួញដូរមនុស្សទៀតផង ។
ចាប់ពីឆ្នាំ២០០៣ មកទល់បច្ចុប្បន្ន អាមេរិកបានផ្តល់លុយប្រមាណ ១៤លានដុល្លារហើយ ដើម្បីជួយលើការប្រឆាំងការជួញដូរមនុស្សនេះ ៕