រដ្ឋមន្ត្រីយុត្តិធម៌សន្យាថានឹងពិនិត្យបណ្ដឹងករណីជួញដូរមនុស្សនៅកំពត

ដោយ សាន សុវិទ្យ

2009-03-29

មេដឹកនាំខ្ពស់បំផុតនៃក្រសួងយុត្តិធម៌កម្ពុជា បានប្រាប់វិទ្យុអាស៊ីសេរីនៅរសៀលថ្ងៃអាទិត្យនេះថា លោកនឹងចាត់ការចុះពិនិត្យករណីបណ្តឹងនៅភូមិកំពង់បាយ ឃុំកំពង់បាយ ស្រុកកំពង់បាយ ខែត្រកំពត យ៉ាងយកចិត្តទុកដាក់ដើម្បីនាំមកនូវយុត្តិធម៌ជូនពលរដ្ឋខ្មែរគ្រប់រូប។

RFA/Zakariya

កុមារីជាកូនរបស់ជនជាប់ចោទឈ្មោះ តាន់ យូ នៅភូមិ, ឃុំ, ស្រុកកំពង់បាយ ខេត្តកំពត កំពុងរស់នៅដោយខ្វះម្ដាយជាទីពឹង។ រូថថតថ្ងៃទី១៨ មីនា ២០០៩។

សូមរំឭកថា កាលពីថ្ងៃទី៦ ខែធ្នូ ឆ្នាំ២០០៨ កន្លងទៅ សាលាដំបូងខែត្រកំពត បានចេញដីកាលេខ២៨២ ចុះថ្ងៃទី២ ធ្នូ ឆ្នាំ២០០៨ ឲ្យចាប់ខ្លួនស្រ្តីមេម៉ាយ ឈ្មោះ តាំង យូ ក្នុងបទសង្ស័យតាមច្បាប់ស្តីពីការបង្ក្រាបអំពើជួញដូរមនុស្សនិងអំពើធ្វើអាជីវកម្មផ្លូវភេទ។

ការឃុំឃាំងជនសង្ស័យឈ្មោះ តាំង យូ នេះ បានត្រូវក្រុមអ្នកសង្កេតការណ៍ក្រៅរដ្ឋាភិបាលនិងក្រុមសិទ្ធិមនុស្ស ពណ៌នាថា ជាការឃាត់ខ្លួនខុសនីតិវិធីនិងបានធ្វើឡើងដោយផ្អែកតែទៅលើពាក្យប្តឹងនៃដើមបណ្តឹងតែម្យ៉ាងប៉ុណ្ណោះ ពុំមានភស្តុតាងអ្វីផ្សេងទៀតឡើយ។

ការឃុំខ្លួនអ្នកស្រី តាំង យូ ដែលមានកូនស្រីតូចៗអាយុក្រោម ១៥ឆ្នាំ បានធ្វើឲ្យអនីតិជនទាំងនោះរស់នៅគ្មានទីពឹងនិងខកខានមិនបានចូលសាលារៀនតាមផែនការរបស់រដ្ឋ។

ក្នុងបទសន្ទនា តាមទូរស័ព្ទជាមួយវិទ្យុអាស៊ីសេរីនៅរសៀលថ្ងៃអាទិត្យនេះ លោករដ្ឋមន្រ្តីក្រសួងយុត្តិធម៌ អង្គ វង្សវឌ្ឍនា បានមានប្រសាសន៍ថា លោកពុំមានព័ត៌មានច្បាស់លាស់ទាក់ទងនឹងករណីនេះនៅឡើយទេ។ ទោះជាយ៉ាងនេះក្តី លោកបានសន្យាថា លោកនឹងបន្ថែមល្បឿនការសិក្សារឿងរ៉ាវដែលមានជាប់ទាក់ទិននឹងក្មេងដែលត្រូវការទីពឹងនេះ ឲ្យបានឆាប់បំផុតតាមដែលអាចធ្វើទៅបានដែលលោករំពឹងថា នឹងផ្តល់ដំណឹងជូនវិញនៅថ្ងៃច័ន្ទស្អែកនេះ។

ក្នុងបទសន្ទនាដាច់ដោយឡែក ជាមួយប្រធានតុលាការខែត្រកំពត គឺលោក ហួន ម៉ានី នៅរសៀលថ្ងៃអាទិត្យនេះដែរ មន្ត្រីយុត្តិធម៌រូបនេះ បានឆ្លើយតបនឹងសំណួររបស់លោក សំ បូរិន្ទ ថា ករណីនោះ បានចាប់ផ្តើមហើយ តែត្រូវផ្អាកសិន ព្រោះត្រូវចាំដើមបណ្តឹងគឺអ្នកស្រី អាំង សុភី រកមេធាវីបានសិន។

សំ បូរិន្ទ ៖ រឿងដែលទាក់ទងនឹងនាង តាន់ យូ ដែលថាត្រូវតុលាការខេត្តកំពត បានចាប់ឃុំឃាំង ៣-៤ខែមកហ្នឹង តើករណីហ្នឹងមកដល់ត្រង់ណាហើយ?

ហួន ម៉ានី ៖ គេបញ្ជូនទៅជម្រះហើយ ថ្ងៃមុនគេសុំលើកពេលសវនាការ។ គេបញ្ជូនទៅជម្រះហើយរឿងហ្នឹងមិនដឹងនរណាគេជម្រះទេ។ អ្នកដែលសុំហ្នឹងគឺមេធាវីខាងជនរងគ្រោះ។

កាលពីថ្ងៃពុធ ទី២៥ ខែមីនា សាលាដំបូងខែត្រកំពត បានប្រកាសលើកសវនាការករណីស្រ្តីសង្ស័យឈ្មោះ តាំង យូ នេះទៅពេលក្រោយ ដោយសំអាងលើហេតុផលថា ស្ត្រីដើមបណ្តឹងឈ្មោះ អាំង សុភី ត្រូវការរកមេធាវីឲ្យបានសិន។

គេនៅតែពុំទាន់បានទទួលសេចក្តីពន្យល់ច្បាស់លាស់ពីមន្រ្តីយុត្តិធម៌ណាម្នាក់អំពីហេតុផលនិងភស្តុតាងដាក់បន្ទុកគ្រប់គ្រាន់លើករណីចាប់ឃុំខ្លួនជនសង្ស័យឈ្មោះ តាំង យូ ដាក់ឃុំឃាំងជិត៤ខែមកហើយនោះ នៅឡើយទេ មកទល់ពេលនេះ៕

បោះពុម្ព អ៊ីម៉េល

មតិ

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។