គេនៅមិនទាន់បានកំណត់កាលបរិច្ឆេទជាក់លាក់នៅទ្បើយទេ ក្នុងការចេញដីកាកោះហៅនោះ។
លោក អង្គវង្ស វឌ្ឍានា ជារដ្ឋមន្រ្តីក្រសួងយុត្តិធម៌ប្រទេសកម្ពុជា បានមានប្រសាសន៍នៅក្នុងសន្និសីទកាសែតនៅឯទីស្តីការគណៈរដ្ឋមន្រ្តី នៅថៃ្ងច័ន្ទ ទី១៦ ខែវិច្ឆិកា ថា ៖ «លោកព្រះរាជអាជ្ញានៃតុលាការខេត្តស្វាយរៀង ឃើញថា បន្ទាប់ពីបានទទួលនូវការលើកអភ័យឯកសិទ្ធិពីសភាហើយ គេនឹងកោះអញ្ជើញឯកឧត្ដម សម រង្ស៊ី ដើម្បីធ្វើការស៊ើបសួរ មិនមែនជាការសួរចម្លើយទេ គ្រាន់តែឲ្យគាត់ទៅឆ្លើយនឹងការចោទប្រកាន់នោះ តើមានលក្ខខណ្ឌអ្វីខ្លះ? ហើយប្រមូលភស្តុតាងនានាដើម្បីធ្វើការស៊ើបអង្កេតបន្តទៅទៀត»។
លោក កែវ ធា ជាព្រះរាជអាជ្ញានៃតុលាការខេត្តស្វាយរៀង បានមានប្រសាសន៍ថា លោកមិនអាចប្រាប់បានទេអំពីកាលបរិច្ឆេទនៃការកោះហៅលោក សម រង្ស៊ី នោះ។
លោក កែវ ធា មានប្រសាសន៍ដូច្នេះ ៖ «ខ្ញុំមិនអាចជម្រាបព័ត៌មានជូនលោកបានទេ នោះជាអភ័យឯកសិទ្ធិរបស់ឯកឧត្ដម សម រង្ស៊ី វាអាស្រ័យទៅលើសមាជិកសភា សភាដំណើរការយ៉ាងម៉េចខ្ញុំអត់ដឹងទេ អ៊ីចឹងខ្ញុំមិនអាចផ្ដល់ព័ត៌មានជូនលោកបានទេ»។
លោក វ៉ា គឹមហុង ជាប្រធាននៃគណៈកម្មាធិការចម្រុះដោះស្រាយវិវាទព្រំដែនកម្ពុជា បានមានប្រសាសន៍នៅក្នុងសន្និសីទកាសែតរួមគ្នានោះថា បង្គោលព្រំដែនចំនួន៦បង្គោលដែលលោក សម រង្ស៊ី បានដកនោះ ជាបង្គោលព្រំដែនដែលត្រូវបានឯកភាពគ្នារួចហើយរវាងក្រុមជំនាញព្រំដែនកម្ពុជានិងវៀតណាម គឺមិនមែនជាការលេងសើចកាត់ទឹកដី លក់ទឹកដីនោះទេ។
លោក វ៉ា គឹមហុង មានប្រសាសន៍ដូច្នេះ ៖ «នៅខេត្តស្វាយរៀង លោក(សម រង្ស៊ី) បានឲ្យបក្សពួកលោក គឺថាដកបំផ្លាញតម្រុយបង្គោលព្រំដែនចំនួន៦បង្គោល ដែលព័ទ្ធជុំវិញទីតាំងបង្គោលដែលក្រុមបច្ចេកទេសយើងកំពុងតែខិតខំរកចំណុចត្រឹមត្រូវដើម្បីកំណត់ទីតាំងបង្គោលជាអចិន្រ្តៃយ៍»។
ចំណែកឯលោក សម រង្ស៊ី មេដឹកនាំគណបក្សប្រឆាំងបានមានប្រសាសន៍តាមទូរស័ព្ទពីប្រទេសបារាំងមកថា ៖ «នៅស្រុកខ្មែរសព្វថ្ងៃគឺចម្លែកៗមែនទែន អ្នកដែលស្មោះត្រង់ជាមួយនឹងប្រទេសជាតិ ស្មោះត្រង់ជាមួយនឹងប្រជារាស្រ្ដបែរទៅជាមានរឿង តែអ្នកដែលធ្វើបាបរាស្ត្រ អ្នកដែលបំផ្លិចបំផ្លាញជាតិ អ្នកដែលលក់ជាតិបែរទៅជារួចខ្លួន មានបុណ្យស័ក្ដិ»។
លោកមិនបានប្រាប់ឲ្យដឹងអំពីកាលបរិច្ឆេទសម្រាប់ការវិលមកប្រទេសកម្ពុជាវិញនៅទ្បើយទេ។
ប្រតិកម្មភ្លាមៗពីមន្រ្តីជាន់ខ្ពស់របស់រដ្ឋាភិបាលកម្ពុជាខាងលើនេះ គឺនៅថៃ្ងដដែល ក្រោយពីសភាជាតិបានលើកអភ័យឯកសិទ្ធិតំណាងរាស្រ្តពីលោក សម រង្ស៊ី ដើម្បីបើកផ្លូវឲ្យតុលាការខេត្តស្វាយរៀង កោះហៅសាកសួរចម្លើយនិងចោទប្រកាន់ក្រោមបទបំផ្លាញទ្រព្យសម្បតិ្តសាធារណៈ នៅក្នុងឃុំសំរោង ស្រុកចន្រ្ទា ខេត្តស្វាយរៀង កាលពីថៃ្ងទី២៥ ខែតុលា ថ្មីៗនេះ។
មន្រ្តីជំនាញព្រំដែននៃរដ្ឋាភិបាលកម្ពុជាបានឲ្យដឹងថា កម្ពុជានិងវៀតណាមបានបោះបង្គោលព្រំដែនជាមួយគ្នាបានចំនួនជាង១០០បង្គោលហើយនៅក្នុងខេត្តចំនួន៩ ជាប់ព្រំដែនកម្ពុជានិងវៀតណាម។ ភាគីទាំងពីរគ្រោងនឹងបោះបង្គោលព្រំដែននោះឲ្យហើយនៅមុនដំណាច់ឆ្នាំ២០១២ ដែលមានបង្គោលសរុប៣៧០បង្គោល៕