តំណាងសហគមន៍និងតំណាងប្រជាពលរដ្ឋឲ្យដឹងថា ដីតំណមនិងដីកប់ខ្មោចដូនតាជាទីសក្ការៈ ត្រូវបានក្រុមហ៊ុនកូរ៉េមួយកាប់បំផ្លាញអស់ជាច្រើនរយហិកតារ ហើយពុំឃើញមានអាជ្ញាធរណាជួយទប់ស្កាត់ឬបញ្ជាក់ហេតុផលជូនពួកគេ ទើបប្រជាពលរដ្ឋមានការប្ដេជ្ញាបែបនេះ ៖ «សូម្បីតែអភិបាលខេត្តក៏ដឹងដែរ រឿងក្រុមហ៊ុនកូរ៉េ។ ហើយប្រជាពលរដ្ឋ គាត់កំពុងទាមទារ ហើយចង់នាំគ្នាតវ៉ាធ្វើបាតុកម្មប្រឆាំង ដេញក្រុមហ៊ុនហ្នឹងចេញ ហើយសំណូមពរឲ្យខាងអាជ្ញាធរនិងអង្គការក្រៅរដ្ឋាភិបាលហ្នឹង ជួយឃ្លាំមើល»។
តំណាងប្រជាពលរដ្ឋឲ្យដឹងថែមទៀតថា ពួកគេធ្លាប់បានទប់ស្កាត់ក្រុមហ៊ុននេះម្ដងរួចមកហើយ កាលពីឆ្នាំ២០០៦ ដោយពុំឃើញក្រុមហ៊ុនមានលិខិតស្នាមអនុញ្ញាតឲ្យចូលមកកាប់ឆ្ការ មានតែការអះអាងផ្ទាល់មាត់ថា អាជ្ញាធរខេត្តអនុញ្ញាតតែប៉ុណ្ណោះ។
លុះមកដល់ថ្ងៃទី១៦ កញ្ញា តំណាងប្រជាពលរដ្ឋ ២៧នាក់ បាននាំគ្នាចូលទៅទប់ស្កាត់ម្ដងទៀត នៅពេលដែលឃើញក្រុមហ៊ុននោះ កំពុងតែប្រមូលឈើដែលកាប់ឆ្ការ ហើយដុតបំផ្លាញបំបាត់ភស្តុតាង ៖ «ឥឡូវ គេកំពុងតែរើស[ឈើ]កាប់រួចហ្នឹង ហើយគល់ធំៗដែលកាប់ហើយហ្នឹង គេយកភ្លើងដុត រួចដុតហ្នឹង គេយកដីហ្នឹងលុបពីលើទៀត កុំឲ្យគេឃើញ បំបាត់ភស្ដុតាង»។
តំណាងប្រជាពលរដ្ឋនិងតំណាងសហគមន៍បានឲ្យដឹងបន្ថែមថា ការអភិវឌ្ឍនៅទីនោះពុំមានអាជ្ញាធរណាម្នាក់ទៅផ្លាស់ប្ដូរយោបល់អំពីផលប៉ះពាល់ជាមួយប្រជាពលរដ្ឋជាមុនឡើយ ហើយក្នុងការតវ៉ា មេភូមិ មេឃុំបានហាមប្រាមដល់ពួកគេទៀតផង។ ក្រុមហ៊ុនកូរ៉េនោះត្រូវអ្នកស្រុកឲ្យដឹងថា ៖ «ក្រុមហ៊ុន វីស៊ីន ហាយឡែន» អភិវឌ្ឍដាំដើមកៅស៊ូលើផ្ទៃដីប្រមាណ ១ពាន់ហិកតារ។
អភិបាលស្រុកអូររាំង គឺលោក នួន សារ៉ន បានជម្រាបថា ក្រុមហ៊ុននេះបានទទួលការអនុញ្ញាតពីអាជ្ញាធរស្រុកខេត្ត ដើម្បីសិក្សាសាកល្បងនៅលើផ្ទៃដី ដែលអាជ្ញាធរស្រុកខេត្តអនុញ្ញាត។ ហើយលោកបានសម្ដែងការមិនសប្បាយចិត្តចំពោះប្រជាពលរដ្ឋ ដែលមានបញ្ហាអ្វី មិនមករកអាជ្ញាធរ ច្រើនតែទៅពឹងឲ្យអង្គការក្រៅរដ្ឋាភិបាលជួយដោះស្រាយ។ ប៉ុន្តែទោះជាយ៉ាងណាក៏ដោយ ក្នុងនាមលោកជាអ្នកទទួលខុសត្រូវ លោកត្រូវតែដោះស្រាយ។
លោក នួន សារ៉ន មានប្រសាសន៍ដូច្នេះថា ៖ «បញ្ហាឃើញកើតឡើងអ៊ីចឹង ខ្ញុំក៏នៅប្រឈមដោះស្រាយ ខ្ញុំស្នើទៅឃុំដើម្បីចុះទៅមើល ហើយខ្ញុំនឹងបង្កើតក្រុមការងារថ្នាក់ស្រុកមួយទៀត ដើម្បីចុះទៅពិនិត្យទៀត»។
មន្រ្តីសិទ្ធិមនុស្សនៃអង្គការវីជីឡែន គឺលោក ឯម វាសនា បានអះអាងថា ការចង់ធ្វើបាតុកម្មរបស់ប្រជាពលរដ្ឋដើម្បីទប់ស្កាត់ក្រុមហ៊ុននោះដោយខ្លួនឯង មកពីកន្លងមកប្រជាពលរដ្ឋពុំបានទទួលលទ្ធផលពីការជួយអន្តរាគមន៍របស់អាជ្ញាធរឡើយ៕