មន្ត្រីនិងពលរដ្ឋនៅតែសម្ដែងក្ដីបារម្ភថា បើទោះបីជារដ្ឋាភិបាលសន្យាថានឹងអនុញ្ញាតឲ្យពលរដ្ឋអភិវឌ្ឍនៅនឹងកន្លែងក៏ដោយ ប៉ុន្តែការសន្យារបស់រដ្ឋាភិបាលកន្លងមកអាជ្ញាធរមូលដ្ឋានមិនបានអនុវត្តនោះទេ។
ប្រតិកម្មរបស់អ្នកភូមិ និងអង្គការសង្គមស៊ីវិលធ្វើឡើងក្រោយពេលដែលលោក ហ៊ុន សែន សុខចិត្តផ្ដល់ដីទំហំជិត ១៣ហិកតារឲ្យពលរដ្ឋនៅតំបន់បឹងកក់។ ផ្ទៃដីនេះនឹងអនុញ្ញាតឲ្យអ្នកភូមិបឹងកក់ប្រមាណជិត ១ពាន់គ្រួសារសាងសង់លំនៅឋាន។
អ្នកភូមិបឹងកក់ អ្នកស្រី ទុល ស្រីពៅ កាលពីថ្ងៃទី១៦ ខែសីហា បានស្វាគមន៍សេចក្ដីសម្រេចរបស់លោក ហ៊ុន សែន ប៉ុន្តែអ្នកស្រីនៅតែបារម្ភចំពោះការអនុវត្តរបស់មន្ត្រីថ្នាក់មូលដ្ឋាន ៖ «យើងដឹងស្រាប់ហើយថា ប្រទេសយើងមិនទាន់បំបាត់អំពើពុករលួយបាននៅឡើយ។ ពេលឃើញដី ពួកមន្ត្រីនៅតែស្រេកឃ្លាន។ យើងភ័យព្រួយ សម្ដេចឲ្យហើយ តែមន្ត្រីក្រោមឱវាទយកដី»។
ធនាគារពិភពលោកកាលពីសប្ដាហ៍មុន គំរាមផ្អាកជំនួយជាប្រាក់កម្ចីដល់កម្ពុជា ប្រសិនបើរដ្ឋាភិបាលមិនផ្ដល់ដំណោះស្រាយដល់អ្នកភូមិបឹងកក់។ ធនាគារបានផ្អាកប្រាក់កម្ចីទាំងស្រុងតាំងពីខែធ្នូ ឆ្នាំ២០១០ ដោយសាររដ្ឋាភិបាលមិនបានយកចិត្តទុកដាក់ស្វែងរកដំណោះស្រាយដល់ពលរដ្ឋបឹងកក់។ គម្រោងរបស់ធនាគារពិភពលោកនៅកម្ពុជា មានទឹកប្រាក់ប្រមាណ ៤០០លានដុល្លារ។
អ្នកស្រី ទុល ស្រីពៅ ក៏បានថ្លែងអំណរគុណទៅដល់ធនាគារ ដែលបានដាក់សម្ពាធរដ្ឋាភិបាលក្រុងភ្នំពេញ ដោយផ្ដល់ដំណោះស្រាយសមស្របមួយឲ្យអ្នកភូមិ។
អ្នកភូមិបឹងកក់ប្រមាណជិត ៣ពាន់គ្រួសារ ត្រូវបានបណ្ដេញដោយបង្ខំចេញពីផ្ទះសម្បែង ដើម្បីយកដីទៅឲ្យក្រុមហ៊ុនមានភាគហ៊ុនចិន និងខ្មែរ អភិវឌ្ឍតំបន់បឹងកក់ដែលមានទំហំប្រមាណជាង ១០០ហិកតារ។ ម្ចាស់ភាគហ៊ុនក្រុមហ៊ុននេះជាសមាជិកព្រឹទ្ធសភានៃគណបក្សប្រជាជនកម្ពុជា។ បច្ចុប្បន្នមានពលរដ្ឋបឹងកក់នៅសេសសល់ពីការបង្ខំបណ្ដេញចេញប្រមាណ ១ពាន់គ្រួសារ កំពុងរស់នៅតំបន់នេះ។
មន្ត្រីជាន់ខ្ពស់សមាគមការពារសិទ្ធិមនុស្សអាដហុក លោក ចាន់ សុវ៉េត កាលពីថ្ងៃអង្គារ ទី១៦ ខែសីហា នៅតែសម្ដែងមន្ទិលសង្ស័យជុំវិញសេចក្ដីសម្រេចចិត្តរបស់រដ្ឋាភិបាល។ លោកបន្តថា កន្លងមកការសន្យារបស់ថ្នាក់ដឹកនាំរដ្ឋាភិបាលមិនត្រូវបានគោរពនោះទេ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានហៅការសម្រេចចិត្តរបស់រដ្ឋាភិបាលថា មិនពាក់ព័ន្ធទៅនឹងការផ្អាកប្រាក់កម្ចីធនាគារពិភពលោកនោះទេ។ លោកថា កន្លងមករដ្ឋាភិបាលបានពន្យារពេលដោះស្រាយឲ្យពលរដ្ឋបឹងកក់ ដោយសារតែពលរដ្ឋខ្លះគ្មានប័ណ្ណកម្មសិទ្ធិត្រឹមត្រូវ ៖ «ធនាគារពិភពលោកគ្រាន់តែឆក់ឱកាសក្នុងពន្លឺសំឡេងប្រាសចាកសេចក្ដីព្រមព្រៀងកម្ពុជា និងធនាគារពិភពលោក»។
ធនាគារពិភពលោកកាលពីខែមីនា បានសារភាពថា ធនាគារបានបរាជ័យក្នុងការពារពលរដ្ឋបឹងកក់ ក្នុងការផ្ដល់ប័ណ្ណកម្មសិទ្ធិដល់អ្នកភូមិ ក្នុងគម្រោងផ្ដល់ប័ណ្ណកម្មសិទ្ធិកាលពីប៉ុន្មានឆ្នាំមុននេះ។ ធនាគារបានសន្យាជួយរដ្ឋាភិបាលក្នុងការដោះស្រាយជម្លោះដីបឹងកក់ ប៉ុន្តែមិនមានដំណោះស្រាយរហូតដល់ពេលបច្ចុប្បន្ន។
បញ្ហាដីធ្លីជាបញ្ហាធ្ងន់ធ្ងរនៅកម្ពុជា ហើយរដ្ឋាភិបាលបានទទួលការរិះគន់យ៉ាងខ្លាំងពីអង្គការសិទ្ធិមនុស្ស និងអង្គការសហប្រជាជាតិ ដោយសារបញ្ហានេះបានធ្វើឲ្យពលរដ្ឋរាប់ពាន់នាក់បាត់បង់លំនៅឋាន៕