អ្នកភូមិម្នាក់បានរៀបរាប់បែបនេះថា ៖ «គេឲ្យប៉ូលិស ប៉េអឹមតាមដានខ្លាចប្រជាពលរដ្ឋជំនុំគ្នាតវ៉ាដីធ្លី»។
ស្រ្តីអ្នកភូមិម្នាក់ផ្សេងទៀតបានស្នើមិនបញ្ចេញឈ្មោះដោយគិតពីសុវត្ថិភាពផ្ទាល់ខ្លួន បានរៀបរាប់ថា អ្នកភូមិកំពុងតែរងាខណៈដែលអាជ្ញាធរជាម៉ែឪមិនជួយដោះស្រាយប្រគល់ដីធ្លីមកឲ្យពួកគាត់វិញ ហើយបែរជាតាមដានពួកគាត់ជាប់ជាប្រចាំបែបនេះ ៖ «តាំងពីប៉ុស្ដិ៍រដ្ឋបាល តាំងពីមេឃុំជាអាជ្ញាធរ គាត់មានការតាមដានទៅលើប្រជាពលរដ្ឋ ព្រោះអីអ្វីដែលគាត់ទាមទារទៅវាអត់បាន ដល់អត់បានទៅគាត់នៅតែទាមទារ»។
ស្រ្តីរូបនេះបន្តថា គេកំពុងរកមុខមេដឹកនាំសហគមន៍និងរកភស្តុតាងដើម្បីឈានទៅចាប់ខ្លួនពីបទចោទថា ញុះញង់ ៖ «គេអាចដឹងថា តំណាងសហគមន៍អ្នកនាំទៅជួបអី ប៉ុន្តែគេអត់ទាន់មានភស្តុតាងថា អ្នកហ្នឹងជាអ្នកនាំ។ បើគេមានភស្តុតាង គេថា គេមិនអាចឲ្យអ្នកហ្នុងរួចទោសទេ»។
កាលពីថ្ងៃទី៤ មីនា កន្លងមកនេះ អាជ្ញាធរឃុំបានជួបប្រជុំជាមួយអ្នកភូមិប្រមាណជាង៣០នាក់ ដើម្បីបកស្រាយទៅវិញទៅមកអំពីផលប៉ះពាល់នៃការវិនិយោគរបស់ក្រុមហ៊ុនសុកហ្វីនខេស៊ីឌី លើដីដាំកៅស៊ូចំនួនជាង២.៧០០ហិកតានៅក្នុងឃុំប៊ូស្រា។ កិច្ចប្រជុំនោះបានបញ្ចប់ទៅដោយភាពតឹងសរសៃក ហើយគ្មានលទ្ធផលក្រៅតែពីការទាមទាររបស់មេឃុំប៊ូស្រា តម្រូវឲ្យប្រជាជនរាយការណ៍ច្បាស់លាស់ពីការដើរហើររបស់ខ្លួនចាប់ពីពេលចប់កិច្ចប្រជុំតទៅ។
អ្នកភូមិបានរាយការណ៍ថា ពីពេលនោះមកពួកគាត់ត្រូវប៉ូលិសនិងអាវុធហត្ថតាមឃ្លាំមើលគ្រប់សកម្មភាព មិនអាចជួបជុំជជែកគ្នាបានទេ បើទោះជាចង់គិតគូរដល់ការរៀបចំបុណ្យទានសែនភូមិអបអរឆ្នាំថ្មីក៏ដោយ។
ប្រធានប៉ូលិសប៉ុស្តិ៍រដ្ឋបាលឃុំប៊ូស្រា លោក សឿន សុភ័ក្រ មិនអាចបំភ្លឺការចោទប្រកាន់ខាងលើនេះទេ ដោយលោកនិយាយថាជាប់ប្រជុំ។ ចំណែកឯមេឃុំប៊ូស្រា លោក កេង ញ៉ក់ បានបដិសេធថា លោកមិនបានឲ្យគេតាមដានអ្នកភូមិនោះឡើយ ប៉ុន្តែលោកទទួលស្គាល់ថា បានស្នើឲ្យអ្នកភូមិរាយការណ៍ពីដំណើររបស់ខ្លួនក្នុងពេលចាកចេញពីមូលដ្ឋានមែន ដើម្បីលោកបានដឹងជាមុន ជាប្រយោជន៍គិតដល់សុវត្ថិភាពពួកគាត់ប៉ុណ្ណោះ។
លោក សឿន សុភ័ក្រ មានប្រសាសន៍ដូច្នេះ ៖ «ឲ្យដឹងថា ទៅសិក្ខាសាលាឬទៅទំនាក់ទំនងការងារអ្វីមួយ។ រឿងទំនាក់ទំនងគេមិនហាមឃាត់ទេ ខ្ញុំគ្រាន់តែឲ្យគ្រួសារគាត់ អាជ្ញាធរដឹងផង ហើយជួយមើលការខុសត្រូវគាត់»។
មន្រ្តីស៊ើបអង្កេតមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ បានថ្លែងថា សិទ្ធិក្នុងការដើរហើរនិងបញ្ចេញមតិរបស់អ្នកភូមិត្រូវបានមេឃុំប៊ូស្រាគាបសង្កត់។ នេះជាការរំលោភយ៉ាងធ្ងន់ធ្ងរ។
លោក ឈឹម សាវុធ មានប្រសាសន៍ថា ៖ «ត្រូវតែជម្រាបប្រាប់មេឃុំមុននឹងមក បានអាចមកបាន។ ហ្នឹងបើនិយាយរឿងច្បាប់ វាជារូបភាពមួយដែលរារាំងសេរីភាពដើរហើ សេរីភាពបញ្ចេញមតិ។ បើនិយាយទៅវាជាកំហុសឆ្គងមួយធ្ងន់ណាស់»។
ក្រុមហ៊ុនសុកហ្វីនខេស៊ីឌី បានវិនិយោគដាំកៅស៊ូលើផ្ទៃដីប្រមាណ២.៧០០ហិកតា នៅក្នុងឃុំប៊ូស្រា។ បន្ទាប់ពីទទួលគោលការណ៍ពីរដ្ឋាភិបាលរួចមក គេបានឈូសឆាយប៉ះពាល់ទៅលើដីព្រៃកប់ខ្មោច ដីព្រៃគោរពបូជានិងដីចម្ការរបស់អ្នកភូមិប្រមាណ៦ភូមិ៕